بٷگٸن فۋتبولدان پرەمەر-ليگا كوماندالارى اراسىنداعى قازاقستان بٸرٸنشٸلٸگٸنٸڭ 29-تۋرىنىڭ ٷش ويىنى ٶتكٸزٸلدٸ, دەپ حابارلايدى "ۇلت اقپارات".
العاشقى ويىن كٶكشەتاۋ قالاسىندا بولىپ ٶتتٸ. جەرگٸلٸكتٸ «وقجەتپەس» تۋرنير كەستەسٸندە سوڭعى ورىنداردىڭ بٸرٸندە كەلە جاتقان «تاراز» كومانداسىن قابىلدادى. ويىننىڭ 20-مينۋتىندا «وقجەتپەستٸڭ» جارتىلاي قورعاۋشىسى ميلان ستويانوۆيچ ەسەپ اشتى. ودان كەيٸن كٶكشەتاۋلىق كوماندا ساپىنان دانيلو المەيدا الۆەس 28-مينۋتىندا ەسەپتٸ ٷستەمەلەي تٷستٸ. ودان كەيٸن «تاراز» كومانداسىنان ەلٸشەر سٷلەي 43, ەلگۋدجا لوبجانيدزە 66 جەنە 90-مينۋتتاردا ەكٸ گول سوعىپ كەتتٸ. نەتيجەسٸندە «تاراز» سىرت الاڭدا قارسىلاسىنان 3:2 ەسەبٸمەن باسىم تٷستٸ.
تالدىقورعاننىڭ «جەتٸسۋى» ٶز الاڭىندا پاۆلوداردىڭ «ەرتٸسٸن» 2:1 ەسەبٸمەن تٸزە بٷكتٸردٸ. ويىنىڭ 9-مينۋتىندا پاۆلودارلىق رۋسلان ەسٸموۆ ەسەپ اشقان ەدٸ. ودان كەيٸن الاڭ يەلەرٸ قاتارىنان اسلان داراباەۆ 55, مارتين توشەۆ 88-مينۋتتا بٸر-بٸر گولدىڭ اۆتورى اتاندى.
تۋرنير كەستەسٸندە كٶش باسىندا كەلە جاتقان الماتىنىڭ «قايراتى» ەڭ سوڭعى ورىنداعى «اقتٶبە» كومانداسىن 6:0 ەەبٸمەن ويسىراتا جەڭدٸ. ەسەپتٸ 4-مينۋتتا الماتىلىق كونراد ۆرجەششينسكيي اشتى. ودان كەيٸن مارتون ەپپەل 6-مينۋتتا مەرگەندٸك تانىتسا, 54-مينۋتتا عافۋرجان سٷيٸمباەۆ اقتٶبەلٸك قاقپاشىنى قاپى قالدىردى. ال 58-مينۋتتا الماتىلىق تاعى بٸر ويىنشى ادەرينسولا ەسەولا ەسەپتٸ ۇلعايتا تٷستٸ. ال 60-مينۋتتا باۋىرجان يسلامحان پەنالتيدٸ مٷلتٸكسٸز ورىندادى, 68-مينۋتتا مارتون ەپپەل تاعى بٸر مەرتە قانجىعاسىن مايلادى. وسىلايشا «قايرات» «اقتٶبەنٸ» ويسىراتا جەڭدٸ.
ەندٸ 6 قازاندا «ورداباسى» مەن «استانا» كوماندالارى كەزدەسەدٸ. بۇل تۋرداعى «قايسار» مەن «توبىل», «شاحتەر» مەن «اتىراۋ» اراسىنداعى كەزدەسۋ 30 قازانعا اۋىستىرىلدى. ٶيتكەنٸ, 6 قازان كٷنٸ قازاقستان كۋبوگىنىڭ فينالىندا «قايسار» مەن «اتىراۋ» كوماندالارى شەبەرلٸك بايقاسادى.
