ۋكراينادا بٷگٸن 73 جىل بۇرىن قىرىم تاتارلارىن دەپورتاتسييالاعاندا قۇربان بولعانداردى ەسكە الىپ جاتىر. رەسەي بيلٸگٸ بۇل كٷنٸ اننەكسييالاپ العان قىرىمدا اكتسييا ٶتكٸزۋگە تىيىم سالعان. باحچيسارايدا پوليتسييا قىرىم تاتارلارى بۇرىن جىل سايىن وسى كٷنٸ گٷل قويىپ جٷرگەن ەسكەرتكٸش تاستى قورشاپ قويدى.
ازاتتىقتىڭ ورىس رەداكتسيياسى تٸلشٸسٸنٸڭ حابارلاۋىنشا, سيمفەروپولدە رەسەيدە قىزمەتٸنە تىيىم سالىنعان قىرىم تاتارلارى مەدجليسٸنٸڭ مٷشەسٸ احتەم چييگوزدىڭ ٸسٸ بويىنشا 18 مامىرعا بەلگٸلەنگەن سوت وتىرىسى "تەحنيكالىق سەبەپتەرگە" بايلانىستى ٶتپەي قالعان.
كەشە قىرىم تاتارلارىنىڭ بٸرنەشە بەلسەندٸسٸنە پروكۋراتۋرا رۇقسات ەتٸلمەگەن كٶپشٸلٸك قاتىساتىن شارا ٶتكٸزبەۋ تۋرالى جازباشا ەسكەرتۋ تاپسىرعان. پروكۋراتۋرا مەدجليس رەسەي بيلٸگٸ رۇقسات بەرمەگەن بٸرنەشە اكتسييا ۇيىمداستىرايىن دەپ جاتىر دەگەن اقپارات تٷسكەنٸن ايتادى.
1944 جىلى 18 مامىردا قىرىم تٷبەگٸنەن ورتالىق ازيياعا قىرىم تاتارلارىنىڭ العاشقى لەگٸ جٶنەلتٸلدٸ. ٷش كٷندە قىرىمنان ورتالىق ازييا ەلدەرٸ مەن سٸبٸرگە 180 مىڭنان استام ادام كٷشتەپ قونىستاندىرىلعان. ولاردىڭ 30 مىڭنان استامى العاشقى جىلى اشتىق پەن سۋىقتان قۇربان بولعان. ۋكراينادا جىل سايىن دەپورتاتسييا قۇرباندارىن ەسكە الادى. رەسەي بيلٸگٸ 2014 جىلى قىرىمدى اننەكسييالاپ العان سوڭ قىرىم تاتارلارىنىڭ بەلسەندٸلەرٸنە بۇل كٷنٸ كٶپشٸلٸك شارالار ۇيىمداستىرۋعا تىيىم سالعان.
