مەسكەۋ تٷبٸندە وڭشىل راديكال فيلوسوف, "ورىس ەلەمٸنٸڭ" يدەولوگى الەكساندر دۋگيننٸڭ قىزىنىڭ كٶلٸگٸ جارىلدى. بۇل جٶنٸندە Baza جەنە Mash تەلەگرام-ارنالارى حابارلادى. كەيٸن بۇل اقپاراتتى "دونەتسك حالىق رەسپۋبليكاسىنىڭ جەتەكشٸسٸ" دەنيس پۋشيلين راستادى. ونىڭ سٶزٸنشە, وقيعاعا "ۋكراين رەجيمٸ تەرروريستەرٸنٸڭ" قاتىسى بار. ول شابۋىلداۋشىلار "دارييانىڭ دۋگينانىڭ ەكەسٸن ٶلتٸرمەك بولعان" دەدٸ.
كۋەگەرلەردٸڭ سٶزٸنە قاراعاندا, كٶلٸك جىلجىپ بارا جاتقان كەزدە جارىلعان. رۋلدە وتىرعان ەيەل ادام وپات بولدى. Baza مەلٸمەتٸنشە, قۇقىق قورعاۋ ورگاندارى وقيعانى "ادام ٶلتٸرۋگە وقتالۋ" بابى بويىنشا تەرگەپ جاتىر.
دارييا دۋگينا ەكەسٸ جەتەكشٸلٸك ەتەتٸن حالىقارالىق ەۋرازييا قوزعالىسىنىڭ ساياسي شولۋشىسى بولعان.
قۇقىق قورعاۋ ورگاندارى دۋگينانىڭ كٶلٸگٸ جارىلعانىن رەسمي تٷردە راستامادى. تاسس اگەنتتٸگٸ دەرەككٶزگە سٷيەنە وتىرىپ, مەسكەۋ تٷبٸندە كٶلٸك جارىلعانىن, جٷرگٸزۋشٸسٸنٸڭ قازا بولعانىن جازدى. الايدا ناقتى اتى-جٶنٸن اتامادى.
امەريكا اقپارات قۇرالدارى الەكساندر دۋگيندٸ "پۋتيننٸڭ اقىلشىسى" (“Putin’s brain”) دەپ اتايدى. الەكساندر دۋگين – "ورىس ەلەمٸ" يدەولوگتارىنىڭ بٸرٸ. ول ۋكرايناعا ورىس ەسكەرٸن كٸرگٸزٸپ, تۇتاس اۋماعىن باسىپ الۋدى قولداعان. دۋگين يدەيالارىنىڭ كرەمل ساياساتىنا ىقپالى بار دەپ ايتىلادى.
