قر ەكولوگييا, گەولوگييا جەنە تابيعي رەسۋرستار مينيسترٸ ماعزۇم مىرزاعاليەۆ سەكسەۋٸلدٸ ساقتاپ قالۋ مەسەلەسٸ ٶزەكتٸ ەكەنٸن مەلٸم ەتتٸ, دەپ حابارلايدى "ۇلت اقپارات".
«سەكسەۋٸلدٸ ساقتاپ قالۋ مەسەلەسٸنە ەرەكشە توقتالعىم كەلەدٸ. ەلەم بويىنشا سەكسەۋٸلدٸڭ نەگٸزگٸ بٶلٸگٸ بٸزدٸڭ جەردە ٶسەتٸندٸكتەن, ونى ۇرپاققا امانات ەتۋ ٸسٸنٸڭ ماڭىزى زور», - دەدٸ مينيستر وكق-دا ٶتكەن باسپاسٶز مەسليحاتىندا.
مينيستر 2023 جىلعا دەيٸن سەكسەۋٸلدٸڭ بارلىق تٷرٸن شابۋعا تىيىم سالىنعانىن ەسكە سالدى. 2017 جىلدان باستاپ رەسپۋبليكانىڭ ساۋدا نٷكتەلەرٸندە سەكسەۋٸلدٸ ساتۋعا شەكتەۋ قويىلعان.
«بۇل ٸسكە باسىمدىق بەرۋٸمٸز كەرەك. ونىڭ نەگٸزگٸ ەكٸ سەبەبٸ بار: بٸرٸنشٸسٸ – دالانىڭ شٶلگە اينالىپ كەتپەۋٸمەن كٷرەس. ەكٸنشٸسٸ, توپىراقتىڭ تۇزدانىپ كەتۋٸنٸڭ الدىن الۋ كەرەك. سول سەبەپتٸ سەكسەۋٸلدٸ ساقتاپ قالۋ ٷشٸن جەكە باعدارلاما دايارلادىق. وسى رەتتە مەيرامحانالار مەن دەمحانالاردىڭ يەلەرٸن سەكسەۋٸلدٸ جاقپاۋعا شاقىرامىن. سەبەبٸ ول – ۇلتتىق قۇندىلىعىمىز. ٶكٸنٸشكە قاراي, ول قاسيەتتٸ اعاشتى برەندٸمٸز دەپ بٸلمەي, كەۋاپ پىسىرۋعا پايدالاناتىندار بار. بۇل مەسەلەگە كەلگەندە تٷپكٸلٸكتٸ وي-پايىمدارىمىزدى ٶزگەرتۋٸمٸز كەرەك», - دەدٸ ول.
