Ulttyq keńestiń alty ailyq jumysy qorytyndylanǵan jiynda Ulttyq keńes múshesi Murat Ábenov óńirlerdegi qoǵam men bilik arasyndaǵy dialogqa baǵa berdi, dep habarlaidy QazAqparat.
«Ulttyq keńestiń ereksheligi – qoǵamdy tyńdai bilý, qoǵamda bolyp jatqan jaǵdaidy durys baqylap, únin estip, soǵan qatysty shara qabyldaý desek, ortalyq deńgeide bul mehanizm jumys isteýdi bastady. Al biraq óńirlik deńgeide qoǵam men biliktiń ortasynda durys qarym-qatynas joq. Keshe ǵana Jambyl oblysyna barǵanda baiqaǵanymyz - jergilikti bilik azamattardyń únin áli tolyq estip otyr dep aita almaimyz. Aldyn ala ártúrli signaldar bolǵanymen, oǵan qatysty shara qabyldaý máselesi keshiktirilgen», - dedi Murat Ábenov Eýraziialyq integratsiia institýtyndaǵy «Ulttyq qoǵamdyq senim keńesi: taldamalyq zerdeleý» atty saraptamalyq baiandamanyń tanystyrylymynda.
Onyń aitýynsha, ózindik pikirin aita biletin azamattar Ulttyq keńeske kirip, halyqtyń pikirin jetkizý arqyly bilik tiisti sharalardy qabyldap jatyr. Áitse de Ulttyq keńes múshesi dál osy tendentsiiany óńirlerge aparý kerek dep esepteidi.
«Óńirlerdegi jergilikti bilik ókilderiniń jumysy belsendi bolmaǵannan keiin árine, problema ýshyǵyp ketedi. Sol sebepti Ulttyq keńes jumysynyń keibir modelin ol jaqqa baryp otyrys ótkizbei-aq, jergilikti jerge bere bilýi kerek sekildi. Mysaly qazir jergilikti ákimderdiń osy ýaqytqa deiin ázirge ideologiialyq jumysqa aralaspaityny baiqalady. Ákimder kóbinese kásipkerlik nemese sharýashylyq turǵyda ekonomika jaǵyn oilaidy. Al saiasi ózgeristerge daiyn emes. Sondyqtan keibir oqys oqiǵalardyń aldyn alý, adamdardy bir-birimen kelistirý, halyqtyń aldyna shyǵyp oiyn jetkizý problemalary bar. Sol sebepti, meniń oiymsha, óńirlerdi basqaratyn basshylar ideologiialyq salany umyt qaldyrmaýy kerek», - deidi ol.
