قىزىلوردا, ماڭعىستاۋ جەنە قاراعاندى, پاۆلودار وبلىستارىندا انىقتالعان كوروناۆيرۋس ٸندەتٸنٸڭ جاڭا جاعدايلارى تۋرالى ايتىلدى, دەپ حابارلايدى "ۇلت اقپارات".
16 سەۋٸر, ساعات 10.10-داعى جاعداي بويىنشا, قازاقستاندا ٸندەتكە شالدىققاندار سانى 1331-گە جەتتٸ. ونىڭ ٸشٸندە قىزىلوردا وبلىسىندا – 4, ماڭعىستاۋ وبلىسىندا – 1, جەنە قاراعاندى وبلىسىندا - 2, پاۆلودار وبلىسىندا 2 جاعداي تٸركەلدٸ.
قىزىلوردا وبلىسىندا 4 ناۋقاستىڭ بارلىعى ٶڭٸر ورتالىعىندا انىقتالدى.
«اۋرۋ جۇقتىرعانداردىڭ ەكەۋٸ 40 جاستان اسقان ەيەل ادامدار, قالعان ەكەۋٸ 24 جەنە 54 جاستاعى ەر ادامدار. ولاردىڭ بارلىعى كوروناۆيرۋسقا شالدىققان ادامدارمەن بايلانىستا بولعان. سىنامالار الىنىپ, پتر دياگنوستيكالىق زەرتتەۋ نەتيجەلەرٸ بويىنشا COVID-19 دياگنوزى راستالدى. قازٸرگٸ تاڭدا ناۋقاستارمەن قارىم-قاتىناستا بولعان ادامدار انىقتالۋدا. ولار دەر كەزٸندە مەديتسينالىق باقىلاۋعا الىنىپ, وقشاۋلانىپ, تەكسەرٸستەن ٶتٸپ جاتىر», - دەلٸنگەن مەملەكەتتٸك كوميسسييانىڭ شۇعىل شتابىنىڭ اقپاراتىندا.
سوڭعى مەلٸمەتتەر بويىنشا, قىزىلوردا وبلىسىندا ٸندەتكە شالدىققانداردىڭ جالپى سانى 131-گە جەتتٸ. 4 ادام جازىلىپ شىقتى, 127-سٸ ەم-دوم قابىلداۋدا.
ماڭعىستاۋ وبلىسىندا COVID-19 جاڭاٶزەن قالاسىنىڭ 18 جاستاعى تۇرعىنىنان انىقتالدى.
«ول كوروناۆيرۋس ينفەكتسيياسىن جۇقتىرعان اداممەن قارىم-قاتىناستا بولۋىنا بايلانىستى كارانتيندٸك ستاتسيونارعا جاتقىزىلعان بولاتىن. پتر دياگنوستيكالىق زەرتتەۋ قورىتىندىسىمەن COVID-19 دياگنوزى ناقتىلاندى. ناۋقاستىڭ جاعدايى قاناعاتتانارلىق. بەكٸتٸلگەن حاتتاماعا سەيكەس تيٸستٸ ەم جٷرگٸزٸلۋدە. ونىمەن قارىم-قاتىناستا بولعان ادامدار انىقتالىپ, بارلىعى مەديتسينالىق باقىلاۋعا الىنۋدا. اۋرۋ وشاقتارىندا ەپيدزەرتتەۋ جۇمىستارى, دەزينفەكتسييالىق جۇمىستار جٷرگٸزٸلۋدە», - دەلٸنگەن اقپاراتتا.
سوڭعى دەرەكتەر بويىنشا, ماڭعىستاۋ وبلىسىندا ينفەكتسييا بارلىعى 12 ادامنان انىقتالدى. ونىڭ ٸشٸندە 1-ەۋٸ جازىلىپ شىقتى.
قاراعاندى وبلىسىندا كوروناۆيرۋس ينفەكتسيياسىن تاعى 2 ادام جۇقتىرعانى بەلگٸلٸ بولدى. 47 جاستاعى ەيەل جەنە 10 جاسار بالا تەمٸرتاۋ قالاسىنىڭ تۇرعىندارى. بۇعان دەيٸن ناۋقاس اداممەن جاقىن بايلانىستا بولعان.
پاۆلودار وبلىسىندا ٸندەت 24 جەنە 62 جاستاعى پاۆلودار تۇرعىندارىنان انىقتالدى. «ولار كوروناۆيرۋس ينفەكتسيياسى راستالعان پاتسيەنتپەن بايلانىستا بولعان ادامدار رەتٸندە كارانتيندٸك ستاتسيونارعا بۇعان دەيٸن جاتقىزىلعان ەدٸ. ەكٸ پاتسيەنت دە مەلتسەر بوكسىنا اۋىستىرىلدى. بايلانىستاعى ادامداردىڭ شەڭبەرٸ انىقتالادى, ولاردى وقشاۋلاۋ بويىنشا جۇمىستار جٷرگٸزٸلەدٸ. ەپيدەميياعا قارسى ٸس-شارالار جالعاسۋدا», - دەلٸنگەن coronavirus2020.kz Telegram كانالىندا.
