Máskeý túbinde ońshyl radikal filosof, "orys áleminiń" ideology Aleksandr Dýginniń qyzynyń kóligi jaryldy. Bul jóninde Baza jáne Mash telegram-arnalary habarlady. Keiin bul aqparatty "Donetsk halyq respýblikasynyń jetekshisi" Denis Pýshilin rastady. Onyń sózinshe, oqiǵaǵa "ýkrain rejimi terroristeriniń" qatysy bar. Ol shabýyldaýshylar "Dariianyń Dýginanyń ákesin óltirmek bolǵan" dedi.
Kýágerlerdiń sózine qaraǵanda, kólik jyljyp bara jatqan kezde jarylǵan. Rýlde otyrǵan áiel adam opat boldy. Baza málimetinshe, quqyq qorǵaý organdary oqiǵany "adam óltirýge oqtalý" baby boiynsha tergep jatyr.
Dariia Dýgina ákesi jetekshilik etetin Halyqaralyq Eýraziia qozǵalysynyń saiasi sholýshysy bolǵan.
Quqyq qorǵaý organdary Dýginanyń kóligi jarylǵanyn resmi túrde rastamady. TASS agenttigi derekkózge súiene otyryp, Máskeý túbinde kólik jarylǵanyn, júrgizýshisiniń qaza bolǵanyn jazdy. Alaida naqty aty-jónin atamady.
Amerika aqparat quraldary Aleksandr Dýgindi "Pýtinniń aqylshysy" (“Putin’s brain”) dep ataidy. Aleksandr Dýgin – "orys álemi" ideologtarynyń biri. Ol Ýkrainaǵa orys áskerin kirgizip, tutas aýmaǵyn basyp alýdy qoldaǵan. Dýgin ideialarynyń Kreml saiasatyna yqpaly bar dep aitylady.
