قىرعىزستان پرەزيدەنتٸ المازبەك اتامباەۆ قازاقستاننان 100 ميلليون دوللار كٶمەك الۋ تۋرالى كەلٸسٸمدٸ بۇزاتىن زاڭعا قول قويدى.
"پرەزيدەنت "قىرعىزستان ٷكٸمەتٸ مەن قازاقستان ٷكٸمەتٸ اراسىنداعى قازاقستاننىڭ 100 ميلليون دوللار كٶلەمٸندە تەحنيكالىق كٶمەك كٶرسەتۋ تۋرالى كەلٸسٸمٸنٸڭ كٷشٸن جويۋ تۋرالى" زاڭعا قول قويدى" دەلٸنگەن قىرعىزستان پرەزيدەنتٸ اپپاراتىنىڭ بٷگٸن تاراتقان حابارلاماسىندا.
كەلٸسٸمنٸڭ بۇزىلعانى المازبەك اتامباەۆ قازاقستان باسشىلىعىنىڭ اتىنا كەزەكتٸ رەت سىن ايتىپ, سٶككەن كٷننٸڭ ەرتەڭٸندە جارييالانىپ وتىر.
قىرعىزستان سىرتقى ٸستەر مينيسترلٸگٸنە بەلگٸلەنگەن تەرتٸپتە قازاقستان ٷكٸمەتٸنە كەلٸسٸم مەن ول تۋرالى حاتتامانىڭ بۇزىلعانىن ەسكەرتۋ تاپسىرىلدى.
قازاقستان مەن قىرعىزستان ٷكٸمەتتەرٸ اراسىنداعى ەكونوميكالىق ينتەگراتسييا جاعدايىندا ەكونوميكالىق ىنتىماقتاستىقتى دامىتۋ تۋرالى كەلٸسٸمگە 2016 جىلدىڭ 26 جەلتوقسانىندا سانكت-پەتەربۋرگتەگٸ جوعارى ەۋرازييا ەكونوميكالىق كەڭەسٸنٸڭ جيىنىندا قول قويىلىپ, بيىل شٸلدەدە قازاقستاندا راتيفيكاتسييالانعان.
قازاقستان سىرتقى ٸستەر مينيسترلٸگٸ 24 قازاندا قىرعىزستان استانانى اتالعان كەلٸسٸمنٸڭ كٷشٸن جويۋ پروتسەسٸن باستاعانىن ەسكەرتكەنٸن حابارلاعان. بٸشكەك قىرعىزستاننىڭ قازاقستان قارجىسىن الۋعا مٷددەلٸ ەمەسٸن مەلٸمدەگەن.
قىرعىزستان قازاقستان كٶمەگٸنەن ەكٸ ەل اراسىنداعى قارىم-قاتىناس ناشارلاي باستاعان سوڭ باس تارتىپ وتىر. قازاقستان 10 قازاننان باستاپ قىرعىزستانمەن شەكاراداعى تەكسەرۋدٸ كٷشەيتٸپ, ونىڭ سالدارىنان شەكارادا ۇزىن-سونار كەزەك پايدا بولعان. استانا شەكاراداعى تەكسەرۋدٸ كٷشەيتۋدٸ "قىرعىزستاننان كەلەتٸن كونتراباندامەن كٷرەس" دەپ تٷسٸندٸرگەن. بٸشكەك بولسا قازاقستان جاعى شەكارادا "قولدان كەدەرگٸ جاساپ وتىرعانىن" ايتادى.
