فوتو: instagram.com/elnurbeisenbai
دەپۋتات ەلنۇر بەيسەنباەۆ 14 اقپاندى تويلاۋعا تىيىم سالۋدى تالاپ ەتٸپ وتىر. ول وسىدان 19 جىل بۇرىن “ۆالەنتينكالاردى” (اشىق حات) ٶرتەپ جٸبەرۋ تۋرالى ۇسىنىس ايتقان, دەپ حابارلايدى "ۇلت اقپارات" Stan.kz اقپارات اگەنتتٸگٸنە سٸلتەمە جاساپ.
ول كەزدە ەلنۇر بەيسەنباەۆ الماتىلىق "بولاشاق" جاستار ۇيىمىنىڭ جەتەكشٸسٸ بولعان ەدٸ. دەپۋتات ەۋليە ۆالەنتين كٷنٸنە قاتىستى ويى ەلٸ دە ٶزگەرمەگەنٸن جەتكٸزدٸ.
“سول كەزدەرٸ مەكتەپتە ارنايى جەشٸكتەر قويىلىپ, وقۋشىلار بٸر-بٸرٸنە حات جازاتىن. ولار – كەمەلەت جاسىنا تولماعاندار. ەرينە, بۇل – نونسەنس. بۇل تۋرالى دا ايتقانبىز. كەيٸن مۇنداي جاعدايلار قايتالانبايتىن بولدى”, – دەيدٸ دەپۋتات.
ول ادامداردىڭ بٸر-بٸرٸنە سەزٸم بٸلدٸرە الاتىنىن ايتتى. الايدا مەكتەپ وقۋشىلارىنىڭ اشىق حاتتاردى بۋللينگ جاساۋ ٷشٸن دە قولداناتىنىن دا ەسكەرتتٸ.
“بۇل ەشقانداي مەرەكە ەمەس. بۇل كٷندٸ مەڭگٸگە ۇمىتۋ كەرەك”, – دەدٸ ەلنۇر بەيسەنباەۆ.
