...سونىمەن, پاۆلوداردا لەنين كٶشەسٸنٸڭ اتاۋىن «استانا» دەپ ٶزگەرتۋ مەسەلەسٸ بويىنشا ٶتكٸزٸلگەن قوعامدىق تىڭداۋدا جاڭا اتاۋعا 8 دەپۋتاتتىڭ تەك بٸرەۋٸ: ۆيكتور دەيمۋند قانا قارسى شىقسا, قالالىق مەسليحاتتىڭ سەسسيياسىندا 20 دەپۋتاتتىڭ بەرٸ بٸر كٸسٸدەي قولداپ داۋىس بەردٸ! بۇل – جەرگٸلٸكتٸ پاتشاشىل-كەڭەسشٸل توپتىڭ شەبٸ بۇزىلدى دەگەن سٶز.
ەندٸ الدىمىزدا – «كۋتۋزوۆ» پەن «سۋۆوروۆ»... ەكەۋٸ رەسەيلٸكتەر ٷشٸن قاھارماندار سانالعانىمەن, قازاقستاندىقتار ٷشٸن ەشكٸم ەمەس. بولشەۆيكتەر 1919 جىلى اتىپ تاستاعان پاتشازادا پاۆەل رومانوۆتىڭ دا ەرتٸستٸڭ كەرەكۋ-باياناۋىل ٶڭٸرٸنە ەش قاتىسى جوق ەدٸ. سوندا دا ەسٸمدەرٸ ەسپەتتەلۋدە. ال وسى ٶڭٸردٸ سىرتقى جاۋلاردان قورعاعان ولجاباي, جاسىباي, مالايسارى باتىرلاردىڭ اتىندا كٶشە جوق...
بۇرناعى جىلدارى جەرگٸلٸكتٸ تەۋەلسٸز ورىستٸلدٸ باسىلىمداردىڭ بەتتەرٸندە قورعانىس ۇيىمداستىرىپ بەت قاراتپاعان ەلگٸ توپ, ەرينە, ٶڭٸردە ونوماستيكا ساياساتىنىڭ جٷرگٸزٸلۋٸنە ەلٸ دە شاما-شارقىنشا قارسىلاسىپ باعادى, تٸپتٸ شابۋىلعا شىعۋى دا مٷمكٸن.
«گورودسكايا نەدەليا» گازەتٸندە (03.08.2005 ج.) «نە حوچۋ بىت كەرەكۋيتسەم!» اتتى جارييالانىمدا بٸرەۋ بىلاي دەپ جازعان: «داۆايتە داديم پرەدسەداتەليام وبلاستنوي ي گورودسكوي وناماستيچەسكيح كوميسسيي زۆانييا «پوچەتنىي كەرەكۋەتس» ي نا ەتوم زاكونچيم پولەميكۋ.
پەرەليتسوۆششيكي – مانكۋرتتسى,
ۆام, وناماستيكي, كريچۋ,
چتو بى بىت «پوچەتنىم كەرەكۋيتسەم»
يا نيكوگدا نە زاحوچۋ!».
بۇل تاقپاقتىڭ اۆتورى – قاتارداعى ازاماتتاردىڭ بٸرٸ ەمەس, كەڭەستٸك كەزەڭدە ەكٸ رەت پاۆلودار وبلىسى پارتييا كوميتەتٸنٸڭ بٸرٸنشٸ حاتشىسى قىزمەتٸن اتقارعان بەلگٸلٸ پارتشەنەۋنٸك بوريس ۆاسيلەۆيچ يساەۆ! ٶكٸنٸشتٸسٸ, قازاقستاننىڭ ٸرٸ وبلىسىن ەكٸ رەت باسقارعان قارت كوممۋنيستٸڭ مەملەكەتتٸك سانا ەمەس, ەتنيكالىق ساناعا بوي ۇرعاندىعى. سونسىن, «پوچەتنىي پاۆلودارەتس», «پوچەتنىي موسكۆيچ» دەگەن قۇرمەتتٸ اتاقتاردىڭ بولمايتىنى سيياقتى «پوچەتنىي كەرەكۋيەتس» دەگەن اتاقتىڭ دا بولۋى مٷمكٸن ەمەستٸگٸن تالاپكەر اقىننىڭ بايىپتاي الماۋى.
شىنىندا, قازٸردٸڭ ٶزٸندە پاۆلودار وبلىسىنىڭ ەكٸمٸ بولات باقاۋوۆقا قارسى شابۋىل باستالىپ كەتتٸ. ەلەۋمەتتٸك جەلٸلەردە ٶڭٸر باسشىسىن مىسقىلداپ ەجۋالايتىن كاريكاتۋرالار تاراتىلۋدا. بٸر سۋرەتتە بولات جۇمابەكۇلى: «بەكە, قايداسىڭ?» دەگەن ساۋالعا «استانادا جٷرمٸن» دەپ جاۋاپ جاۋاپ بەرەدٸ...
بۇنىڭ استارىندا «لەنين كٶشەسٸ اتاۋىنىڭ «استاناعا» اۋىستىرىلۋى ايماق باسشىسى ب.ج. باقاۋوۆتىڭ قولداۋىمەن جٷزەگە اسىرىلدى» دەگەن مەگزەۋ جاتىر. بٸردە-بٸر ەكٸمنٸڭ تۇسىندا قوزعالماعان لەنين اتاۋىنىڭ دەل بولات جۇمابەكۇلىنىڭ كەزٸندە ٶزگەرتٸلۋٸ, ەرينە, كٷدٸك كەلتٸرمەي قويمايدى.
راس, ەلگٸلەردٸڭ پايىمداۋىن جوققا شىعارا المايمىز. تەك الداعى ۋاقىتتا ايماق باسشىسى: «ەلەۋ, بەكە, قايداسىڭ?» – دەگەن ساۋالعا «ە, ٶزٸمٸزدٸڭ كەرەكۋدە جٷرمٸن عوي»... – دەپ جاۋاپ بەرسە, نۇر ٷستٸنە نۇر بولار ەدٸ!
ارمان قاني,
پاۆلودار قالاسى
