سىناقتان سٷرٸنگەن ادام
(ەڭگٸمە)
تەمٸربەك ەيەلٸمەن بٸرگە قالانىڭ ورتالىق بازارىندا جٷرگەن. ىعى-جىعى حالىق. ادامنىڭ كٶپتٸگٸنەن اياق الىپ جٷرە المايسىڭ. ەيەلٸ گٷلبارشىن اداسىپ قالمايىن دەگەندەي-اق كٷيەۋٸن تاس قىپ قولتىقتاپ الىپ, العا قاراي تارتىپ كەلە جاتقان ەدٸ. كەنەت ٶتە بٸر تانىس ٷن قۇلاعىنا جەتتٸ. كٶپ جىل بۇرىن ٷنەمٸ ەستٸپ, ەبدەن جادىندا ساقتالىپ قالعان داۋىسقا ەلەڭ ەتە قالعان گٷلبارشىن جالت بۇرىلدى. بٸراق, ٶز كٶزٸنە ٶزٸ سەنبەي كٷيەۋٸن توپ ورتاسىنان شەتكە قاراي سٷيرەلەپ, ەلگٸ داۋىس يەسٸنە قاراي بۇرىلدى.
قالىڭ نٶپٸردەن سەل عانا سىتىلىپ شەتكە شىققان سوڭ جۇرتتان قايىر تٸلەپ تۇرعان كٸر-قوجالاق كٸسٸنٸڭ قاسىنا گٷلبارشىن ەي-شاي جوق, جەتٸپ باردى. تەمٸربەك تاڭدانىڭقىراپ قالدى:
- گٷلەكە, مۇنىڭ نە?
- سەل كٷتە تۇر! – دەدٸ دە, ول ەلگٸ قايىرشىنىڭ الاقانىنا بەسمىڭدىق
قىزىل الا تەڭگەنٸ تاستادى دا:
- نيەتقالي اعاي, مۇنىڭىز نە, سٸزگە نە بولعان? – دەمەسٸ بار ما.
- اۋ, قاراعىم! مەنەن ەشتەڭە سۇراما! بەرگەنٸڭدٸ قۇداي ساعان ون ەسە عىپ
قايتارسىن! بٸلەمٸن, مەنٸڭ قول استىمدا ٸستەگەن شىعارسىڭ, ەلدە, دەرٸس الدىڭ. ەيتەۋٸر تٷرٸڭ تانىس, كٶزگە جىلى ۇشىرايسىڭ. ەشتەڭە سۇراما! – دەپ ەلگٸ قايىرشى بۇرىلىپ كەتە بەردٸ.
ەرلٸ-زايىپتى ەكەۋٸ دە ٶز جٶندەرٸنە كەتكەن. اۋىلداعى تۋىس-تۋعاندارىنا كەرەك-جاراعىن, تاپسىرىپ ايتقان ونى-مۇنىسىن ساتىپ الىپ كٶلٸكتەرٸنٸڭ جٷك سالعىشىنا تيەپ العان سوڭ ولار جولعا شىعىپ كەتكەن.
- ال, جاڭاعى قايىرشى سەنٸڭ ۇستازىڭ بولدى ما, سوندا? – دەپ, تەمٸربەك
ۇزاق جولدى قىسقارتۋدىڭ قامىمەن ەيەلٸنە ساۋال تاستادى.
- ول كٸسٸ مەن وقۋ بٸتٸرٸپ ماگيستراتۋراعا تٷسكەن جىلى بٸزدٸڭ رەكتور
بولعان ەدٸ – دەپ, اسىقپاي سٶزٸن باستاعان گٷلبارشىن ەڭگٸمەنٸڭ تيەگٸن اعىتتى.
نيەتقالي اعايدى بٸزگە ساباق بەرگەن كەزٸنەن جاقسى تانيمىن. ول كٸسٸنٸڭ ەيەلٸ دە ۋنيۆەرسيتەتتە دەرٸس بەردٸ. ۇلدارى مەن قىزدارىن دا سىرتتاي بٸلەتٸنبٸز. سونداي جاراسىمدى جۇپ, كٶرسەڭ كٶز توياتىن جاندار, ٶتە باقىتتى وتباسى ەدٸ. ول كٸسٸ رەكتور بولعاندا بەرٸمٸز دە قۋانىپ ەدٸك. بٸراق, ونداي مەنساپتىڭ ٶزٸ ادامعا سىناق ٷشٸن بەرٸلەتٸن سيياقتى عوي. سول سىناقتان بۇل كٸسٸ ەۋ باستا وڭباي سٷرٸنگەن ادام.
