بٷگٸن – 25 تامىز كٷنٸ ماڭعىستاۋ وبلىسى اقتاۋ قالاسىندا زييالى قاۋىم ٶكٸلدەرٸ باس قوسىپ, قر تۇڭعىش پرەزيدەنتٸ – ەلباسى ن.ە. نازارباەۆ اتىنا اشىق حات جازىپ, ۋاحابيزم-سالافيزم اعىمىنىڭ بارلىق تارماعىن ەكسترەميستٸك دەپ تانۋ تۋرالى حالىق تالابىنا قولداۋ كٶرسەتۋٸن سۇرادى.
بٸر ساعاتتىڭ ٸشٸندە جٷزدەن استام قول جينالىپ, وبلىستىق بەكەت اتا مەشٸتٸندە شام, قۇپتان نامازىنا كەلەتٸن جاماعاتتار اراسىندا جالعاسۋدا.
اسا قۇرمەتتٸ نۇرسۇلتان ەبٸشۇلى!
مىڭجىلدىقتار توعىسىنداعى تالايلى سىن-تەگەۋرٸندەردەن ۇلى دالا ەلٸنٸڭ ٸرگەسٸن شايقالتپاي الىپ شىعۋدىڭ اۋىر دا ابىرويلى اماناتى ٶزٸڭٸزگە بۇيىردى.
شيرەك عاسىرلىق داڭقتى تاريحقا يە تەۋەلسٸزدٸگٸمٸزدٸڭ تۇعىرلانۋ كەزەڭٸ سٸزدٸڭ دارا تۇلعاڭىزبەن استاسىپ, ەرەن ەڭبەگٸڭٸزبەن ەرەكشەلەنەتٸنٸ – بارشاعا بەلگٸلٸ.
سان ۇلتتى باۋىرىنا باسىپ, تٸلٸ مەن دٸنٸن, تاريحى مەن تانىمىن اسىل اماناتىنداي ساقتاعان قازاق ەلٸنٸڭ بٷگٸندە بەيبٸتشٸلٸك مەكەنٸ, كەلٸسٸم كەڭٸستٸگٸ رەتٸندە ەلەمگە اتى تانىلدى. سىندارلى شاقتاردان سٷرٸنبەي ٶتكەن ەلٸمٸزدٸڭ ەڭسەسٸ تٸكتەلٸپ, ەل-اۋقاتى ارتىپ, التى الاشتىڭ ماقتانىنا اينالدى.
بٸراق وسى تولاعاي ەڭبەكپەن قول جەتكەن تەۋەلسٸز مەملەكەتتٸڭ, تابىستى تۇرمىستىڭ, باعا جەتپەس بەيبٸتشٸلٸكتٸڭ شىرقىن بۇزىپ, لاڭكەستٸك ەرەكەتتەردٸڭ ورىن الا باستاۋى ٶكٸنٸشتٸ سالدارلارعا سوقتىرىپ وتىر.
مەملەكەت ازاماتتارىنىڭ ٶمٸرٸن قيعان لاڭكەستٸك ەرەكەتتەر ۇلتتىق قاۋٸپسٸزدٸككە قاتەر تٶندٸرٸپ, ٸشكٸ تۇراقتىلىقتىڭ تۇعىرىن شايقالتىپ قانا قويماي, تەۋەلسٸز قازاقستاننىڭ ەلەمدٸك ارەناداعى اسقاق بەدەلٸنە دە نۇقسان كەلتٸرە باستادى.
ٶزٸڭٸز ورىندى تٷردە اتاپ كٶرسەتكەندەي, اقتٶبەدەن باستالىپ, الماتىعا ۇلاسقان بۇل قانقۇيلى لاڭكەستٸك ەرەكەتتەردٸڭ سوڭىندا سالافيلٸك اعىم ٶكٸلدەرٸ تۇر.
