بٷگٸن 64 جاسقا قاراعان شاعىندا اسا كٶرنەكتٸ اقىن, قر مەملەكەتتٸك سىيلىعىنىڭ لاۋرەاتى ەسەنعالي ەبدٸجاپپارۇلى راۋشانوۆ جارىق دٷنيەمەن قوش ايتىستى. قارالى حاباردى ەستٸپ قالىڭ قازاقپەن بٸرگە قايعىرعان قالامگەر قاۋىم ەلەۋمەتتٸك جەلٸدە كٶڭٸل ايتىپ, جوقتاۋ سٶزٸن ٶلەڭمەن ٶرنەكتەدٸ.
ۇلت پورتالىنىڭ رەداكتسيياسى سول جازبالار مەن ٶلەڭدەردٸ وقىرمان نازارىنا ۇسىنعاندى جٶن كٶرٸپ وتىر.
قايدا ۇشتىڭ?
بايقاتىپ بٸر سۇمدىقتىڭ باستالعانىن,
قايدا ۇشتىڭ, قارا باۋىر قاسقالداعىم?
سەن ەدٸڭ ارقا سٷيەر ارتىمداعى,
قاشالعان قارا ٶلەڭنەن تاس قورعانىم.
قايعىنىڭ قالىڭ بۇلتى ەلٸ قاپتاپ,
جىلجيدى العا قاراي ٶمٸر اتتاپ.
وتىرمىن قارا ٶلەڭدٸ جۇباتا الماي,
جىلاعان داۋىس ايتىپ, سەنٸ جوقتاپ.
اسقار تاۋ, بايتاق دالاڭ كٷڭٸرەندٸ,
جىلاتىپ جٷرەگٸ بار تٸرٸلەردٸ.
ۇرپاقپەن تابىستىرىپ سەنٸ ٸزدەگەن,
جاسايدى جەتٸم قالعان جىرىڭ ەندٸ...
نەسٸپبەك ايتۇلى
قازاق ەدەبيەتٸندە, پوەزيياسىندا ٶزٸنشە مەكتەپ قالىپتاستىرعان از عانا الىپ اقىنداردىڭ بٸرٸ - ەسەن-عالي شايىر دٷنيەدەن ٶتتٸ دەپ ەستٸپ جاتىرمىز.
ول ٷش تٸلدٸ ەركٸن مەڭگەرگەن پوليگلوت, قارا سٶزدٸڭ شەشەنٸ, ەنتسيكلوپەدييالىق بٸلٸمگە يە, قايراتكەر ازامات ەدٸ. پوەزييادان تىس, پروزا جانرىندا جازعان ورنيتولوگييالىق شىعارمالارىنىڭ جٶنٸ بٸر بٶلەك-تٸن. ٶمٸرٸنٸڭ سوڭىنا دەيٸن "جازۋشى" باسپاسىن باسقارىپ, كٶپتەگەن جاس تالانتتاردىڭ ەدەبيەتكە كەلۋٸنە ٷلكەن ەڭبەك سٸڭٸردٸ, قازاقستان جازۋشىلار وداعىنىڭ باسشىلىق قىزمەتٸندە ابىرويلى ەڭبەك ەتتٸ.
بٸزدٸڭ دە قابىرعامىز قايىسىپ وتىر.
قولدان كەلەر قايران جوق.
ەۋلەتٸنە, تۋعان-تۋىستارىنا, ٶلەڭسٷيەر ەل-جۇرتقا قايعىرا كٶڭٸل ايتامىن.
جۇماقتا نۇرى شالقىعاي!
تىنىشتىقبەك ەبدٸكەكٸمۇلى
***
حوش بول, ارداعىم!
كٷتپەنەن جەردەن ەسەنعالي كەتٸپ قالدى... ونى دا مىنا ٸندەت الىپ كەتٸپتٸ?! قايىرىمسىز سۇم اجال قازاق جىرىنىڭ بٸر قابىرعاسىن سۋىرىپ الدى, -- كٶزٸمٸزدٸ باقىرايتىپ قويىپ!
