فوتو: Reuters
Netflix ستريمينگ قىزمەتٸ ۋيلل سميت "وسكار" رەسٸمٸندە جٷرگٸزۋشٸ كريس روكتى ۇرىپ جٸبەرگەننەن كەيٸن اكتەر تٷسكەلٸ جٷرگەن Fast and loose كارتيناسىن تٷسٸرۋدەن باس تارتتى, - دەپ حابارلايدى Tengrinews.kz تٸلشٸسٸ The Hollywood Reporter باسىلىمىنا سٸلتەمە جاساپ.
"وسكار" سىيلىعىن تابىستاۋدان بٸر اپتا بۇرىن رەجيسسەر دەۆيد لەيتچ Netflix جوسپارلاعان "فورساج" فيلمٸنٸڭ رەجيسسەرٸ بولۋدان باس تارتقان ەدٸ. وندا ۋيلل سميت باستى رولدە وينايدى. ونىڭ ورنىنا Fall Guy-گە اۋىستى. Universal تٷسٸرەتٸن بۇل فيلمدە رايان گوسلينگ باستى رولدە, تٷسٸرٸلٸم تامىزدا باستالۋى كەرەك.
وسىلايشا Netflix شۇعىل تٷردە "وسكار" يەگەرٸ وينايتىن كينوكارتيناعا باسقا رەجيسسەر ٸزدەيدٸ. بٸراق اكتەردٸڭ ماراپاتتاۋ رەسٸمٸندەگٸ قىلىعىنان كەيٸن Netflix جوبانى ىسىرىپ قويدى.
قازٸر سميت تٷسكەن Apple+ ستريمينگ قىزمەتٸنٸڭ "ەمانسيپاتسييا" دراماسى پوستپروداكشن ساتىسىندا. فيلم 2022 جىلعا جوسپارلاعان ەدٸ, بٸراق ناقتى قاشان شىعاتىنى بەلگٸسٸز. Apple تٷسٸنٸك بەرۋدەن باس تارتتى. "پلوحيە پارني 4" فيلمٸ دە توقتاپ تۇرۋى مٷمكٸن. دايىندىق كەزەڭٸندەگٸ بٸرنەشە باسقا جوبالار دا تٷسٸرٸلٸمدٸ ىسىرىپ قويۋى مٷمكٸن.
ەسكە سالايىق, "وسكار" رەسٸمٸندە اكتەر كريس روكتى ەيەلٸ دجادا پينكەتت-سميت تۋرالى ەزٸلٸ ٷشٸن شاپالاقپەن ۇرىپ جٸبەردٸ. كوميك ساحنادا پينكەتت-سميتتٸڭ شاش ٷلگٸسٸ تۋرالى ايتقان بولاتىن. ول اۋرۋعا شالدىعىپ, بٸر جىل بۇرىن شاشىن الىپ تاستاعان. كەيٸن ۋيلل سميتتٸڭ ٶزٸ "وسكار" كەشٸندەگٸ مٸنەز-قۇلقى ٷشٸن كەشٸرٸم سۇرادى.