ماگيسترانتتارعا ارنالعان جاتاقحانانىڭ شاعىن بٶلمەسٸندە كٶرشٸ قالادان كەلگەن جايناگٷل دەگەن قىز ەكەۋٸمٸز بٸرگە تۇردىق. تاڭداي قاقتىرارلىق كەرەمەت سۇلۋلىعى بولماسا دا, كەلبەتٸ تارتىمدى, اشىق-جارقىن جايلى مٸنەزدٸ قىز. ٶزٸنٸڭ ايتۋىنا قاراعاندا, ەكە-شەشەدەن ەرتە ايىرىلعان, اعا-جەڭگەنٸڭ قولىندا ٶسٸپ, تۇرمىستىڭ تاۋقىمەتٸن بٸرشاما تارتقان جان. سوعان قاراماستان مۇڭايۋ, جابىرقاۋ دەگەندٸ بٸلمەيتٸن اسا بٸر كٶڭٸلدٸ قىز. قاشان كٶرسەڭ, ەلدە بٸر وقيعانى كٷلكٸگە اينالدىرىپ, اينالاسىن بٸر سەرپٸلتٸپ تاستاپ جٷرەتٸن.
شىنىن ايتسام, مەن ودان دەل سونداي وعاش قىلىقتى كٷتپەگەن ەدٸم. كەيٸن كٶزٸم جەتكەندە جاعامدى ۇستادىم عوي. باقانداي بٸر جىل بٸرگە تۇرىپ, بٸتە قايناسقان قۇربىمنىڭ ٶزٸمە بٸلٸم بەرگەن ۇستازىمنىڭ, جاي ۇستازىم عانا ەمەس-اۋ, وقۋ ورنىن باسقارىپ وتىرعان باسشىمنىڭ وتباسىن ويرانداپ, نەشە تٷرلٸ سۇمدىققا بارىپ جٷرگەنٸن دەر كەزٸندە بٸلمەپپٸن دە عوي. بۇل مەنٸڭ اڭعالدىعىم با, اق كٶڭٸلدٸگٸم بە, ەلدە, اقىماقتىعىم با, ول جاعىن بٸلمەيمٸن.
سوڭعى ايلاردا جايناگٷل جاتاقحاناعا قونۋدى سيرەتكەن بولاتىن. مەن كٶبٸنەسە, جالعىز تٷنەپ, جەكە تۇرىپ جاتتىم. بۇل بٸر جاعىنان ماعان ىڭعايلى دا ەدٸ. قاسىمدا ەشكٸم بولماعانى, وڭاشا تۇرۋىم ديسسەرتاتسييامدى جازۋىما, زەرتتەگەن ماتەريالدارىما تالداۋ جاساۋىما, عىلىمي ماقالالار ەزٸرلەپ, جارىققا شىعارۋىما كٶپ سەپتٸگٸن تيگٸزدٸ.
اندا-ساندا دەمالىس كٷندەرٸ عانا كەلٸپ-كەتەدٸ. ٶزٸنٸڭ ايتۋىنا قاراعاندا, ەلدە بٸر دوستارىمەن بٸرگە پەتەردە تۇرىپ جاتقان كٶرٸنەدٸ. ساباقتىڭ اراسىندا ماڭىزدى شارۋالارمەن اينالىسىپ, ەجەپتەۋٸر اقشا تاۋىپ جٷرگەنٸن دە ايتقان. كيٸم-كيٸسٸ بۇرىنعىدان ەلدە قايدا جاقسارىپ, قىمبات ەشەكەيلەرمەن سەندەنە باستاعانىنا قاراعاندا, جاعدايى جامان بولماعانى انىق ەدٸ.