ادام-اتا--ھاۋ-انادان بەرٸ يٸسٸ قازاقتان بۇعان دەيٸن تۋماعان, ەندٸ قايتا تۋمايتىن اقىن كەلدٸ دە--كەتتٸ! ونىڭ ورىنى ەندٸ قازاق جىرىندا عانا ەمەس, كٷللٸ ەلەمدٸك پوەزييانىڭ تٶرٸندە مەڭگٸ ٷڭٸرەيٸپ تۇراتىن بولادى...
ۇلى مۇحاڭنىڭ (م. ماقاتاەۆ): “تۋادى, تۋادى ەلٸ ناعىز اقىن, ناعىز اقىن بال مەن ۋ تامىزىتىن; جەسٸردٸڭ ايىرىلماس سىرلاسى بوپ, جەندەتتٸڭ كٶزٸنەن جاس اعىزاتىن, -- تۋادى, تۋادى ەلٸ ناعىز اقىن! جىر سٶزدەرٸ جاي بولىپ اتىلعاندا, اتىلعاندا, اسپاننان وقىلعاندا, مىلقاۋلارعا تٸل بٸتٸپ, كەرەڭ ەستٸپ, جانار پايدا بولادى سوقىرلارعا!” - دەگەن اقىنى وسى ەدٸ عوي?!
حوش بول, ارداعىم!
ارقاسىندا ۇلتتىق رۋحى شىمىرلاعان قازاق بالاسىنىڭ بەرٸنە ازا تۇتىپ, كٶڭٸل ايتامىن!
***
تەرٸسٸنە تەر سٸڭبەي,
و دا كەتتٸ مىنا جەردٸ جەرسٸنبەي.
بٸزدٸڭ ەل دە قىزىق ەل عوي, جٷرەتٸن
جەتەسٸزٸ– جەتەلٸسٸن تەڭسٸنبەي!
كەتتٸ ول…
قۇسىن تالاي قيماي ۇزاتقان,
قار جاستانىپ, تٷسكەن نە بٸر مۇزارتتان.
جٷرە بەرمەي كٶرٸنگەنمەن ۇستاسىپ,
(جولى بولعاي!),
كەتٸپ قالدى بۇ جاقتان.
سوندا وتىر عوي الاشىڭنىڭ اسىلى.
الشىسىنان تٷسٸپ كٷندە اسىعى.
وندا ميىن اشىتاتىن ەشكٸم جوق,
وسىندا عوي دٷنيەنٸڭ پاسىعى?
ساسىعى…
سىڭعىرلاعان سيقىرلى ونىڭ كٷي– ٸشٸ,
پەرٸشتە مەن پەرٸشتەنٸڭ سٷيٸسٸ!
كەلمەيدٸ عوي بٸزدٸڭ مىنا مۇرىنعا.
و جاقتاعى ۇجماقتىڭ يٸسٸ?
كٶپ ەل بٸزدە دەمەلٸ سول ۇجماقتان,
ماعجاندارىن ٶز قولىمەن ۇزاتقان?!.
…جٷرە بەرمەي بٸر يٸستٸ يٸسكەپ,
مەنٸڭشە, تەز كەتۋ كەرەك بۇ جاقتان.
سەرٸك اقسۇڭقارۇلى
قوش, ەس-اعا!
ايتىلماعان سىر قالدى,
جازىلماعان جىر قالدى.
ايتىپ-ايتپاي نە كەرەك,
كٶتەرٸلمەي كٶلٸنەن
قاسقالداق تەكتەس ۇل قالدى.
"كٶكمويناق" ٶلەڭ شىڭعىرىپ,
قازىعىندا تۇل قالدى.
قالامىنىڭ ۇشىندا,
سەۋلەلٸ تاڭنىڭ تۇسىندا,
ۇيىعان ۋىز نۇر قالدى.
