بٷگٸن استانالىق «بارىس» قۇرلىقتىق حوككەي ليگاسىنداعى كەزەكتٸ ويىنىن ەلوردادا رەسەيدٸڭ «لوكوموتيۆ» (ياروسلاۆل) كومانداسىنا قارسى ٶتكٸزدٸ, دەپ حابارلايدى قازاقپارات.
كەزدەسۋ بارىسىندا ەكٸ كوماندا تارتىستى ويىن ٶتكٸزدٸ. ەسەپتٸ بٸرٸنشٸ بولىپ رەسەيلٸك حوككەيشٸلەر اشتى.
ويىننىڭ 15-مينۋتىندا ارتيوم انيسيموۆ ەسەپ اشسا, 27-مينۋتتا ماكسيم شالۋنوۆ ەسەپتٸ ٷستەمەلەي تٷستٸ.
بۇدان كەيٸن «بارىس» حوككەيشٸلەرٸ العا قاراي ۇمتىلدى. دەگەنمەن ەكٸنشٸ كەزەڭدە تابلوداعى ەسەپ ٶزگەرٸسسٸز قالدى.
ٷشٸنشٸ كەزەڭدە قازاقستاندىق كوماندا گول سوعۋ مٷمكٸندٸگٸن ٸزدەدٸ. نەتيجەسٸندە 43-مينۋتتا ياكۋب ليليا كٶزدەگەن نىسانادان مٷلت كەتكەن جوق. قازاقستاندىق حوككەيشٸلەر ەندٸگٸ كەزەكتە تارازى باسىن تەڭەستٸرۋگە كٷش سالدى. الايدا ٶزٸنٸڭ قاقپاسىنا قاتارىنان ەكٸ گول جٸبەرٸپ الدى. بۇل گولدار 54-مينۋتتا الەكسەي مارچەنكونىڭ, 57-مينۋتتا پاۆەل كۋدرياۆتسەۆتٸڭ ەنشٸسٸنە جازىلدى.
ايتا كەتسەك, ەلوردالىق كلۋب ٷشٸن «لوكوموتيۆ» - قولايسىز قارسىلاستىڭ بٸرٸ. ەكٸ كوماندا بٷگٸنگە دەيٸن 24 مەرتە كەزدەسكەن.
ونىڭ 8-ٸندە قازاقستاندىق حوككەيشٸلەر جەڭٸسكە جەتسە, قالعانىندا قارسىلاس كلۋبتىڭ مەرەيٸ ٷستەم بولدى.
ەسكە سالساق, بۇدان بۇرىن «بارىس» بەلارۋستٸك «ديناموعا» ەسە جٸبەردٸ.
ەندٸ «بارىس» كەلەسٸ ويىنىن 24 قازاندا رەسەيدٸڭ «سەۆەرستال» (چەرەپوۆەتس) كومانداسىنا قارسى ٶتكٸزەدٸ.