ٶزٸ تٸس جارىپ كٶپ ەشتەڭە ايتپاعان سوڭ مەن دە قازبالاپ سۇراپ جاتپادىم. «قىزدىڭ كٶزٸ قىزىلدا» دەمەكشٸ, اندا-ساندا كەلگەندە, انا كيٸمٸن بٸر كيٸپ, مىنا القاسىن بٸر تاعىپ كٶرٸپ, اينانىڭ الدىندا شىر-كٶبەلەك اينالىپ دەگەندەي مەز بولىسىپ قالامىز. ٶزٸ دە قۇر قول كەلمەيدٸ, ماعان تورت دەيسٸڭ بە, قىمبات شوكولاد دەيسٸڭ بە, كەيدە, مەنٸڭ قولىم جەتە بەرمەيتٸن جەمٸس-جيدەكتٸڭ تەۋٸرٸن تارتۋ ەتٸپ كەتەدٸ.
سوڭعى بٸر-ەكٸ ايدا ول مٷلدەم جوعالىپ كەتتٸ. ماماندىعىمىز بٶلەك ەرٸ وقۋ عيماراتىمىز بٸر بٸرٸنەن وقشاۋ بولعاندىقتان ونى ۋنيۆەرسيتەتتە كەزدەستٸرە بەرمەيسٸڭ.
سٶيتٸپ جٷرگەندە بٸر كٷنٸ جاتاقحاناعا رەكتوردٸڭ ەيەلٸ كەلدٸ. ول كٸسٸ ستۋدەنت كەزٸمدە ساباق بەرگەندٸكتەن جاقسى تانيتىن ەدٸم. ٶڭٸ سولعىن, تٷرٸ تۇنجىراپ كەتكەن, بٸرتٷرلٸ كٶڭٸلسٸز كٶرٸندٸ. كٷتپەگەن قۇدايى قوناقتى كٶرگەندە تاڭدانىپ قالدىم دا:
- وتىرىڭىز, اپاي! – دەپ, ورىندىق ۇسىندىم.
- گٷلبارشىن وقۋ قالاي?
- جاقسى اپاي.
- كەلگەنٸمە تاڭدانىپ وتىرعان شىعارسىڭ? قاسىڭداعى قۇربىڭ قايدا?
- جايناگٷل مە?
- يە, سول!
- شىنىن ايتسام, اپاي, جاينانى كٶرمەگەنٸمە ايدان استى.
حابارلاسپادى, سوڭعى كەزدە.
- تٷسٸنٸكتٸ, جارايدى. مەن كەتەيٸن.
- اپاي وتىرا تۇرىڭىز! مەن شاي قويايىن, سٸزگە.
- ەش ەۋٸرە بولما, اينالايىن! اسىعىس ەدٸم – دەدٸ دە, شىعىپ كەتتٸ.
ول كٸسٸنٸڭ سۋىت كەلٸپ, سۋىت كەتۋٸنە مەن اسا مەن بەرگەن دە جوقپىن, تٸپتٸ, ۇمىتىپ تا كەتٸپپٸن.
بٸر كٷنٸ رەكتورٸمٸزدٸڭ ٶز ەيەلٸنەن اجىراسىپ, جايناگٷلمەن باس قوسقانىن ەستٸگەندە جاتاقحاناداعى ونىڭ تانىس-بٸلٸستەرٸنٸڭ بەرٸ دە ەستەرٸنەن تانىپ قالا جازدادى. اپايىمىز بالا-شاعاسىن الىپ كٶرشٸ قالاعا كٶشٸپ كەتٸپتٸ. «جاقسى يت ٶلٸمتٸگٸ كٶرسەتپەيدٸ» دەگەندەي, اۋلاق كەتەيٸن دەپ شەشكەن بولسا كەرەك.
كٶكتەمنٸڭ العاشقى كٷندەرٸنٸڭ بٸرٸندە اۋلادا كٷن شۋاقتاپ وتىرعانمىن. اناندايتىن جەرگە سۋ جاڭا قىمبات كٶلٸك كەلٸپ توقتادى. «جاقسىنى كٶرمەك ٷشٸن» دەمەكشٸ, ماڭايىڭا كەلٸپ ايناداي جارقىراعان ەسەم كٶلٸك توقتاسا, وعان قالاي كٶزٸڭ تٷسپەيدٸ. كٶلٸكتٸڭ جٷرگٸزۋشٸ جاعىنداعى ەسٸگٸنەن ٷلدە مەن بٷلدەگە ورانعان جايناگٷل تٷسٸپ, ىرعالىپ ماعان قاراي كەلە جاتىر. امان-سەلەمٸن ادامشا الدىم. بٸراق, جاساعان ٸسٸ مەن قىلىعىنا تٶزە المادىم.