قۇلان شابىس قۇلىنىن,
ومىرتقا بويى جۇلىنىن,
الپىس ٷش جىل قىزىقتاپ
قايران دا قازاق بۇل قالدى.
ەمٸرٸ شىعار اللامنىڭ,
تاعدىرى شىعار تارلاننىڭ,
قايسىڭ بار تۇرار ورنىنا,
قىرداعى قۇبا ارلاننىڭ.
جاراسپاس وعان كٸم دەسەك,
تاپتىرماس ەندٸ ٸزدەسەك.
جاتقاندا بولار قاۋمالاپ,
الدىنان شىعىپ پٸر بەكەت!
بوز جۋسانىڭ كٷيٸندٸ,
بوز بەتەگە يٸلدٸ.
تاعى دا, مٸنە, بٸر ۇلىڭ,
بٶزدەن كٶيلەك كيٸندٸ.
اي بولىپ كەتٸپ بارادى,
كٷن بولىپ كٷلٸپ قارادى.
قاڭتارداعى بۋراداي,
قايىرتپاي جەلٸپ, جارادى.
قوزىداي ماڭىراپ كٶگەندٸ,
جازدىرار ەمەس ٶلەڭدٸ.
كٶڭٸلٸ قۇرعىر بوساعان
كٶسٸلە بەرمە كٶپ ەندٸ.
قاناعات تٷبٸ - قايىر-دى,
شىدامنىڭ تٷبٸ - شٷكٸر-دٸ.
سابىر ەت, ەلٸم, سابىر ەت,
تۇياعى كٸمنٸڭ بٷتٸن-دٸ.
جامانات حابار جايىلدى,
جاي تٷسكەندەي مايىردى.
بٸر قارانار جٷك ارتقان,
بٸزدەن كٶشٸن ايىردى.
كٷن اۋىستى تٷنمەنەن,
تٷن اۋىستى كٷنمەنەن.
بٸز كٶرگەن جەردە قازاق جوق:
"ەسەنعالي كٸم?!.." دەگەن.
سابىر اداي
جالعاننان ەسەنعالي اعام كٶشتٸ!
ول داعى نار قۇلجاداي اران كەشتٸ!
پٸر بەكەت, اباي-ەرۋاق ەرتٸپ كەلگەن
جەتەكتەپ جٷرە بەردٸ تەمام كٶشتٸ...
ۋا, كٶشتٸ!
كٶشتٸ دەيمٸن ەسەن اعام,
سۋميىپ قالا باردى كٶسە-عالام...
نە ايتا الام, كٶكمويناق-جىر تٷن ٸشٸندە,
كٸسٸنەپ: "يەم قايدا?" - دەسە ماعان?..
ٶتكەندە ەڭ سوڭعى رەت سٶيلەسكەندە: "سەۋٸردٸڭ ورتاسىندا ماڭعىستاۋعا جەتەم عوي", - دەپ ەدٸ. ەتەگٸن جابا سالا قۇدايدى جىرلاپ كەلگەن شايىردىڭ اۋزىنا تەڭٸر-تاعالا سالعان ەكەن عوي...
باياعى بوزبالا شاعىڭدا سوناۋ سىر بويىندا جٷرٸپ: "انام ماعان ايتادى ماڭعىستاۋىن, 360 ەۋليە كٷڭٸرەنگەن", - دەپ جىرلاپ ەڭ, ماڭعىستاۋىڭ كٷڭٸرەنٸپ جاتىر تاڭ اتقالى...
سەن كٶكتەم سايىن ٶلەردەي ساعىنىپ قاۋىشاتىن قۇستار جەتٸم قالدى عوي, اعا-جانىم-اۋ! ورنىڭدى سيپاپ قالدى عوي, جان-كٶكەم-اۋ!
