بەلارۋس وپپوزيتسيياسى قۇرعان ٷيلەستٸرۋ كەڭەسٸنٸڭ پرەزيديۋم مٷشەسٸ مارييا كولەسنيكوۆا بەلارۋس تەرگەۋ كوميتەتٸنە شاعىم تٷسٸرٸپ, ٶزٸن ۇستاعان كٷشتٸك قۇرىلىم قىزمەتكەرلەرٸنٸڭ ٷستٸنەن قىلمىستىق ٸس قوزعاۋدى سۇرادى. ول شاعىمدا قىزمەتكەرلەردٸڭ ٶزٸن "ٶلتٸرەمٸز" دەپ قورقىتقانىن, ۇزاق جىلعا باس بوستاندىعىنان ايىرامىز دەپ قوقان-لوقى جاساعانىن جازعان.
"مەنٸ ٶلتٸرەمٸن دەپ قورقىتىپ, ونى شىن قابىلدادىم. ناقتىراق ايتسام, ەگەر بەلارۋس اۋماعىنان ٶز ەركٸڭمەن كەتپەسەڭ, تٸرٸدەي نە بٶلشەكتەپ بەرٸبٸر ەلدەن شىعارىپ جٸبەرەمٸز دەدٸ. 25 جىلعا بوستاندىعىڭنان ايىرامىز دەپ قوقان-لوقى كٶرسەتتٸ, قاماۋ ورنىندا ٸزٸڭە تٷسەمٸز دەپ قورقىتتى. ونى شىن دەپ قابىلدادىم" دەپ جازعان كولەسنيكوۆا تەرگەۋ كوميتەتٸنە تٷسٸرگەن ٶتٸنٸشٸندە.
ول ەلدەن كەتۋدەن باس تارتقاننان كەيٸن ٶزٸن كامەرادا شامامەن بٸر ساعات ۇستاعانىن ايتادى.
"مەنٸ [كٷشتٸك قۇرىلىمدار] زاڭسىز ۇستاعان كەزدە كەز كەلگەن مٷمكٸندٸكتٸ پايدالانىپ, ارى-بەرٸ ٶتكەن قىزمەتكەرلەرگە "مەنٸ ۇرلاپ ەكەتتٸ, ادۆوكاتىم مەن ەكەمە جەتكٸزٸڭٸز" دەپ تالاپ ەتتٸم" دەلٸنگەن ٶتٸنٸشتە.
مارييا كولەسنيكوۆانى 7 قىركٷيەكتە مينسكٸدەگٸ ۇلتتىق كٶركەم مۋزەيٸنٸڭ الدىندا ