الماتىدا كٶلٸك تۇراعىنا تالاسقان كٶرشٸلەر اراسىنداعى جانجال قايعىلى جاعدايعا ۇلاستى. موينىنان پىشاق جاراقاتىن العان 37 جاستاعى دانيل ششەتنيكوۆ اۋرۋحانادا كٶز جۇمدى. كٷدٸكتٸ ۇستالىپ, قاماۋعا الىندى, دەپ حابارلايدى ult.kz.
كتك ارناسىنىڭ مەلٸمەتٸنشە, وقيعا 4 قازاندا بولعان. تۋىستارىنىڭ ايتۋىنشا, ٷيٸنە ورالعان دانيل تۇراقتا تۇرعان بٶتەن كٶلٸكتٸ كٶرٸپ, كٶرشٸسٸنەن ونى باسقا جەرگە قويۋدى سۇراعان. ارادا جانجال تۋىنداپ, كەيٸن كٶمەككە كەلگەن ەر ادامنىڭ بٸرٸ وعان پىشاق سۇققان.
مارقۇمنىڭ جارىنىڭ سٶزٸنشە, ەر ادام موينىنان جاراقات الىپ, ٷيٸنە قاراي جٷگٸرٸپ, جەدەل جەردەم شاقىرۋدى سۇراعان. دەرٸگەرلەردٸڭ كٶمەگٸنە قاراماستان, ول بٸر اپتادان كەيٸن قايتىس بولدى. مارقۇمنىڭ ارتىندا سەگٸز جاسار ۇلى مەن دٷنيەگە كەلۋٸ جاقىنداعان قىزى قالدى.
پوليتسييا 37 جاستاعى كٷدٸكتٸنٸ ۇستاپ, ۋاقىتشا ۇستاۋ يزولياتورىنا قامادى. اتالعان دەرەك بويىنشا قىلمىستىق ٸس قوزعالعان.
مارقۇمنىڭ تۋىستارى تەرگەۋدٸڭ ەدٸل جٷرگٸزٸلۋٸن تالاپ ەتٸپ, ٸستٸ «ادام ٶلتٸرۋ» بابىنا قايتا سارالاۋدى سۇراپ وتىر.
