اقتٶبەدە كٶپقاباتتى ٷيدەن شىققان ٶرت كەزٸندە 200 ادام قاۋٸپسٸز جەرگە كٶشٸرٸلدٸ. ٶرتتٸ سٶندٸرۋگە 7 تەحنيكا مەن 37 ادام جۇمىلدىرىلدى, دەپ حابارلايدى قازاقپارات تٸلشٸسٸ.
«وبلىستىق تجد ساعات 15:03-تە حابار تٷستٸ. ٶرت سٶندٸرۋشٸلەر 15:11-دە وقيعا ورنىنا جەتتٸ. ال ساعات 15:50-دە ٶرت سٶندٸرٸلدٸ. بارلىعى 200 ادام قاۋٸپسٸز جەرگە شىعارىلدى, 3 ادام ٶرتتەن قۇتقارىلدى. ٶرت سٶندٸرۋگە 7 تەحنيكا مەن 37 ادام جۇمىلدىرىلدى. الدىن الا بەلگٸلٸ بولعانى, زارداپ شەككەن ەشكٸم جوق», - دەپ حابارلادى وبلىس ەكٸمٸنٸڭ باسپاسٶز قىزمەتٸ.
بۇعان دەيٸن حابارلاعانىمىزداي, اقتٶبەدە 9 قاباتتى ٷي ٶرتەندٸ.
ٶرت شىعىندارىن انىقتاۋ ٷشٸن ارنايى كوميسسييا قۇرىلدى.
جەرگٸلٸكتٸ ەكٸمدٸك ٶرت كەزٸندە زارداپ شەككەن وتباسى مٷشەلەرٸنە قاجەتتٸ كٶمەك بەرەتٸن بولدى. قازٸر وقيعا ورنىندا ٸشكٸ ٸستەر ورگاندارى, پروكۋراتۋرا مەن تٶتەنشە جاعدايلار قىزمەتٸ, جەرگٸلٸكتٸ ەكٸمدٸك ٶكٸلدەرٸ جٷر.
