قر باس پروكۋراتۋراسى الماتىنىڭ تەرگەۋ يزولياتورىندا ٶلٸ كٷيٸندە تابىلعان ازاماتقا قاتىستى تٷسٸنٸك بەردٸ, دەپ حابارلايدى "ۇلت اقپارات".
«بٷگٸن, 29 سەۋٸردە, تاڭعى ساعات 08.00-دە الماتى قالاسىنىڭ تەرگەۋ يزولياتورىندا قيباەۆ بەكبول مۇحامەدۇلى سول جاق قولىنىڭ بٸلەك تۇسىنان كەسٸلگەن كٷيٸ دەرەتحانادان تابىلعان. ونى كامەرادا بٸرگە وتىرعان ادامدار تاۋىپ العان. يزولياتوردىڭ مەديتسينا قىزمەتكەرلەرٸ بٸردەن العاشقى مەديتسينالىق كٶمەك كٶرسەتتٸ. الايدا, ونى قۇتقارىپ قالۋ مٷمكٸن بولمادى. شاقىرتۋ بويىنشا كەلگەن جەدەل جەردەم بريگاداسى ونىڭ قايتىس بولعانىن تٸركەدٸ. ٶلٸم قاندى كٶپ جوعالتۋدان بولۋى مٷمكٸن», - دەلٸنگەن باس پروكۋراتۋرانىڭ اقپاراتىندا.
ايتا كەتەيٸك, ب.قيباەۆ جامبىل وبلىسى قورداي اۋدانىندا بولعان جاپپاي تەرتٸپسٸزدٸككە قاتىسقانى ٷشٸن ۇستالىپ, تەرگەۋ يزولياتورىنا قامالعان.
«اتالعان فاكتٸ بويىنشا الماتى قالاسىنىڭ ارنايى پروكۋرورلارى سوتقا دەيٸنگٸ تەرگەپ-تەكسەرۋدٸ جٷرگٸزٸپ جاتىر. ورىن العان جاعدايعا قاتىستى بارلىق مەن-جايلار وبەكتيۆتٸ زەرتتەلٸپ, جۇرتشىلىققا جەتكٸزٸلەتٸن بولادى», - دەدٸ قر باس پروكۋراتۋرانىڭ باسپاسٶز قىزمەتٸنەن.
