"اقتٶبە تايمس" باسىلىمىنىڭ جۋرناليستەرٸ نۇرسۇلتان نازارباەۆتىڭ بۇعان دەيٸن ەش جەردە جارييالانباعان سۋرەتٸن تاۋىپ الدى.
سۋرەت اقتٶبە وبلىستىق كومسومول كوميتەتٸنٸڭ بٸرٸنشٸ حاتشىسى مارقۇم ٷكەتاي بايجومارتوۆتا ساقتالىپتى. كٶپ جىلدار بۇرىن بايجومارتوۆ حەلسينكيدەگٸ جاستار مەن ستۋدەنتتەر فورۋمىنا قاتىسقان, وعان بولاشاق پرەزيدەنت تە بارعان ەكەن. بۇل نۇرسۇلتان ەبٸشۇلىنىڭ شەتەلگە تۇڭعىش شىققان كەزٸ دەلٸنەدٸ.
دەلەگاتتاردىڭ مەسكەۋلٸك "يۋنوست" قوناقٷيٸنٸڭ ۆەستيبيۋلٸندە, فەستيۆال پويىزىندا بولعانى, كەيٸن تەپلوحودپەن حەلسينكيگە جەتكەنٸ بەلگٸلٸ. بۇل تۋرالى كينوقۇجاتتار ساقتالىپتى.
«سوعان قاراعاندا, بۇل سۋرەتتەر فەستيۆال پويىزىنىڭ الدىندا تٷسٸرٸلگەن», - دەيدٸ جۋرناليست, «شىعىس اقپارات» مەدياحولدينگٸنٸڭ جەتەكشٸسٸ مۇرات بٷلدەكباەۆ.
«مىناۋ ەسكەرتكٸش سۋرەتتە ٷكەتاي بايجومارتوۆتى, ونىڭ قاسىندا ەبساتتار بٷلدەكباەۆتى, ولاردىڭ الدىندا ەلٸمٸزدٸڭ بولاشاق پرەزيدەنتٸ نۇرسۇلتان نازارباەۆتى كٶرٸپ وتىرمىز»,- دەپ جازادى باسىلىم.
