مەسكەۋ بيلٸگٸ قالالىق دۋما سايلاۋىنا ٶتپەي قالعان تەۋەلسٸز كانديداتتاردى قولدايتىن 100 مىڭ ادام قاتىساتىن ميتينگٸنٸ ٶتكٸزۋگە رۇقسات بەرگەنٸن ايتادى. ميتينگ 10 تامىزدا اكادەميك ساحاروۆ داڭعىلىندا ٶتپەك. بۇل تۋرالى مەسكەۋ مەريياسىنىڭ ٶكٸلٸ ۆاسيليي ولەينيككە سٸلتەمە جاساعان «ينتەرفاكس» اگەنتتٸگٸ حابارلادى. ولەينيكتٸڭ سٶزٸنشە, ميتينگ ٶتكٸزۋ تۋرالى ٶتٸنٸشتٸ بٸر توپ ادام تٷسٸرگەن. ولاردىڭ اراسىندا ەلەنا رۋساكوۆا, مۋنيتسيپالدى دەپۋتات پەن سايلاۋعا تٸركەلە الماعان كانديدات بولعان.
الايدا 10 تامىزداعى ميتينگٸگە بايلانىستى ەشقانداي قۇجات الماعانىن ايتقان رۋساكوۆا بۇل اقپاراتتى جالعان دەپ وتىر. بۇعان دەيٸن بەلسەندٸلەردٸڭ ميتينگٸنٸ باسقا ورىندا ٶتكٸزۋدٸ ۇسىنعانى, مەرييانىڭ بۇل ۇسىنىسپەن كەلٸسپەگەنٸ حابارلانعان.
مەسكەۋ قالالىق دۋماسى سايلاۋىنا وپپوزيتسييالىق كانديداتتاردى ٶتكٸزۋدٸ تالاپ ەتكەن ميتينگٸلەر شٸلدەنٸڭ ورتاسىنان بەرٸ ٶتٸپ جاتىر. 27 شٸلدەدە ٶتكەن ميتينگٸگە مىڭداعان ادام جينالىپ, پوليتسييا 1400-گە جۋىق ادامدى ۇستاعان. تەرگەۋ كوميتەتٸ جاپپاي تەرتٸپسٸزدٸك تۋرالى ٸس قوزعاپ, ەزٸرگە تٶرت ادام ايىپتالىپ وتىر.
كەزەكتٸ نارازىلىق 3 تامىزدا ٶتپەكشٸ. بيلٸك بۇل اكتسيياعا رۇقسات بەرمەگەن.