تاڭ اتقالى اعا-باۋىر, قارىنداستارىڭ ەڭٸرەنٸپ كەتتٸ, ەس-اعا! يران-عايىپ, نەسٸپبەك دەۋتاي, اقسۇڭقارۇلى كٶكەلەرٸڭ, تىنىشتىقبەك, شەكيزادا, ەرتاي, عالىم جايلىباي زامانداستارىڭ, گٷلنەر, جانات, گٷلٸماي, ەلييا, باقىتكٷل قارىنداستارىڭ, سەرسەن, باۋىرجان, دەۋرەن, مارالتاي, اۋىت, ەنۋار, جانات, ەربول ٸنٸلەرٸڭ كٶز شولالارى جاسقا تولىپ, كٶڭٸل-شارامدى تەلەگەي-تەڭٸز قىلدى! سول تەڭٸزدٸڭ ٷستٸندە اققۋشا سامعاپ سەن ۇشىپ باراسىڭ, ەس-اعا! كەلمەي قويعان كٶكتەمنٸڭ, كەشٸككەن قۇستارىڭنىڭ الدىنان قارسى الۋعا اتتاندىڭ با?..
باقۇل بول! اتاڭ بەكەتتٸڭ شاپاعاتىندا بول! نە دەيٸن باسقا...
سۆەتقالي نۇرجان
***
اق كەمەدەي اقشا بۇلتقا شىم باتقان
ٶتتٸ ەساعام, كەتتٸ ٶلەڭ…
بٷگٸن ماعان قارا حابار تىڭداتقان
تەلەفوندى جەك كٶرەم!
جەك كٶرەمٸن,
جاعدايىم جوق ۇعاتىن
اياپ, كٶڭٸل ايتقاندى,
اقىندارعا قازاناما شىعاتىن
گازەتتەر مەن سايتتاردى.
«كٶز جاسىڭدى تٶگە بەرمە سەن ەندٸ…»
جۇباتادى كەرٸ ٸڭٸر.
جازباسىنشى «اقىن ٶلدٸ» دەگەندٸ,
وقىمايمىن بەرٸبٸر…
ٶزٸمدٸ الداپ, ٶتٸرٸكپەن دوستاسىپ,
مەن وتىرمىن تٷن ٸشٸپ.
بٸر قىزعالداق باعبانىمەن قوشتاسىپ,
جىلاپ جاتىر بٷرٸسٸپ…
ٶمٸر سولاي مەڭگٸلٸككە بۇرىلماق,
قالعانى – تەك بوس ۇران.
قۇس اتاۋلى قونا الماي جٷر شىرىلداپ,
ايىرىلىپ دوسىنان…
گٷلنەر سالىقباي
ەسەنعالي قايتقاندا
قىزىل شوقتاي جانىپ جاتىر ٸش تٸپتەن...
مەن اسپاننىڭ اھ ۇرارىن بٸلەمٸن,
جىلاعانىن كٶردٸم ەندٸ قۇس بٸتكەن.
جەتكەن شايىر مىرزاشٶلدٸڭ تٶسٸنەن -
ەي, ۇلى جىر, ارتىق تۋعان نەسٸبەڭ!
ەسەنعالي دەگەن دەگدار قازاقتىڭ
ريازاندىق ەسەنيننەن نەسٸ كەم!
جٷرەگٸندە جاتقان جايلاپ جٷز بارىس,
ويحوي, قايدام..!
ونداي ايبار بٸزگە الىس.
داڭقىڭا ەشكٸم تالاسالماس تٸرٸدە,
ٶلٸمٸڭنٸڭ ٶزٸ اقىنعا - قىزعانىش.
كٶشەسٸندە سان قارالى سٶز ٶرٸپ,
الماتىنىڭ جالىن اتار ٶزەگٸ.
نەگە ٷنسٸزسٸڭ?!
"تٸلٸڭ عانا بايلانعىر!"
جىلا, جىلا, شەرلٸ ەسەنتاي ٶزەنٸ!
بوزدا, بوزدا, سىڭار ٶركەش كەر ٷلەك!
(بٸز دە سەندەي سوردان ٶنگەن ٶمٸر ەك...)
بارا جاتىر كەلٸنتٶبە ٷستٸندە
اي ماڭىراپ, جەتٸم جۇلدىز مٶڭٸرەپ...
