قازاقستان رەسپۋبليكاسىنىڭ تۇڭعىش پرەزيدەنتٸ – ەلباسى نۇرسۇلتان نازارباەۆ قازاقستاندىقتاردى العىس ايتۋ كٷنٸمەن قۇتتىقتادى, دەپ حابارلايدى "ۇلت اقپارات" ەلباسىنىڭ رەسمي سايتىنا سٸلتەمە جاساپ.
"قىمباتتى وتانداستار!
العىس ايتۋ كٷنٸ قازاقستان حالقىنىڭ بٸرلٸگٸن پاش ەتەدٸ, مەيٸرٸمدٸلٸكتٸڭ, ٶزارا كٶمەك پەن جاقسىلىقتىڭ جارشىسى بولىپ سانالادى.
كٶكتەمنٸڭ العاشقى كٷنٸندە – تٸرشٸلٸك اتاۋلى جاندانىپ, جەر-دٷنيە جاڭاراتىن كەزەڭدە اتاپ ٶتٸلۋٸ بۇل مەرەكەگە ەرەكشە سەن بەرەدٸ.
بٷگٸن بٸز قازاق حالقىنىڭ رۋحاني ەرلٸگٸ مەن ەلٸمٸزدەگٸ بارلىق ەتنوستاردىڭ باسىنا تٷسكەن اۋىر سىناقتاردى ەسكە الىپ قانا قويماي, كەلەشەككە زور سەنٸممەن قارايمىز. قازاقستان قوعامىنىڭ كەلٸسٸمٸ مەن تاتۋلىعى – سول جارقىن بولاشاقتىڭ بەرٸك ٸرگەتاسى.
كوروناۆيرۋس پاندەميياسىنا تويتارىس بەرۋ كەزٸندە دە بٸزدٸڭ بٸرلٸگٸمٸزدٸڭ ماڭىزى ايقىن كٶرٸندٸ. قازاقستاندىقتار مەملەكەتٸمٸزدٸڭ تۇراقتى دامۋىنا قاۋٸپ تٶندٸرگەن جاھاندىق سىناققا ەل بولىپ جۇمىلا قارسى تۇردى.
تەۋەلسٸزدٸكتٸڭ 30 جىلدىعىندا ٶرلەۋ مەن ٶركەندەۋگە باستايتىن جول ادامگەرشٸلٸكتٸڭ اينىماس قاعيدالارىنا, تولەرانتتىلىق پرينتسيپتەرٸنە, تٶل تاريحىمىزعا قۇرمەت پەن ورتاق وتانىمىز – قازاقستان رەسپۋبليكاسىنا دەگەن سٷيٸسپەنشٸلٸككە نەگٸزدەلەتٸنٸن تاعى بٸر مەرتە ايعاقتاپ وتىرمىز.
بارلىق قازاقستاندىقتاردى العىس ايتۋ كٷنٸمەن شىن جٷرەكتەن قۇتتىقتايمىن!
بارشاڭىزعا مول يگٸلٸك, مىقتى دەنساۋلىق, تىنىشتىق پەن باق-بەرەكە تٸلەيمٸن!" - دەلٸنگەن ەلباسى قۇتتىقتاۋىندا.
.jpeg)