- جاينا, مۇنىڭ نە? ٶزٸڭنەن باقانداي وتىز جاس ٷلكەن اداممەن...
- ماحاببات جاسقا قارامايدى, قۇربىم!
- بٸرەۋدٸڭ وتباسىن ويرانداپ, باقىتقا كەنەلەسٸڭ بە?
- گۋليا, تىم بولماسا سەن جازعىرماشى! جۇرتتىڭ بەرٸ ونسىز دا تەرٸس
اينالىپ, يت تەرٸمدٸ باسىما قاپتاپ جاتىر. سەن تٷسٸنۋگە تىرىسشى! باسقا امالىم بولمادى, مەن ساعان بەرٸن ايتايىنشى... مەنٸڭ بٸر ويىم بار...
- ويىڭ قۇرىپ كەتسٸن, سەنٸڭ! بٶلمەدەن ونى-مۇنىڭدى ال دا, قاراڭدى
باتىر! وسىدان بىلاي مەنٸ قۇربىم دەمە! سەنٸمەن ەندٸ, سٶيلەسپەيمٸن دە.
جايناگٷل ٷنسٸز عانا كٶز جاسىن سىعىپ, زاتتارىن جيناستىرىپ الدى دا كەتٸپ قالدى. قانشا جەردەن تاعدىرعا تەلٸسەك تە, دەل مۇنداي سوراقىلىقتى اقتاۋدىڭ ەش جٶنٸ جوق ەدٸ. بۇل وقيعا تەك مەنٸ عانا ەمەس سول جىلى ۋنيۆەرسيتەتتە وقىعان تالاي جاستار ٷشٸن سٷيەككە تاڭبا بولعان ەدٸ. بٸزدٸ قويشى, وقۋ بٸتٸرگەن سوڭ جان-جاققا تاراپ كەتتٸك. تارادىق دەگەندە, مەن ەشقايدا كەتكەن جوقپىن عوي, كافەدرادا قالدىم. ونى ٶزٸڭ دە بٸلەسٸڭ.
رەكتور ەشتەڭە بولماعانداي جينالىستارىن ٶتكٸزٸپ, وقۋ ورنىن باسقارىپ جٷرٸپ جاتتى. وقۋ ورنى باسشىنىڭ ٶزٸنەن ٷش مٷشەلگە تاياۋ جاس كٸشٸ شەكٸرتٸمەن كٶڭٸل جاراستىرىپ, ەيەل, بالا-شاعاسىنان بەزۋٸن ار-ۇيات تۇرعىسىنان قانشا رەت ايىپتاساق تا, زاڭعا قايشى ٸس ەمەس كٶرٸنەدٸ. سوندىقتان, جۇرت نەشە جەردەن سٶگە جامانداسا دا ونىڭ لاۋازىمىنا كەلٸپ-كەتەر ەشتەڭە دە بولمادى. مورالدىق ازعىندىقتى ماي شاممەن قارايتىن باياعىداي كومپارتييا جوق, ەركٸمنٸڭ جەكە شارۋاسى دەلٸنەتٸن زامان بولدى عوي.
مەن ول كەزدە قاتارداعى وقىتۋشىمىن. رەكتورمەن بەتپە بەت كەزدەسۋدٸڭ قاجەتتٸلٸگٸ دە بولا قويمايتىن. جايناگٷل بٸرنەشە رەت تەلەفون سوعىپ, كەزدەسكٸسٸ كەلدٸ, شايعا شاقىردى, قوناق ەتپەك تە بولدى, اتتاپ باسپادىم. ات قۇيرىعىن كەسٸستٸك دەگەندٸ ايتتىم. بەلكٸم, مەنەن ٶزگە بٸرەۋ بولسا, ونداي مٷمكٸندٸكتٸ پايدالانىپ تا باعار ما ەدٸ. مەندە ونداي پيعىل بولمادى. تٸپتٸ, ولاي ويلاۋدىڭ ٶزٸ جيٸركەنٸشتٸ سەكٸلدٸ كٶرٸندٸ.
