قر ەنەرگەتيكا مينيسترٸ نۇرلان نوعاەۆ بەينەبايلانىس ارقىلى ٶتكەن تمد ەلدەرٸ ەلەكتر ەنەرگەتيكاسى كەڭەسٸنٸڭ وتىرىسىنا قاتىستى, دەپ حابارلايدى "ۇلت اقپارات" قر ەنەرگەتيكا مينيسترلٸگٸنٸڭ باسپاسٶز قىزمەتٸنە سٸلتەمە جاساپ.
نۇرلان نوعاەۆ ٶز بايانداماسى شەڭبەرٸندە كەڭەس قاتىسۋشىلارىن قازاقستاننىڭ ەلەكتر ەنەرگەتيكاسى سالاسىنداعى سوڭعى ٶزگەرٸستەرٸمەن تانىستىردى. اتاپ ايتقاندا, 2020 جىلدىڭ جەلتوقسانىندا قازاقستان قابىلداعان «ەلەكتر ەنەرگەتيكاسى تۋرالى» زاڭعا ەنگٸزٸلگەن ٶزگەرٸستەر جٶنٸندە ايتىپ بەردٸ. تٷزەتۋلەر شەڭبەرٸندە گەنەراتسييانىڭ مانەۆرلٸك رەجيمٸ بار گەنەراتسييالايتىن قوندىرعىلاردىڭ قۇرىلىسىنا اۋكتسيوندىق تەتٸك ەنگٸزٸلدٸ.
«بيىلعى جىلدىڭ جەلتوقسانىندا قۋاتى شامامەن 1000 مۆت بولاتىن ەلەۋەتٸ جوعارى جوبالار بويىنشا اۋكتسيوندىق ساۋدا-ساتتىق ۇيىمداستىرۋ جوسپارلانىپ وتىر», دەپ اتاپ ٶتتٸ قر ەنەرگەتيكا مينيسترٸ نۇرلان نوعاەۆ وتىرىس بارىسىندا.
سونداي-اق ەنەرگەتيكا مينيسترٸ 2021 جىلدىڭ سوڭىنا دەيٸن جەك قۋاتىن اعىمداعى 1800مۆت-تان 2100 مۆت-قا دەيٸن ارتتىرۋ بويىنشا قازاقستاننىڭ جوسپارلارى تۋرالى حابارلادى.
قر ەنەرگەتيكا مينيسترٸ ن. نوعاەۆتىڭ ايتۋىنشا, 2020 جىلى قازاقستاندا ەلەكتر ەنەرگەتيكاسىن ٶندٸرۋ 108 ملرد كۆت/ساع. قۇرادى, ال 2021 جىلدىڭ قورىتىندىسى بويىنشا 109 ملرد كۆت/ساع. ٶندٸرۋ كٷتٸلۋدە.
وتىرىس شەڭبەرٸندە ٷيلەستٸرۋ كەڭەسٸ تۋرالى ەرەجە, تمد ەلدەرٸنٸڭ ەلەكتر ەنەرگەتيكاسى كەڭەسٸنٸڭ رەگلامەنتٸ بەكٸتٸلدٸ, تمد ەلدەرٸ ەلەكتر ەنەرگەتيكاسى كەڭەسٸنٸڭ 2020 جىلعا ەسەبٸ تىڭدالدى, ەلەكتر ەنەرگەتيكاسى كەڭەسٸنٸڭ 2021 جىلعا ارنالعان ٸس-شارالار جوسپارى ٶزەكتەندٸرٸلدٸ.
