نۇر-سۇلتان قالاسىنىڭ ۇلى دالا كٶشەسٸ مەن قابانباي باتىر داڭعىلى قيىلىسىنداعى جول اپاتىنا سەبەپكەر بولىپ, قازا تاپقان اۆتوبۋس جٷرگٸزۋشٸسٸ ماس بولماعان, جولعا شىعار الدىندا دەنٸ ساۋ بولاتىن, دەپ حابارلادى "استانا LRT" اق باسپاسٶز قىزمەتٸ.
"راستالعان دەرەكتەرگە سٷيەنسەك, 1966 جىلى تۋعان اۆتوبۋس جٷرگٸزۋشٸسٸ جول اپاتى كەزٸندە ماس بولماعان, قوعامدىق كٶلٸكتٸ ايداپ كەلە جاتىپ ۇيالى تەلەفون پايدالانباعان. جەلٸگە شىعار الدىندا جٷرگٸزۋشٸنٸڭ جاعدايى قاناعاتتاندىرارلىق ەدٸ (قان قىسىمى 110/70), ول مەديتسينالىق تەكسەرۋدەن ٶتكەننەن سوڭ عانا كٶلٸكتٸ جٷرگٸزۋگە رۇقسات الدى", - دەپ حابارلادى "استانا LRT" باسپاسٶز حاتشىسى ناۋات ازانباەۆا.
ونىڭ ايتۋىنشا, جەلٸگە شىعار كەزدە اۆتوبۋستا ەشقانداي اقاۋ بولماپتى, تەحنيكالىق تالاپتارعا ساي بولاتىن.
ەسكە سالا كەتسەك, بٷگٸن نۇر-سۇلتان قالاسىندا ٷش اۆتوبۋس, جەدەل جەردەم كٶلٸگٸ جەنە جەڭٸل كٶلٸك جانتٷرشٸگەرلٸك اپاتقا ۇشىرادى. وقيعا سالدارىنان 53 جاستاعى اۆتوبۋس جٷرگٸزۋشٸسٸ مەن 26 جاستاعى جولاۋشى قىز قازا تاپقان. تاعى 27 جولاۋشى زارداپ شەكتٸ.
