قىزىلوردا وبلىسىندا كوروناۆيرۋس ينفەكتسيياسىنان 15 سەۋٸردە تاعى 2 ادام ايىعىپ شىقتى, دەپ حابارلايدى "ۇلت اقپارات".
بۇل جٶنٸندە قىزىلوردا وبلىستىق دەنساۋلىق ساقتاۋ باسقارماسى مەلٸم ەتتٸ.
«ولاردىڭ ەمٸ تولىق اياقتالدى. ناۋقاستاردان 2 رەت تەست سىناماسى الىندى. سىناما نەتيجەسٸ ولاردىڭ ساۋ ەكەنٸن كٶرسەتتٸ. ناۋقاستار كوروناۆيرۋس ينفەكتسيياسىنان تولىق ايىقتى دەگەن قورىتىندى جاسالدى. ولار وبلىستىق جۇقپالى اۋرۋلار اۋرۋحاناسىنان ٷيلەرٸنە شىعارىلادى. ٸندەتتٸ جەڭگەن 2 ناۋقاس تا قىزىلوردا قالاسىنىڭ تۇرعىنى. ەمدەلۋشٸلەر الداعى ۋاقىتتا 14 كٷن بويى ايماقتىق دەرٸگەرلەر باقىلاۋىندا بولادى», - دەپ مەلٸم ەتتٸ ۆەدومستۆودان.
ايتا كەتەيٸك, وبلىسىمىزدا بۇعان دەيٸن 2 ناۋقاس اتالعان ٸندەتتەن ايىققان بولاتىن. قازٸر بارلىعى 4 ناۋقاس كوروناۆيرۋس ينفەكتسيياسىنان جازىلىپ شىققان.
بٷگٸنگٸ تاڭدا قىزىلوردا وبلىسىندا كوروناۆيرۋس ينفەكتسيياسى قويىلعان 127 ادام بار.