سەن دە جىلا, باۋىرى تاس قاسٸرەت,
ماڭدايىما تامسىن كٶزٸڭ جاسى كەپ.
مەنٸڭ تاڭعى تٷسٸمە ەنەر مە ەكەنسٸڭ,
ۋا, قارا ٶلەڭ! "...باسى جوق..."
قۇمدى سٷيدٸ, قاناتتىنى ۇناتتى,
مىڭ ٶكسٸدٸ, مىڭ بۋلىقتى, مىڭ اقتى.
بٸزدٸ قويشى, ۇمىتشاقتاۋ پەندەمٸز,
جۇباتامىن قۇسىن قالاي جۇماقتىڭ?!
ەستەلٸك ايتقىم كەلمەيدٸ. ەسەڭگٸرەپ قالعان كٶڭٸلگە ەشتەڭە جۇبانىش بولمايتىنداي. ەكەمنٸڭ قازاسىنداي اۋىر. اسپان الاسارعانداي, قارا جەر تەڭسەلگەندەي. كٶڭٸل سەنبەيدٸ, جٷرەك قان جىلايدى...
مىنا ٶلەڭدٸ وسىدان بٸر اي بۇرىن ۋاتساپتان جٸبەرگەن-دٸ. "جاڭا عانا بٸتٸردٸم, وقىپ كٶرشٸ. بٸراق ەشقايدا جارييالاما, ويىڭدى ايتارسىڭ" دەدٸ. جاڭا ٶلەڭ جازسا وقىپ بەرەر امانحان دوسى دا جوق, وسى بەر سەتتٸ بٶلٸسەر جان ٸزدەگەن شىعار دەپ توپشىلاعام. كومپيۋتەرگە تەرٸپ, سۋرەتكە تٷسٸرٸپ جٸبەرٸپتٸ. كەيٸن ٷستٸنەن تاعى بٸر قارايتىنىن دا ايتتى.
قازٸر قايتارا وقىپ وتىرسام, قۇددى بٸر قوشتاسۋ جىرىنداي, سوڭعى ٶلەڭٸندەي سەزٸلەدٸ. بەلكٸم راسىندا سوڭعى ٶلەڭٸ مە?!
ۇزىن-ۇزىن كٶش كەلەر,
ۇزىن شۇباپ بوس كەلەر.
تىرنالار-اي,
قيقۋ سالىپ تارتتىڭدار قىرعا قاراي.
سەل ەرتەرەك جەتسەڭدەر قايتەر ەدٸ,
مىناۋ بايعۇس جٷرەكتٸ جۇلمالاماي.
تىرنالار-اي, ۋىز بوپ تۇنعان ەن-اي.
مەن اڭعارماي كەلەمٸن جىلدا قالاي,
ايانىشتى مىنا ٶمٸر ھەم اياۋلى,
تالدان تاياق تايانعان "بٸر بالاداي".
بيلەي كەلسٸن بۇل كٶكتەم تويلاي كەلسٸن.
ەرتەڭ تويدى قويادى ول, قويماي كٶرسٸن.
مەڭگٸ بٸرگە بولامىز دەپ تۇر قازٸر,
سەنەدٸ دەپ ويلايدى, ە?
ويلاي بەرسٸن.
كٶكتەمەنٸڭ شىن اتى ارمان-ەلەس.
كەتەدٸ ول دا, قاسىمدا قالماق ەمەس.
سٷيەم جالعان ەكەنٸن بٸلە تۇرا,
نە بار ٶزٸ دٷنيەدە جالعان ەمەس.
شەرحان تالاپتىڭ جازباسىنان
سۋىق حابار
اجالدا قاقپان دا بار, قۇرىق تا بار,
سۋ ەمەس ويپاڭ جەردە تۇرىپ قالار.
تاڭ اتپاي تۋ تالاقاي تاراپ جاتتى,
ەس-اعام كەتتٸ دەگەن سۋىق حابار.