بەيبٸتشٸلٸك دٸنٸ – يسلامنىڭ بولمىسى مەن رۋحىنا جات دەستٷرلٸ ەمەس جولدى ۇستاناتىن سالافيلٸك اعىمنىڭ تاريحتا قاندى قاساپ قىرعىندارىمەن اتى قالعان, مۇسىلمانداردىڭ ٶزٸنە قارۋ كٶتەرٸپ, قانىن تٶككەن ۋاححابيلٸكپەن بٸر ەكەنٸن بارشا ساراپشىلار, دٸنتانۋشىلار مەن يسلامتانۋشىلار قاۋىمداستىعى بٸر اۋىزدان مويىندايدى.
سالافيلٸك اعىم ەلەمدە كٶپتەگەن تارماقتارعا بٶلٸنٸپ, ەرەكەت ەتكەنٸمەن, ەلٸمٸزدە ونىڭ تەكفٸرشٸلەر, مادحاليلەر, سۋرۋريلەر سەكٸلدٸ اعىمدارى ۋاعىز-ناسيحاتىن بەلسەنە جٷرگٸزۋدە. بۇل اعىمداردىڭ اتاۋى مەن ەدٸستەمەسٸندە ازداعان ايىرماشىلىق بولعانىمەن, ولاردىڭ يدەولوگيياسى مەن تٷپكٸ ماقساتتارى بٸردەي, پٸر تۇتاتىن يدەولوگتارى مەن پايدالاناتىن ەدەبيەتتەرٸ دە ورتاق.
«سالافيلٸك» دەگەن بٸر عانا اتاۋمەن بٸرٸگەتٸن بۇل اعىمداردىڭ ورتاق مٷددەسٸ – زايىرلى مەملەكەت قۇندىلىقتارىن تەرٸستەۋ, يسلام مەملەكەتٸ يدەياسىن ورنىقتىرۋ. دٸني سەنٸم بوستاندىعىن قامتاماسىز ەتەتٸن زايىرلى مەملەكەتتٸ «دٸنسٸز, كەپٸرستان» دەپ تانىتاتىن سالافيلٸك اعىم ٶكٸلدەرٸ ونداي مەملەكەتتەن اۋا كٶشٸپ, يسلام شاريعاتىمەن باسقارىلاتىن ەلگە كەتۋدٸ («حيجرا جاساۋدى») ناسيحاتتايدى. ەشبٸر نەگٸزٸ جوق وسىنداي جالعان يدەياعا الدانىپ, «مۇسىلمان ەلٸنە حيجرا جاسادىق» دەگەن سەنٸممەن جٷزدەگەن قازاقستاندىق جاستاردىڭ سيريياعا اتتانىپ, دايش قىرعىنىنىڭ قۇربانىنا اينالعانى بەلگٸلٸ.
«ۇلت» دەگەن ۇعىمدى جات سانايتىن سالافيلٸك يدەولوگيياعا مەملەكەتتٸڭ تٸرەگٸ بولىپ تابىلاتىن ۇلتتىڭ رۋحاني قۇندىلىقتارىن, تٶلتۋما مەدەنيەتٸ مەن سالت-دەستٷرٸن, تٸپتٸ مۇسىلماندىق تاريحىن دا جوققا شىعارۋ تەن. سالافيلٸكتٸ ۇستانۋشىلار قازاقتىڭ كٸشٸپەيٸلدٸلٸك پەن قۇرمەتتەن تۋىنداعان ٸزگٸ دەستٷرلەرٸن «اللاعا سەرٸك قوسۋ», «بيدعات» دەپ نەگٸزسٸز ايىپتاپ, تاريحقا تاعزىم ٸسپەتتٸ زييارات مەدەنيەتٸن تەرٸستەۋدە. قازاق دالاسىندا بۇرىن-سوڭدى بولىپ كٶرمەگەن قابٸر قيراتۋ سەكٸلدٸ قاسيەتسٸزدٸك دە سالافيلٸك اعىم ٶكٸلدەرٸنٸڭ ورتاسىندا ورىن الدى.
