«بارىس» بٷگٸن قۇرلىقتىق حوككەي ليگاسىنداعى كەزەكتٸ ويىنىن سىرت ايدىندا رەسەيدٸڭ تسسكا (مەسكەۋ) كومانداسىمەن ٶتكٸزدٸ, دەپ حابارلايدى قازاقپارات.
كەزدەسۋ بارىسىندا رەسەيلٸك كلۋب تٸزگٸندٸ ٶز قولىنا الۋعا تىرىستى. نەتيجەسٸندە ولاردىڭ قاتارىنان نيكيتا نەستەروۆ 10, انتون سلەپىشەۆ 12-مينۋتتاردا قوس شايبا سوعىپ كەتتٸ.
ەكٸنشٸ كەزەڭدە قازاقستاندىق كلۋب حوككەيشٸلەرٸ تارازى باسىن تەڭەستٸرۋگە ۇمتىلدى. ويىننىڭ 30-مينۋتىندا كيورتيس ۆالك ەسەپ ايىرماسىن قىسقارتتى.
ٷشٸنشٸ كەزەڭدە «بارىس» حوككەيشٸلەرٸ العا قاراي ۇمتىلدى. الدىمەن 41-مينۋتتا ياكوب بەرگلۋند تارازى باسىن تەڭەستٸرسە, ودان كەيٸن داررەن ديتس 42, 43-مينۋتتا كٶزدەگەن نىسانادان مٷلت كەتكەن جوق.
ال 44-مينۋتتا تسسكا ويىنشىسى ماتۆەي گۋسكوۆ «بارىس» قاقپاسىنان ساڭىلاۋ تاپتى. ويىننىڭ 50-مينۋتىندا قازاقستاندىق ەليحان ەسەتوۆ باسىمدىقتى ارتتىرسا, 59-مينۋتتا ياكۋب ليليا قورىتىندى ەسەپتٸ بەلگٸلەدٸ.
وسىلايشا «بارىس» قارسىلاسىن 6:3 ەسەبٸمەن جەڭدٸ.
ەندٸ ەلوردالىق كلۋب 16 قىركٷيەكتە سىرت ايدىندا لاتۆييانىڭ «دينامو» (ريگا) كومانداسىمەن كەزدەسەدٸ.
ەكٸ كوماندا بٷگٸنگە دەيٸن 25 مەرتە شەبەرلٸك بايقاستى. ونىڭ جەتەۋٸ «بارىستىڭ» باسىمدىعىمەن اياقتالسا, قالعانىندا رەسەيلٸك كلۋبتىڭ مەرەيٸ ٷستەم بولدى.
ەسكە سالساق, تۋرنيردٸڭ ەلوردادا ٶتكەن بيىلعى العاشقى تٶرت ويىنىنىڭ ٷشەۋٸندە «بارىس» قارسىلاستارىنا ەسەپ جٸبەرٸپ قويدى.
