قازاقستان رەسپۋبليكاسىنىڭ پرەزيدەنتٸ نۇرسۇلتان نازارباەۆ قازاقستاندىقتاردى قۇربان ايت مەرەكەسٸمەن قۇتتىقتادى, دەپ حابارلايدى اقوردانىڭ باسپاسٶز قىزمەتٸ.
«بارشاڭىزدى قاستەرلٸ قۇربان ايت مەرەكەسٸمەن شىن جٷرەكتەن قۇتتىقتايمىن!
قۇربان ايت - يسلامدى جاقسىلىقتىڭ, جاسامپازدىق پەن ٷيلەسٸمدٸكتٸڭ دٸنٸ ەكەنٸن پاش ەتٸپ, كٷللٸ مۇسىلمان قاۋىمىن بەيبٸتشٸلٸك پەن تاتۋلىققا, ٶزارا تٷسٸنٸستٸككە شاقىراتىن قاسيەتتٸ مەيرام.
سونداي-اق, ول - دٸني مەرەكە عانا ەمەس, بارشا ادامزاتتى بٸر-بٸرٸنە كٶمەك قولىن سوزۋعا ٷندەپ, باۋىرمالدىققا باۋليتىن ٷلكەن رۋحاني قۇندىلىق.
بۇل كٷندەرٸ ادامدار جاقىندارىنا اق تٸلەكتەرٸن ارناپ, يگٸ ٸستەر جاساۋعا ۇمتىلادى.
قۇربان ايت الۋان تٷرلٸ كونفەسسييالار مەن ەتنوس ٶكٸلدەرٸ تۇراتىن قازاقستاندا ازاماتتاردىڭ بويىنا ٸزگٸلٸك نەرٸن سەۋٸپ, ولاردىڭ ۇستاناتىن دٸنٸ مەن ۇلتىنا قاراماستان, بٸر-بٸرٸن قادٸرلەي بٸلۋگە زور ىقپال ەتەدٸ. سونداي-اق, رۋحاني تۇتاستىعىمىزدى نىعايتىپ, بٸرلٸگٸمٸزدٸ بەكٸتە تٷسەدٸ.
وسىناۋ جارقىن مەرەكەدە ەربٸر شاڭىراققا باقىت, بەيبٸت ٶمٸر مەن بەرەكە-بٸرلٸك تٸلەيمٸن!
قاسيەتتٸ مەيرامدا شالعان قۇرباندىقتارىڭىز بەن ٸزگٸ نيەتتەرٸڭٸز ساۋاپتان جازىلسىن!
ايت قابىل بولسىن!», - دەلٸنگەن ەلباسىنىڭ قۇتتىقتاۋىندا.
.jpeg)