الماتىداعى ورتالىق ستاديوندا ٶتكەن «قايرات» – «ورداباسى» فۋتبول ماتچى كەزٸندە الاڭعا ساياسي پارتييانىڭ تۋىن كٶتەرٸپ جٷگٸرٸپ شىققان كٶرەرمەن ۇستالدى, دەپ حابارلايدى ult.kz.
پوليتسييانىڭ مەلٸمەتٸنشە, جانكٷيەردٸڭ ەرەكەتٸ قوعامدىق تەرتٸپ پەن سپورتتىق ٸس-شارا كەزٸندە قاۋٸپسٸزدٸك تالاپتارىن بۇزعان.
– پوليتسييا قىزمەتكەرلەرٸ ستاديون كٷزەتشٸلەرٸمەن بٸرلەسٸپ, قۇقىقبۇزۋشىنى بٸردەن توقتاتتى. ول وقيعا ورنىندا ۇستالىپ, بوستاندىق اۋداندىق پوليتسييا باسقارماسىنا جەتكٸزٸلدٸ, – دەپ حابارلادى الماتى قالالىق پوليتسييا دەپارتامەنتٸ.
اتالعان دەرەك بويىنشا قۇقىقبۇزۋشىعا ەكٸمشٸلٸك قۇقىق بۇزۋشىلىق تۋرالى كودەكستٸڭ 434-بابى («ۇساق بۇزاقىلىق») بويىنشا ەكٸمشٸلٸك ٸس قوزعالدى. ماتەريالدار سوتتىڭ قاراۋىنا جولداندى.
پوليتسييا قوعامدىق تەرتٸپتٸ بۇزۋعا باعىتتالعان كەز كەلگەن ەرەكەتكە زاڭ اياسىندا شارا قولدانىلاتىنىن ەسكە سالىپ, سپورتتىق ٸس-شارالاردى رۇقسات ەتٸلمەگەن اكتسييالار ٶتكٸزۋ الاڭىنا اينالدىرۋعا جول بەرٸلمەيتٸنٸن مەلٸمدەدٸ.
ايتا كەتەيٸك, كەزدەسۋ 2:1 ەسەبٸمەن «قايراتتىڭ» جەڭٸسٸمەن اياقتالدى. بۇل نەتيجەدەن كەيٸن الماتىلىق كلۋب تۋرنيرلٸك جاعدايىن جاقسارتىپ, «ورداباسى» كٶشباسشىلىق ورنىنان ايىرىلدى.