دەستٷرلٸ قازاق مۇسىلماندىعىن جوققا شىعارۋداعى تاعى بٸر ماقسات – يسلام دٸنٸن قازاقستانعا تەۋەلسٸزدٸكتەن كەيٸن عانا كەلگەن جاڭا دٸن سەكٸلدٸ كٶرسەتٸپ, سول كەزەڭدە اراب ەلدەرٸنەن تەلٸم الىپ كەلگەن سالافيلٸكتٸڭ ۋاعىزشىلارىن «تازا» يسلامدى تاراتۋشىلار رەتٸندە دەرٸپتەۋ بولىپ وتىر.
ٶزگە دٸن ٶكٸلدەرٸن «كەپٸر» ساناپ, اسا تٶزٸمسٸزدٸك سالافيلٸك اعىم ٶكٸلدەرٸنە قازاقستاندىق مەنتاليتەتكە تەن مەمٸلەگەرلٸك (تولەرانتتىلىق) مٷلدە جات. «كەپٸرلەردٸڭ مال-مٷلكٸ مۇسىلماندارعا حالال, كەز كەلگەن جاعدايدا تارتىپ الۋعا بولادى» دەگەن دەستٷرلٸ يسلامعا جات تٷسٸنٸكتٸ ۇستاناتىن سالافيلٸك اعىمى كٶپ كونفەسسييالى قازاقستان سىندى مەملەكەت ازاماتتارى ٷشٸن تٶتەنشە قاۋٸپتٸ بولىپ تابىلادى.
سالافيلٸك اعىم ٶكٸلدەرٸ ناماز وقىمايتىن مۇسىلمانداردىڭ ٶزٸن كەپٸرگە شىعارادى. ناماز وقىمايتىن اتا-اناسىنان ۇل-قىزىن بەزدٸرٸپ, ولاردى وقشاۋلانعان جاماعاتتارعا تارتىپ, وتباسىنىڭ كٷيرەۋٸنە سوقتىرىپ وتىرعان كٶپتەگەن زارداپتى ٸس-ەرەكەتتەرگە سالافيلٸكتٸ ۇستانۋشىلار سەبەپ بولىپ وتىر.
نەكە مەسەلەسٸنە جاۋاپسىز قارايتىن سالافيلٸك جاماعات ٶكٸلدەرٸ اراسىندا ۋاقىتشا نەكەنٸ زاڭداستىرۋ ەبدەن بەلەڭ العان. اتا-انالارىنىڭ كەلٸسٸمٸنسٸز جاماعاتتاعى ەلدەبٸرەۋلەردٸڭ كۋەلٸگٸمەن نەكە قييا سالاتىن جۇپتار دەل سولاي ەشبٸر جاۋاپكەرشٸلٸكسٸز وڭاي اجىراسادى. ەر ادامنىڭ كٶڭٸلٸ قالاماسا ٷش رەت تالاق ايتىپ اجىراسا سالۋ, وتباسى جەنە بالا الدىندا ەشقانداي جاۋاپكەرشٸلٸكتٸ سەزٸنبەۋ سالدارىنان جاماعات ٸشٸندە قولدان-قولعا كٶشٸپ جٷرەتٸن قىز-كەلٸنشەكتەر, كٸمنەن تۋىلعانى بەلگٸسٸز بالالار كٶبەيگەن. ەل ٸشٸندە مۇنداي كەلەڭسٸزدٸكتەر ارتىپ كەلەدٸ.
سالافيلٸك اعىم ٶكٸلدەرٸ ٶزدەرٸنە تەن ناماز وقۋ ٷلگٸسٸمەن ەلٸمٸزدەگٸ مەشٸت جاماعاتىنان ەرەكشەلەنۋگە تىرىسىپ, عاسىرلار بويى جالعاسقان دٸني تەجٸريبە ساباقتاستىعىن كٷيرەتۋدە. قوعامدىق ورىن بولىپ تابىلاتىن مەشٸتتەردٸڭ ٸشكٸ تەرتٸبٸن ساقتاماي, جاماعاتتىڭ بٸرلٸگٸ مەن يمامداردىڭ بەدەلٸنە نۇقسان كەلتٸرۋدە.
