مەسكەۋدە سوۆەت جازۋشىسى ەرٸ ديسسيدەنت الەكساندر سولجەنيتسىن تۇرعان پەتەردە مۇراجاي اشىلدى. جازۋشى 1974 جىلى وسى پەتەردە "ارحيپەلاگ گۋلاگ" كٸتابى جارىققا شىققان سوڭ تۇتقىندالعان.
پەتەر تۆەر كٶشەسٸندەگٸ نٶمٸرٸ 12-ٷيدە ورنالاسقان. مۇراجايدىڭ اشىلۋ رەسٸمٸنە جازۋشىنىڭ جەسٸرٸ ناتاليا سولجەنيتسىن قاتىستى. مۇراجايعا سولجەنيتسىننىڭ ٶمٸرٸ مەن شىعارماشىلىعىمەن تانىستىراتىن زاتتار قويىلعان.
مەسكەۋدە 11 جەلتوقسان كٷنٸ الەكساندر سولجەنيتسىن اتىنداعى كٶشەدەگٸ ساياباققا جازۋشىنىڭ ەسكەرتكٸشٸ ورناتىلعان. ەسكەرتكٸشتٸڭ اشىلۋ سالتاناتىنا رەسەي پرەزيدەنتٸ ۆلاديمير پۋتين قاتىسقان. سول كٷنٸ ۆلاديميرسك وبلىسىنىڭ گۋس-حرۋستالنىي قالاسىندا ەلدەبٸرەۋلەر بٸرەر كٷن بۇرىن جازۋشىعا ورناتىلعان ەسكەرتكٸش تاقتانى قيراتىپ كەتكەن.
الەكساندر سولجەنيتسىن - نوبەل سىيلىعىنىڭ لاۋرەاتى, ستاليندٸك لاگەرلەردە تۇتقىندا وتىرعان, كوممۋنيستٸك رەجيمدٸ سىنايتىن جازۋشى. 1974 جىلى سوۆەت بيلٸگٸ جازۋشىنى سسرو-دان جەر اۋدارىپ, ول رەسەيگە 20 جىلدان سوڭ عانا ورالعان. جازۋشى 2008 جىلى 3 تامىزدا مەسكەۋدە قايتىس بولعان.
