فوتو: Sputnik قازاقستان
فرانتسييا پرەزيدەنتٸ ەممانيۋەل ماكرون قازاق مەكتەپتەرٸندە فرانتسۋز تٸلٸن وقىتۋدى ۇسىندى. بۇل تۋرالى ول اقوردادا مەملەكەت باسشىسى قاسىم-جومارت توقاەۆپەن ٶتكەن كەڭەيتٸلگەن كەزدەسۋدە ايتتى, دەپ حابارلايدى Sputnik قازاقستان.
"بٸزگە فرانتسۋز تٸلٸن وقىتۋ قازاق مەكتەپتەرٸنە قايتا ورالعانى ٶتە ماڭىزدى. قازٸرگٸ جاعدايدى ٶزگەرتۋگە بار كٷش-جٸگەرٸمٸزدٸ سالۋعا دايىنبىز. مەن بٸزدٸڭ بٸلٸم بەرۋ ۇيىمدارى اراسىندا قول قويىلعان ٷكٸمەتارالىق كەلٸسٸمگە زور ٷمٸت ارتامىن", - دەدٸ ماكرون كەڭەيتٸلگەن كەزدەسۋدە.
فرانتسييا پرەزيدەنتٸ 2024 جىلعى قىركٷيەكتەن باستاپ فرانتسۋز-قازاق ۋنيۆەرسيتەتٸ جۇمىس ٸستەيتٸنٸن اتاپ ٶتتٸ.
"ستۋدەنتتەر اراسىنداعى بايلانىستىڭ دامىعانى, ستۋدەنتتەرٸمٸزگە ارنالعان ستيپەندييالاردىڭ بولعانى ٶتە ماڭىزدى. سونداي-اق مەن پاريجدە سٸزدٸڭ ەلٸڭٸزدٸڭ مەدەني مۇراسىنا ارنالعان كٶرمەنٸ ٶتكٸزۋ تۋرالى باستاماڭىزدى قولدايمىن. گيمە مۋزەيٸنٸڭ تٶراعاسى بٷگٸن مەنٸمەن بٸرگە كەلدٸ, قازٸر بٸز كەلەسٸ جىلى ٶتكٸزۋ مٷمكٸندٸگٸن تالقىلايمىز", - دەدٸ ماكرون.
ايتا كەتەيٸك, بٷگٸن, 1 قاراشادا فرانتسييا پرەزيدەنتٸ ەممانيۋەل ماكرون قازاقستانعا رەسمي ساپارمەن كەلدٸ. ماكروننىڭ ساپارى بٸر كٷنگە سوزىلادى.