يسلامنىڭ رۋحىن تٷستەپ تانىماعان, دٸننٸڭ مازمۇندىق قىرىنا ەمەس, تەك فورمالىق جاعىنا مەن بەرەتٸن, ساقالدى, قىسقا بالاق پەن حيدجابتى مۇسىلماندىقتىڭ تٸكەلەي كٶرٸنٸسٸ رەتٸندە تانىتۋعا تىرىساتىن سالافيلٸك اعىمنىڭ دامۋ اتاۋلىنى قابىلدامايتىن شەكتەۋلٸ دٷنيەتانىمى مۇسىلماندار ٷشٸن دە اسا قاۋٸپتٸ. «قۇران اياتتارىن تۋرا ماعىناسىندا عانا قابىلداۋ كەرەك, ونى اقىلمەن پايىمداۋعا بولمايدى» دەگەن بۋكۆاليستٸك كٶزقاراسقا دا سول شەكتەلۋشٸلٸك سەبەپ بولعان.
وسى كەرٸتارتپا كٶزقاراستىڭ سالدارىنان يسلام عۇلامالارىن, مازحابتار تاعىلىمىن مويىنداماۋ, ۇلتتىق دەستٷرلەردٸ, مەدەنيەت پەن تاريحتى تەرٸسكە شىعارۋ, يسلامداعى زايىرلىلىق قاعيداتتارىن, دٸنارالىق سۇحباتتى, تولەرانتتىلىقتى جوققا شىعارۋ, «جيھاد» ۇعىمىن بۇرمالاپ, تەك «قارۋلى سوعىس» ماعىناسىندا تٷسٸندٸرۋ سەكٸلدٸ كٶپتەگەن قاتە تٷسٸنٸكتەر قالىپتاسىپ, عاسىرلار بويى نەگٸزسٸز قانتٶگٸسكە ۇلاسىپ كەلدٸ. سول تەرٸس تٷسٸنٸكتەر قازٸر قازاق توپىراعىندا جالعاسىپ, لاڭكەستٸك ەرەكەتتەرگە جول اشىپ وتىر.
قۇرمەتتٸ نۇرسۇلتان ەبٸشۇلى!
قازاقستان حالقىنىڭ بٸرلٸگٸ مەن كەلٸسٸمٸ – تەۋەلسٸز مەملەكەتٸمٸزدٸڭ باعا جەتپەس بايلىعى ەكەنٸن ٶزٸڭٸز ٷنەمٸ اتاپ كٶرسەتٸپ كەلەسٸز.
سول بٸرلٸككە سىنا قاعىپ, كەلٸسٸم كەڭٸستٸگٸنە نۇقسان كەلتٸرٸپ وتىرعان دەستٷرلٸ ەمەس سالافيلٸك اعىم يدەولوگيياسىنا تىيىم سالۋ قاجەتتٸگٸن قازٸر بٷكٸل قوعام اشىنا كٶتەرۋدە, تولاسسىز تالقىلاۋدا.
ەلٸمٸزدٸڭ سٶزۇستار زييالىلارى, ايتارى بار اعا بۋىن ٶكٸلدەرٸ, ساياساتكەرلەرٸ مەن ساراپشىلارى, دٸنتانۋشىلارى مەن يمامدارى بٸر كٸسٸدەي سالافيلٸككە تىيىم سالۋ قاجەتتٸگٸن اشىق مەلٸمدەپ, ايقىن دەلەلدەپ وتىر.
ٶز كەزەگٸندە سالافيلٸك اعىم ٶكٸلدەرٸ دە ەرەكەتسٸز وتىرعان جوق. 2014 جىلى «ات-تاكفير ۋال-حيدجرا» ۇيىمىنا تىيىم سالىنعاندا ٶزدەرٸنٸڭ بارلىق تەرٸس پيعىلدى يدەيالارىن تەكفٸرشٸلٸككە اۋدارعان سالافيلەر ەندٸ كٷمەندٸ كٶزقاراس اتاۋلىنى ۋاححابيلٸككە جاۋىپ, ٶزدەرٸن اقتاپ الۋعا تىرىسۋدا. سالافيلٸكتٸ ۋاححابيلٸكتەن بٶلەك اعىم رەتٸندە تانىتۋ ماقساتىندا جاساندى زەرتتەۋلەر «جٷرگٸزٸپ», «قالىپتى سالافيزم» دەگەن جالعان يدەيانى نەگٸزدەۋگە كٷش سالۋدا. دەستٷرلٸ ەمەس اعىمداردىڭ ٶزٸن ايىپتاماي, ولاردىڭ تارالا باستاعانىنا قازاقستان مۇسىلماندارى دٸني باسقارماسىن كٸنەلاپ, ەل نازارىن باسقا تاراپقا بۇرۋدا.