سٶيتٸپ جٷرگەندە, ياعني, سەن ەكەۋٸمٸز قوسىلاردان بٸر جىل بۇرىن عوي دەيمٸن, جايناگٷل قۇربىمنىڭ حيكاياسى جۇرتتى تاعى دا دٷر سٸلكٸندٸردٸ. ونىن جايىن جاقسى بٸلەتٸن بٸر قۇربىمىز كەزەكتٸ بٸر وتىرىستا بەرٸمٸزگە تٷگٸن قالدىرماي جايىپ سالعان ەدٸ.
نەگٸزٸ, نيەتقابىل اعايدى جايناگٷلدٸڭ ٶزٸ اينالدىرعان كٶرٸنەدٸ. «بۋىرشىن كٶزٸن سٷزبەسە, بۇقا باس جٸبٸن ٷزبەيدٸ» دەپ حالىق بەكەر ايتپاعان عوي. بٸر-ەكٸ رەت قابىلداۋىنا بارىپ, ىڭعاي تانىتىپ بايقاعان. سوسىن, بٸر رەتٸ كەلگەندە, «بەتتٸڭ ارىن بەلبەۋگە تٷيٸپ» تۇرىپ ماحاببات جارييالاپ, قازٸرگٸ جاستاردىڭ سٶزٸمەن ايتقاندا, سىندىرعان عوي, نيەتقابىل اعاي باستاپقىدا سەنٸڭكٸرەمەگەن بە, ونشا قاتتى جاقىنداتا قويماعانعا ۇقسايدى. دەگەنمەن, جايناگٷل دە وسال سايتان ەمەس, «قىرىق ايلاسى بار» پەلە قىز ەمەس پە. قىلىمسىپ جٷرٸپ, اقىرى دەگەنٸنە جەتكەن عوي. مەيمانحانالار مەن دەمالىس ورىندارىنىڭ ليۋكس بٶلمەلەرٸن تٷگەندەپ بٸتكەن سوڭ تۇرمىس قۇرامىز, قوسىلايىق دەپ قيعىلىق سالسا كەرەك.
جاسى ۇلعايعان, قارت ادام بولا تۇرا قالاي ونىڭ شىرماۋىنا تٷسٸپ قالعانىن كٸم بٸلسٸن, اعايىمىز جايناگٷل نە ايتسا, بەرٸن قالت ەتكٸزبەي ورىنداپ وتىرعان. ەكەۋٸ زاڭدى نەكەگە تۇرماسا دا, نيەتقابىل اعايدىڭ وعان ٶلەردەي سەنگەنٸ سونشالىق, بار جىلجيتىن, جىلجىمايتىن مٷلكٸن تٷگەل سونىڭ اتىنا تٸركەپ بەرە سالعان. زەۋلٸم ٷي دە, تٸپتٸ, قىل اياعى بانكتەگٸ دەپوزيتتٸ دە جايناگٷل ەبٸن تاۋىپ تٷگەلدەي ٶزٸنە جازدىرىپ العان.
ونىمەن قويماي ۋنيۆەرسيتەتتٸڭ قارجىسىنا دا قول سالدىرعان. تام-تۇمداپ ودان دا ٸشكەن-جەگەن تۇستارى بولعان كٶرٸنەدٸ. ونى قويشى, بەرٸنەن قيىنى مىنا وقيعا بولىپتى.
نيەتقابىل اعاي شەتەلدە ٶتكەن بٸر سيمپوزيۋمنەن ەلگە ورالادى. نەگٸزٸ, ول جاقتا ەلٸ دە ٷش كٷن بولۋعا تيٸس ەكەن. بٸراق, مينيسترلٸكتەن شۇعىل شاقىرتقان سوڭ مەرزٸمٸنەن بۇرىن قايتۋىنا تۋرا كەلەدٸ. تاڭعى ساعات تٶرتتە ەۋەجايدان جٷرگٸزۋشٸسٸ كٷتٸپ الىپ ٷيٸنە جەتكٸزەدٸ. قانەن-قاپەرسٸز ٷيٸنە كٸرەدٸ. جاس جۇبايىنا توسىن سىي جاسايىن دەپ ويلاعان اعامىز اسىقپاي دۋشقا كٸرٸپ, جۋىنىپ-شايىنىپ العان سوڭ جاتىن بٶلمەسٸنە كٸرسە, تٶسەكتە جايناگٷلمەن قۇشاقتاسىپ بٸر جٸگٸت تەرەڭ ۇيقىعا باتىپ جاتىر ەكەن دەيدٸ.
