رەسەيلٸك «كوممەرسانت» باسىلىمى 16 شٸلدەدە قازاقستانداعى «ارسەلورميتتال تەمٸرتاۋ» كومپانيياسى رەسەيلٸك «گازپروم نەفت» كومپانيياسىنىڭ ديستريبۋتورى «نيك-ويل» سەرٸكتەسٸمەن كەلٸسٸم-شارت ٷزگەنٸن حابارلادى, دەپ جازادى ازاتتىق.
باسىلىم دەرەگٸنشە, ەۋروپا وداعى مەن ۋكراينانىڭ «گازپروم نەفت» كومپانيياسىنا سالعان سانكتسييالارىنان كەيٸن «ارسەلورميتتال تەمٸرتاۋ» «نيك-ويلمەن» بٸرگە جۇمىس ٸستەۋدٸ توقتاتقان. «كوممەرسانت» گازەتٸ «امت ٶزٸنٸڭ باس ديرەكتورى پارامجيت كالوننىڭ بەدەلٸن دە ساقتاپ قالعىسى كەلەدٸ» دەپ جازدى.
«ارسەلورميتتال تەمٸرتاۋ» كومپانيياسىنىڭ باسپاسٶز قىزمەتٸ بۇل اقپاراتتى راستاپ, يا جوققا شىعارعان جوق. كومپانييا ازاتتىققا رەسەيلٸك گازەتكە شىققان اقپاراتقا قاتىستى قانداي دا بٸر كوممەنتاريي بەرۋدەن باس تارتقان.
«كوممەرسانت» باسىلىمىنىڭ جازۋىنشا, 2014 جىلى قىركٷيەكتە اقش پەن ەۋروپا وداعى «گازپروم نەفت» كومپانيياسىنا سانكتسييا سالعان. «نيك ويل» ديرەكتورى نيكولاي گاردەر «كوممەرسانت» باسىلىمىنا ٶزٸ باسقاراتىن كومپانييا امت-عا سەگٸز جىل بويى قاجەتتٸ ماتەريالداردى جٸبەرٸپ وتىرعانىن ايتتى.
«ەو مەن ۋكراينانىڭ رەسەيگە سالعان سانكتسييالارىنىڭ بٸزگە قانداي قاتىسى بارىن سۇرادىق. بٸراق بۇل سۇراعىمىز جاۋاپسىز قالدى» دەدٸ گاردەر«كوممەرسانت» باسىلىمىنا.
«گازپروم نەفت» ٶكٸلدەرٸ رەسەيلٸك گازەتكە كومپانييا زاڭگەرلەرٸ قازاقستاندىق كومپانييانىڭ شەشٸمٸن تەكسەرٸپ كٶرەتٸنٸن مەلٸمدەگەن.
«ارسەلورميتتال تەمٸرتاۋ» كومپانيياسى ٷندٸستاندىق بيزنەسمەن لاكشمي ميتتال يەلٸك ەتەتٸن «ارسەلورميتتال» ترانسۇلتتىق مەتاللۋرگييالىق توبىنا كٸرەدٸ. بۇل توپتىڭ قۇرامىندا ۋكرايناداعى «ارسەلورميتتال كريۆوي روگ» كومپانيياسى دا بار.
«ارسەلورميتتال كريۆوي روگ» پەن «ارسەلورميتتال تەمٸرتاۋدى» پارامجيت كالون باسقارادى.
