قر مەملەكەتتٸك قىزمەت ٸستەرٸ جەنە سىبايلاس جەمقورلىققا قارسى ٸس-قيمىل اگەنتتٸگٸ مەملەكەتتٸك قىزمەت سالاسىن باقىلاۋ دەپارتامەنتٸنٸڭ ديرەكتورى راۆيل تٶلەباەۆ مەملەكەتتٸك ورگانداردا قىزمەتكەرلەرگە جۇمىس ۋاقىتىنان تىس ارتىق جۇمىس ٸستەتۋ مەسەلەسٸمەن قالاي كٷرەس جٷرگٸزٸلٸپ جاتقانىن ايتىپ بەردٸ, دەپ حابارلايدى قازاقپارات تٸلشٸسٸ.
«ٶزدەرٸڭٸز بٸلەتٸندەي, مەملەكەت باسشىسى ٶز جولداۋىندا مەملەكەتتٸك قىزمەت ٸستەرٸندەگٸ مەسەلەلەر ايتىلعان بولاتىن. قىركٷيەك-قازان ايلارىندا جٷرگٸزٸلگەن تالداۋ جۇمىستارى كٶرسەتٸپ وتىرعانداي, كٶپتەگەن مينيسترلٸكتەردە بۇل رەتتە مەسەلە كٶپ. سەبەبٸ, مەملەكەتتٸك قىزمەتشٸلەردٸڭ تاراپىنان جۇمىس ۋاقىتىنان تىس جٷكتەمە بارشىلىق. بۇل مەسەلەگە ەلٸ دە اتٷستٸ قارالىپ كەلەدٸ. ۇلتتىق ەكونوميكا, اۋىل شارۋاشىلىعى, دەنساۋلىق ساقتاۋ مينيسترلٸكتەرٸندە جۇمىس ۋاقىتىنان تىس ارتىق اتقارىلار جۇمىس مٶلشەرٸ اۋقىمدى», - دەدٸ سپيكەر تٸلشٸلەردٸڭ سۇراعىنا جاۋاپ بەرە وتىرىپ.
ول سونىمەن بٸرگە, مينيسترلٸكتەردە كومپيۋتەرلەردٸ اۆتوماتتى تٷردە ٶشٸرۋ تەرتٸبٸ ورناتىلعانىمەن, بۇل شارا كٶمەكتەسپەي وتىرعانىن العا تارتادى.
«سونىمەن بٸرگە, مەملەكەتتٸك قىزمەتتە ىڭعايلى كەستە ەنگٸزۋ مەسەلەسٸ دە قارالادى. ياعني, مەملەكەتتٸك قىزمەتشٸلەر اراسىندا ساۋالناما جٷرگٸزە وتىرىپ, اتالمىش كەستەنٸ قىزمەتكەرلەرگە ەنگٸزۋدٸ كٶزدەپ وتىرمىز. ول بويىنشا قىزمەتكەر تاڭەرتەڭ ەرتە جۇمىسقا كەلٸپ, تٷسٸ اس ۋاقىتىن قىسقارتىپ, ەرتە كەلسە ەرتە جۇمىستان شىعا الاتىنداي بولسا دەيمٸز. مەملەكەتتٸك قىزمەتتە بۇل نۇسقانى دا ەنگٸزۋگە تىرىسامىز», - دەيدٸ دەپارتامەنت باسشىسى.
راۆيل تٶلەباەۆتىڭ ايتۋىنا قاراعاندا, ساۋالناما نەتيجەسٸ كٶرسەتكەندەي مەملەكەتتٸك ورگاندارداعى كەيبٸر مەملەكەتتٸك قىزمەتشٸلەر جۇمىسقا ەرتە كەلٸپ ەرتە كەتۋدٸ قولايلى كٶرسە, كەيبٸرٸ جاي كەلٸپ جاي كەتۋدٸ جٶن سانايدى.
«جالپى, ساۋالناماعا بارلىق مەملەكەتتٸك ورگانداردىڭ قىزمەتكەرلەرٸ قاتىسىپ جاتىر. ساۋالناما قازان ايىنى سوڭىندا باستالعان بولاتىن. كەيبٸر مينيسترلٸكتەرلە تٸپتٸ 1000 ساعاتتىق ارتىق جۇمىس انىقتالىپ وتىر», - دەيدٸ ساراپشى.
راۆيل تٶلەباەۆ اتاپ ٶتكەندەي, قىزمەتكەرلەرٸن جۇمىستان تىس ۇستاعان جەنە وسى ٷشٸن ارتىق اقى تٶلەمەگەن باسشىلىق ٷشٸن ەكٸمشٸلٸك جاۋاپكەرشٸلٸك قاراستىرىلعان.
ەسكە سالا كەتسەك, مەملەكەتتٸك قىزمەتشٸلەردٸڭ قۇقىقتارىن ساقتاۋ ٷشٸن مينيسترلٸكتەردە جۇمىس كومپيۋتەرلەرٸن ساعات 18.30-دا اۆتوماتتى تٷردە سٶندٸرۋ جٷيەسٸ ەنگٸزٸلگەنٸمەن, بۇدان بىلاي مەملەكەتتٸك قىزمەتشٸلەر جۇمىستى ۇزارتۋ مٷمكٸندٸگٸنە يە بولىپ وتىرعانىن جازعان ەدٸك.