ايعايعا باسىپ, وياتسا كەرەك. ال, انا ەكەۋٸ ەش ساسپايتىن كٶرٸنەدٸ.
- جايناگٷل-اۋ, مۇنىڭ نە?
- نە بولۋشى ەدٸ, كٶرٸپ تۇرسىڭ عوي.
- بۇل كٸم دەپ سەنەن سۇراپ تۇرمىن.
- ايعايلاماسايشى! بۇل مەنٸڭ كٷيەۋٸم شايجان.
- سەن نە ايتىپ تۇرسىڭ?
- مەنەن كٷيەۋٸڭ بار ما, دەپ بۇرىن نەگە سۇراماعانسىڭ?
- و, اللا! سەن جىندىسىڭ با, ەلدە, مەن بە?
- كٸمنٸڭ جىندى, كٸمنٸڭ ساۋ ەكەنٸنە داۋلاسپاي-اق قويايىق!
ەلگٸ شايجانى ورنىنان باياۋ عانا تۇردى دا, اسىقپاي بارىپ, تارتپادان قۇجاتتارىن سۋىرىپ ەكەلٸپ, نيەتقابىلدىڭ كٶزٸنە تاقايدى دا:
- ەي, شال! شىق مەنٸڭ ٷيٸمنەن! نەگە تاڭ اتپاي مازامىزدى الىپ تۇرسىڭ?
- سەن...سەن... مەنٸڭ ٷيٸ...
- بولدى, شال! ەشتەڭە ايتپاي-اق قوي! بەرٸ زاڭدى. قاتىن دا ٷي دە, مٷلٸك
تە بەرٸ مەنٸكٸ. سەن عانا مۇندا بٶتەنسٸڭ. مەنٸڭ زاڭدى ەيەلٸممەن بٸراز ۋاقىت كٶڭٸل كٶتەرگەنٸڭ ٷشٸن قازٸر وسىندا سەنٸ قان-جوسا ەتٸپ تەپكٸلەپ قۋىپ شىعۋىما بولار ەدٸ. جاسىڭنىڭ ٷلكەندٸگٸن, شاشىڭنىڭ بۋىرىلدىعىن سىيلاپ تۇرمىن. ونداي يتتٸككە بارماي-اق قويايىن. ەندٸ جاي عانا ٷن-تٷنسٸز كەتٸپ قالماساڭ, ٶتە جامان بولادى. تەك شۋ شىعارما! مەنٸڭ مٸنەزٸم جامان. جىنىم كەلمەي تۇرعاندا تەز زىت! – دەيدٸ دە, ەلگٸ شايجان دەگەنٸ تٷك بولماعانداي دۋشقا كٸرٸپ كەتەدٸ.
- وسىلاي بوپ قالدى, شالىم! مەنٸ كەشٸرمەيتٸنٸڭدٸ بٸلەمٸن. بٸراق, ەشقايدا شاعىمدانا المايسىڭ! بەرٸن زاڭداستىرىپ العانىمدى بٸلەسٸڭ. ەندٸ, بٸزدٸڭ جولىمىزدا كەسە كٶلدەلەڭ تۇرما! تۇرا دا المايسىڭ. بار دا ٶز جٶنٸڭدٸ تاپ! – دەپ, جايناگٷل ونى ٶز ٷيٸنەن كٶشەگە قۋىپ شىققان.
ەرينە, ول رەكتور باسىمەن سول سەتتە كٶشە كەزٸپ, تەنتٸرەپ كەتپەيدٸ عوي. دەرەۋ ٶز وقۋ ورنىنا قاراستى شيپاجايدىڭ ليۋكس بٶلمەسٸنە ورنالاسادى دا, مينيسترلٸككە تارتادى.