بۇل ەرەكەتتەر مەن يدەيالاردىڭ نەگٸزسٸز ەكەندٸگٸن دٸنتانۋشى عالىمدارىمىز جان-جاقتى دەلەلدەپ بەردٸ. سالافيلٸك پەن ۋاححابيلٸكتٸڭ بٸر ەكەندٸگٸ, «قالىپتى سالافيلٸك» دەگەن ۇعىمنىڭ ماقساتتى تٷردە ەنگٸزٸلگەن جاساندى ۇعىم ەكەندٸگٸ, ٶزٸن اقتاماعاندىقتان ەلەمدٸك دەڭگەيدە, تٸپتٸ اراب ەلدەرٸنٸڭ ٶزٸندە تەرٸستەلگەنٸ, سالافيلٸك اعىمداردىڭ بارلىعىنا ەكسترەميستٸك شەتٸن كٶزقاراستاردىڭ تەن ەكەنٸ عىلىمي نەگٸزدە دەيەكتەلدٸ.
سالافيلٸك – راديكالدى اعىمداردىڭ باستاۋى, ەكسترەميستٸك يدەيالاردىڭ وشاعى. بٷگٸنگە دەيٸن قازاقستان رەسپۋبليكاسىندا سوت شەشٸمٸمەن تىيىم سالىنعان 670 ەدەبيەتتٸڭ 334-ٸ سالافيلٸك اعىم ٶكٸلدەرٸنە تيەسٸلٸ بولۋى – وسىنىڭ ايقىن دەلەلٸ.
سالافيلٸككە تىيىم سالۋ مەسەلەسٸ بٷگٸن عانا ٶزەكتٸ بولىپ وتىرعان جوق. جوعارىدا اتالعان «ات-تاكفير ۋال-حيدجرا» ۇيىمىنا تىيىم سالۋ تەكفٸرشٸلەر بٸر بٶلٸگٸ بولىپ تابىلاتىن سالافيلٸك اعىمداردى بٶلشەكتەپ ەڭسەرۋدٸڭ باسى دەپ تانۋعا لايىق ٷدەرٸس بولاتىن. ال سالافيلٸكتٸڭ كٶپتەگەن تەرٸس پيعىلدى ەدەبيەتتەرٸنە سوت شەشٸمٸمەن تىيىم سالىنۋى – وسى ٷدەرٸستٸڭ ورتا بٶلٸگٸ. ەندٸگٸ كەزەكتە سالافيلٸك اعىمىنا تۇتاستاي تىيىم سالۋ ارقىلى وسى ٷدەرٸستٸ تولىق اياقتاۋ قاجەتتٸگٸن سوڭعى كەزدە جيٸلەي تٷسكەن لاڭكەستٸك وقيعالارى كٷن تەرتٸبٸنە قويىپ وتىر.