سەۋٸردٸڭ سەۋكەلەلٸ اق تاڭىندا,
شىنىمەن مەڭگٸ ۇيقىعا باتقانىڭ با?
قۇستارىڭ قونا الماستان شىرىلداپ جٷر
ازالى الماتىنىڭ باقتارىندا.
سەۋلەسٸ سولعىن تارتىپ جارىقتىڭ دا,
جازا الماي سوڭعى جىردى جانىقتىڭ با?
اقسٷيەك امانحانىڭ كەتكەننەن سوڭ
جالعاننىڭ جارماعىنان جالىقتىڭ با?
تەڭسەلتٸپ تەكتٸ جىردىڭ تۇنىق كٶلٸن,
سەن كەتتٸڭ, قالام قالدى بٷگٸپ بەلٸن.
سۇڭقارداي سىڭارىنان ايىرىلعان,
ٶزٸڭدٸ جوقتاپ جاتىر ۇلىقبەگٸڭ.
بولعاندا ٶرمەگٸ سۇم, ٶڭٸ سايتان,
كٷشەيگەن مىنا دەرتتٸڭ كٶنٸ قايقاڭ.
قاناتى قاپەلٸمدە قايىرىلعان,
قايعىرىپ, قارا ٶلەڭگە كٶڭٸل ايتام!
ەلٸبەك شەگەباي
قۇس جولىمەن قايتتى اقىن
سەۋٸر بولدى, تەۋٸر بولدى دەمەسپٸن,
الدانبايمىن, الداماسىن مەنٸ ەشكٸم.
جٷرەگٸمدە جىر جىلايدى بٷگٸندە,
كٶڭٸلٸمدە بۇلدىرايدى ەلەس كٷن.
قاپالاندىم بۇل كٶكتەمدٸ تٷسٸنبەي,
تۋعان جەرگە ورالمادى قۇسىم كەي.
ٶكسٸپ-ٶكسٸپ ٶلەڭ قالدى-اۋ بٸر شەتتە,
جان ادامعا قاجەتٸ جوق مٷسٸندەي.
ٶزەكتٸ ٶرتەر ٶرتتەي لاۋلاپ تٷستٸ ٸڭٸر,
قارا جەردەن كٶككە قاراي ۇشتى نۇر.
جەتٸمسٸرەپ مەن دە قالام تٷن كەشٸپ,
بۇلتتان ارى سامعاي بەرسٸن قۇس-عۇمىر.
بٸزدٸڭ باسقا قايتا قونسا قاشقان باق,
جاڭا بٸر ساز كٶل بەتٸنەن باستالماق.
جالقى دەۋرەن قانات قاقتى مۇنارتىپ,
ول ەندٸ ۇزاپ بارا جاتىر اسپانداپ.
قايران اعام - قارا باۋىر قاسقالداق!
اسىلبەك جاڭبىرباي
***
قايدان بٸلەيٸن,
عۇمىردا بٸر سەت قۋاندى ما, ەلدە كەيٸدٸ مە,
قانا الدى ما ەلدٸڭ مەيٸرٸنە?!
ەرتەمەن ايتىپ,
ەبٸل دە دەبٸل ەتكەنٸڭ نەمەنە بٸزدەردٸ,
ەسەنعاليى جوق, ەي, دٷنيە?!
بٸز جىلاعاندا سەن ورامالىڭدى الىپ جەتپەپ پە ەڭ,
ٶتكەن تٷن قالاي تەككە ٶتكەن?!
ەبٸل دە دەبٸل ال, جىلا ەندٸ,
ال, جىلا,
ەسەنعاليى جوق كٶكتەم!..
ەسەنعاليى جوق الماتى!
شۋلا قايىڭدار,
جىر تٸلەپ,
شۋلاڭدار تاۋلار, دٷنيەنٸڭ جانىن سٸلكٸلەپ,
قايسىڭا بارىپ كٶڭٸل ايتايىن,
بەۋ, دٷنيە-اي,
ٶلەڭنەن بٷگٸن قۇستار ۇشادى دٷركٸرەپ!