ول جەردە دە ونى كٷتٸپ تۇرعان جاعىمدى جاڭالىق شامالى بولعان. تاياۋدا عانا ٶتكەن قارجىلىق تەكسەرٸستٸڭ ەسەبٸ بويىنشا رەكتوردٸڭ بٸرقاتار ولقىلىقتارعا جول بەرگەنٸ ەشكەرە بولعان. سوعان بايلانىستى پروكۋراتۋرا ارنايى مەلٸمدەمە جولداعانىن ايتا كەلە مينيستر ول كٸسٸنٸ قازٸردەن باستاپ قىزمەتٸنەن بوسايتىنىن, دەرەۋ وقۋ ورنىنىڭ عىلىمي كەڭەسٸن جينايتىنىن سول جەردە جاڭا رەكتوردٸڭ تانىستىرىلاتىنىن حابارلاعان.
جينالىس ۇزاققا سوزىلمادى. عىلىمي كەڭەستٸڭ كەڭەيتٸلگەن وتىرىسى دەپ جارييالانعاننان كەيٸن وعان بەرٸمٸز دە قاتىسقان ەدٸك. نيەتقابىل اعايدىڭ تٷرٸ ٶرت سٶندٸرگەندەي تٷتٸگٸپ كەتكەن, قاباعى تٷكسيٸپ وتىرعانى ەلٸ ەسٸمدە. مينيستر قىسقاشا سٶز سٶيلەپ, جاڭا باسشىنى تانىستىردى, نيەتقابىل اعايعا كٶپ جىلعى ەڭبەگٸ ٷشٸن العىس بٸلدٸرٸپ جەنە ٶزٸ قالاسا, بازالىق ماماندىعى بويىنشا كافەدرادا پروفەسسور بولىپ قالا الاتىندىعىن ايتتى. بٸرلٸ-ەكٸلٸ قارت اكادەميكتەر بۇرىنعى رەكتوردٸڭ ەرەن ەڭبەگٸنٸڭ باعالانۋىن, وعان لايىقتى قىزمەت ۇسىنىلۋىن ٶتٸندٸ. بٸراق, مينيستر تاراپىنان «ول جاعى ەسكٸرٸلەدٸ» دەگەن ەنجارلاۋ شىعارىپ سالما جاۋاپ قانا بەرٸلدٸ.
سول جينالىستان كەيٸن نيەتقالي اعايدى كٶرمەدٸم, كٶپ جىلدان كەيٸن بٷگٸن عانا مٸنە, بازاردا كەزدەستٸردٸم. داۋسى عانا ٶزگەرمەگەندٸكتەن عانا تانىدىم, ال, انا سيقىن كٶرگەن ادام ونىڭ بۇرىن ٸرٸ عالىم, ۋنيۆەرسيتەت رەكتورى بولدى دەگەنگە ەش سەنبەس ەدٸ.
- سوندا ول مەنساپتان كەتە سالا قاڭعىباس بوپ شىعا كەلدٸ مە?
- جوعا, سول كٷنٸ كەشكە ول كٸسٸنٸ ارنايى ورگان قىزمەتكەرلەرٸ كەلٸپ,
شيپاجايداعى بٶلمەسٸنەن تۇتقىنداپ ەكەتكەن كٶرٸنەدٸ. بٸرەر ايدان كەيٸن سوت بولىپ, بەس جىلعا جازا ارقالاپ, اباقتىعا جابىلدى دەپ ەستٸگەنبٸز. ودان بەرٸ دە ونشاقتى جىل ٶتتٸ عوي. بوساپ شىققان تٸرلٸگٸ باعاناعى بٸز كٶرگەن جاي بولسا كەرەك.
- ال, ەلگٸ قۇربىڭ مەن ونىڭ نامىستان جۇرداي كٷيەۋٸ شە?
- ولار قازٸر شەتەلدە تۇرادى دەپ ەستٸگەنمٸن. بٸرەۋدٸ سورلاتىپ, مول
ولجاعا كەنەلگەندەردٸڭ قالاي جولدارى بولىپ كەتەتٸنٸن تٷسٸنبەيمٸن. نەسٸ بولسا دا, ارسىزدىقپەن دەگەندەرٸنە جەتتٸ عوي.
ەڭگٸمە وسى جەرگە كەلگەندە ەرلٸ-زايىپتى ەكەۋٸ تۋعان اۋىلىنىڭ شەتٸنە كەلٸپ تە قويعان ەدٸ.
2017 جىل
قۋاندىق شاماحايۇلى