تەۋەلسٸز ساياساتى, دەربەس ۇستانىمى, ٸشكٸ-سىرتقى قاتىناستارى ورنىققان ەل رەتٸندە بٸزدٸڭ سالافيلٸككە تىيىم سالۋدان تارتىنۋىمىزعا ەشبٸر نەگٸز جوق. بۇل ٷدەرٸس سالافيلٸككە اداسىپ ەرگەن ەل ٸشٸندەگٸ كٶپتەگەن ازاماتتاردىڭ دۇرىس سەنٸمگە قايتۋىنا مٷمكٸندٸك بەرەدٸ. وتانداستارىمىزدىڭ سالافيلٸك يدەولوگييا ىقپالىنا تٷسۋ قارقىنىن ازايتادى, ۋاقىت ٶتە كەلە بارىنشا بەسەڭدەتەدٸ. سالافيلٸكتٸڭ جەكەلەگەن ٶكٸلدەرٸ كٶزقاراستارىنىڭ راديكالدانا تٷسۋٸ مٷمكٸن ەكەندٸگٸن جوققا شىعارۋعا بولمايدى, بٸراق بۇل قۇبىلىس سالافيلٸككە تىيىم سالىنباعان قازٸرگٸ كەزەڭدە دە جٷرٸپ جاتقانى بەلگٸلٸ. اعىمعا تىيىم سالىنعان جاعدايدا راديكالدانۋ ٷدەرٸسٸنە ۇشىرايتىن تۇلعالار سانى سٶزسٸز ازايماق.
سىرتقى ساياسات مەسەلەسٸنە كەلگەندە سالافيلٸكتٸڭ زيياندى سالدارىنان مۇسىلمان مەملەكەتتەرٸنٸڭ دە زارداپ شەگٸپ وتىرعانىن, سوندىقتان اراب ەلدەرٸنٸڭ ٶزٸندە سالافيلٸككە قاتىستى كٶزقاراستاردىڭ بٸرىڭعاي جاعىمدى ەمەستٸگٸن ەسكەرۋٸمٸز قاجەت. بارلىق مۇسىلمان مەملەكەتتەرٸنٸڭ رەسمي دٸنٸ يسلام بولىپ تابىلادى, ال سالافيلٸك نەمەسە ۋاححابيلٸك ەشبٸر ەلدە رەسمي دٸني اعىم رەتٸندە بەكٸتٸلگەن ەمەس.
ۋاححابيلٸككە ٸش تارتاتىن ساۋد ارابيياسى كورولدٸگٸمەن قارىم-قاتىناس مەسەلەسٸنە كەلسەك, مەملەكەتارالىق قاتىناستاردا دٸني قاتىناستار ەمەس, ەكونوميكالىق مٷددەلەردٸڭ باستى ورىندا تۇراتىنىن نازارعا العان جٶن. دەستٷرلٸ ەمەس اعىمدار زاردابىن بٸزدەن ەرتەرەك جەنە تەرەڭٸرەك تارتقان داعىستان, ٶزبەكستان, تەجٸكستان سەكٸلدٸ ەلدەردە سالافيلٸك-ۋاححابيلٸككە سوت شەشٸمٸمەن تىيىم سالىنعانىنا قاراماستان, بۇل ەلدەردٸڭ اراب مەملەكەتتەرٸمەن قارىم-قاتىناسىنا نۇقسان كەلمەگەنٸ بەلگٸلٸ.
سالافيلٸككە تىيىم سالۋ قازاقستان رەسپۋبليكاسىنىڭ زايىرلى تۇرپاتىن ساقتاۋ مەن دامىتۋعا, كٶپكونفەسسييالى ەلدەگٸ تىنىشتىق پەن تۇراقتىلىقتى, ەلٸمٸزدٸڭ مۇسىلمان ازاماتتارى اراسىنداعى ٸشكٸ بٸرلٸكتٸ ساقتاۋعا جەنە نىعايتۋعا, قازاقستان حالقىنىڭ دەستٷرلٸ قۇندىلىقتارى مەن تٶلتۋما مەدەنيەتٸن ساقتاپ, دامىتۋعا, وتباسىلىق قۇندىلىقتاردى كٷشەيتۋگە, قازاقستان مۇسىلماندارى دٸني باسقارماسىنىڭ بەدەلٸن ارتتىرۋعا, قازاقستان حالقىنىڭ بٸرلٸگٸ جەنە بٸرتەكتٸلٸگٸ يدەياسىن تۇعىرلاندىرا تٷسۋگە جول اشادى.
قۇرمەتتٸ نۇرسۇلتان ەبٸشۇلى!
«قازاقستان – 2050» ستراتەگيياسى – قالىپتاسقان مەملەكەتتٸڭ جاڭا ساياسي باعىتى» اتتى قازاقستان حالقىنا جولداۋىڭىزدا قازاقستاندىقتاردىڭ دٸني ساناسىن ەلدٸڭ سالت-دەستٷرلەرٸ مەن مەدەني نورمالارىنا سەيكەس قالىپتاستىرۋ مٸندەتٸن ٶزٸڭٸز اتاپ كٶرسەتكەن بولاتىنسىز.
سونىڭ نەگٸزٸندە بٸزدٸڭ قازاقستاندىق قوعامدا قازٸر دٸن مەن دەستٷر ساباقتاستىعىن, دەستٷرلٸ قۇندىلىقتارعا نەگٸزدەلگەن دٸني تانىمدى قايتا جاڭعىرتۋ شارالارى ماڭىزدى ورىن الۋدا. ال سالافيلٸك يدەولوگيياسىنىڭ ەڭ جاعىمسىز ىقپالى دەستٷرلٸ رۋحاني-دٸني قۇندىلىقتاردى ىدىراتۋ ارقىلى دٸني سانانى ٶزگەرتۋ ٷدەرٸسٸ بولىپ وتىر. بۇل ٶز كەزەگٸندە دەستٷرلٸ قۇندىلىقتارمەن بٸرگە ٸشكٸ تۇراقتىلىقتىڭ ەلسٸرەۋٸنە سوقتىرۋدا. سوندىقتان ۇلتتى قالىپتاستىرعان قۇندىلىقتاردى قورعاۋ ەلدٸڭ ٸشكٸ تۇراقتىلىعى مەن مەملەكەت ٸرگەسٸنٸڭ بٷتٸندٸگٸن قورعاۋمەن ۇشتاساتىنى ايقىن.
دٸن مەملەكەتتەن بٶلٸنگەنٸمەن, حالىقتىڭ بولمىسىنان, تۇرمىس-تٸرشٸلٸگٸنەن بٶلٸنبەيتٸنٸ بەلگٸلٸ. سەبەبٸ دٸن – تەك سەنٸمدٸك ۇعىم ەمەس, ول – حالىقتىڭ تاريحى, مەدەنيەتٸ, دٷنيەتانىمى, ٶمٸر سٷرۋ مەنەرٸ.
مەڭگٸلٸك ەلدٸڭ تٸرەگٸ – مەڭگٸلٸك قۇندىلىقتار. سول قۇندىلىقتاردىڭ بٸرٸ – ۇلت بولمىسىمەن استاسقان دەستٷرلٸ دٸن.
سوندىقتان قازٸر بارشا قازاقستاندىقتار, ەسٸرەسە ەلٸمٸزدٸڭ مۇسىلمان ازاماتتارى قازاق مەملەكەتتٸلٸگٸ مەن رۋحاني-مەدەني قۇندىلىقتارىنىڭ قالىپتاسۋىنا نەگٸز بولعان اتا دٸنٸمٸز – يسلامنىڭ لاڭكەس اعىمداردان ازات بولىپ, ٶسكەلەڭ بۋىنعا مىڭجىلدىقتار بويىنا رۋحاني باعدار بولۋىنا نەگٸز سالاتىن شەشٸم قابىلدانۋىن كٷتۋدە.
سالافيلٸككە تىيىم سالۋ زايىرلى مەملەكەتٸمٸزدٸڭ نەگٸزگٸ قۇندىلىقتارىن – مەملەكەت ازاماتتارىنىڭ ٶمٸرٸن, بوستاندىقتارى مەن قۇقىقتارىن, ۇلتتىق قاۋٸپسٸزدٸكتٸ, ٸشكٸ تۇراقتىلىقتى, حالىقتىڭ رۋحاني-مەدەني قۇندىلىقتارىن ساقتاۋ مەن نىعايتۋعا باعىتتالعان سارابدال ساياسات, سارا شەشٸم بولماق.
ماڭعىستاۋ وبلىسى, اقتاۋ قالاسى, 25.08.2016
ۇلت پورتالى