ٶلەڭنەن بٷگٸن قۇستار ۇشادى قاڭقىلداپ,
اسپاندايدى ولار داڭقىڭدى اپ,
...قارايلاۋمەنەن قالعان دا ٶمٸر ٶتەدٸ-اۋ, كٶكە,
ەندٸ بۇل,
قايسىبٸر تۇستان شىعا كەلەر دەپ جارقىلداپ...
ەرلان جٷنٸس
ازا-ناما
ەساعام دا كەتتٸ ٶمٸردەن,
ٶمٸر سەندە نە قالدى?
بٸزدٸ قويشى, جۇبانارمىز, كەلگەن قۇسقا وبال-دى.
بٸر تاقسٸرەت تٷس ەكەن بۇل,
دٷنيەنٸڭ الدىنان,
التىن دەپتەر, كٷمٸس قالام جوعالدى.
قۇس بٸتكەننٸڭ جوقتاۋ ەنٸ – كٶك الا اسپان,
قارا جەر –
قارا جەردە قارالى كٶش, قارالى ەل.
قۇستىڭ پٸرٸ – ەسەنعالي –
قۇس سەكٸلدٸ بەيكٷنە,
قۇس سەكٸلدٸ جارالى ەر,
قايدا كەتتٸڭ, قۇس بٸتكەندٸ سىڭسىتىپ,
تٷس كٶرٸپ ەم, تٷسٸم مەنٸڭ شىم-شىتىق.
قايدا كەتتٸڭ, ماڭقىستاۋدى كٷرسٸنتٸپ,
ىرشىعىڭنىڭ اششى جاسىن ىرشىتىپ.
قۇس تۇمسىقتى قالامىڭا تۇنىپ قالدى سىيا مۇڭ,
بوزتورعايى بوزداپ قالدى كەۋدەمدەگٸ ۇيانىڭ.
دومبىرامنىڭ شەگٸ ٷزٸلگەن سەكٸلدٸ,
كٷمبٸرلەپ كەپ, كٸلت ٷزٸلدٸ كٷي اعىن.
دوستارىڭا كٶڭٸل ايتام, قۇس كٶڭٸلٸ قارالى,
قازاعىڭا كٶڭٸل ايتام, جانى دا ونىڭ جارالى.
قۇس بٸتكەندٸ امان-ەسەن الماتىعا قوندىرىپ,
قۇستىڭ پٸرٸ – ەسەنعالي, ٶزٸ ۇشىپ بارادى...
جانات جاڭقاشۇلى
***
قازٸر جاڭبىر تٶگەدٸ قارا دا تۇر,
كٶز جاسىنا مالشىنىپ دالا دا, قىر.
ەۋەنٸنەن جاڭىلىپ قۇس بٸتكەن كەپ,
قيقۋ سالىپ ەر تۇستا قالادى اقىر.
تۇر عوي ەزٸر تٷك سەنبەي, شەرگە ەزٸلمەي,
شىن اقىن-دى الماتى ول دا ٶزٸندەي.
سەلدەن كەيٸن الاتاۋ ٶكسٸپ باستار,
قوس يىعى سەلكٸلدەپ ەڭگەزەردەي.
ٶكٸنٸشكە سەنبەدٸ ول ەل-ەزٸر,
قامسىز تۇر-اۋ, قايران قاپ, قالا قازٸر.
سەلدەن كەيٸن ٶكٸرٸپ قويا بەرەر,
جوقتاۋ ايتىپ,
تٶگٸلتٸپ دالاعا جىر.
سۇرعىلت بوياپ قالانى, تاۋدى بٸر ٶڭ,
سەڭدەي سوعىپ, باۋرىمداپ بارلىعىمەن,
اق جاڭبىرعا مالشىنىپ,
سەندەلەرمٸز
سەۋٸردٸڭ جاڭبىرىمەن,
اباي داڭعىلىمەن…
اسىلان تٸلەگەن
