ۇلتتىق كەڭەستٸڭ التى ايلىق جۇمىسى قورىتىندىلانعان جيىندا ۇلتتىق كەڭەس مٷشەسٸ مۇرات ەبەنوۆ ٶڭٸرلەردەگٸ قوعام مەن بيلٸك اراسىنداعى ديالوگقا باعا بەردٸ, دەپ حابارلايدى قازاقپارات.
«ۇلتتىق كەڭەستٸڭ ەرەكشەلٸگٸ – قوعامدى تىڭداي بٸلۋ, قوعامدا بولىپ جاتقان جاعدايدى دۇرىس باقىلاپ, ٷنٸن ەستٸپ, سوعان قاتىستى شارا قابىلداۋ دەسەك, ورتالىق دەڭگەيدە بۇل مەحانيزم جۇمىس ٸستەۋدٸ باستادى. ال بٸراق ٶڭٸرلٸك دەڭگەيدە قوعام مەن بيلٸكتٸڭ ورتاسىندا دۇرىس قارىم-قاتىناس جوق. كەشە عانا جامبىل وبلىسىنا بارعاندا بايقاعانىمىز - جەرگٸلٸكتٸ بيلٸك ازاماتتاردىڭ ٷنٸن ەلٸ تولىق ەستٸپ وتىر دەپ ايتا المايمىز. الدىن الا ەرتٷرلٸ سيگنالدار بولعانىمەن, وعان قاتىستى شارا قابىلداۋ مەسەلەسٸ كەشٸكتٸرٸلگەن», - دەدٸ مۇرات ەبەنوۆ ەۋرازييالىق ينتەگراتسييا ينستيتۋتىنداعى «ۇلتتىق قوعامدىق سەنٸم كەڭەسٸ: تالدامالىق زەردەلەۋ» اتتى ساراپتامالىق باياندامانىڭ تانىستىرىلىمىندا.
ونىڭ ايتۋىنشا, ٶزٸندٸك پٸكٸرٸن ايتا بٸلەتٸن ازاماتتار ۇلتتىق كەڭەسكە كٸرٸپ, حالىقتىڭ پٸكٸرٸن جەتكٸزۋ ارقىلى بيلٸك تيٸستٸ شارالاردى قابىلداپ جاتىر. ەيتسە دە ۇلتتىق كەڭەس مٷشەسٸ دەل وسى تەندەنتسييانى ٶڭٸرلەرگە اپارۋ كەرەك دەپ ەسەپتەيدٸ.
«ٶڭٸرلەردەگٸ جەرگٸلٸكتٸ بيلٸك ٶكٸلدەرٸنٸڭ جۇمىسى بەلسەندٸ بولماعاننان كەيٸن ەرينە, پروبلەما ۋشىعىپ كەتەدٸ. سول سەبەپتٸ ۇلتتىق كەڭەس جۇمىسىنىڭ كەيبٸر مودەلٸن ول جاققا بارىپ وتىرىس ٶتكٸزبەي-اق, جەرگٸلٸكتٸ جەرگە بەرە بٸلۋٸ كەرەك سەكٸلدٸ. مىسالى قازٸر جەرگٸلٸكتٸ ەكٸمدەردٸڭ وسى ۋاقىتقا دەيٸن ەزٸرگە يدەولوگييالىق جۇمىسقا ارالاسپايتىنى بايقالادى. ەكٸمدەر كٶبٸنەسە كەسٸپكەرلٸك نەمەسە شارۋاشىلىق تۇرعىدا ەكونوميكا جاعىن ويلايدى. ال ساياسي ٶزگەرٸستەرگە دايىن ەمەس. سوندىقتان كەيبٸر وقىس وقيعالاردىڭ الدىن الۋ, ادامداردى بٸر-بٸرٸمەن كەلٸستٸرۋ, حالىقتىڭ الدىنا شىعىپ ويىن جەتكٸزۋ پروبلەمالارى بار. سول سەبەپتٸ, مەنٸڭ ويىمشا, ٶڭٸرلەردٸ باسقاراتىن باسشىلار يدەولوگييالىق سالانى ۇمىت قالدىرماۋى كەرەك», - دەيدٸ ول.
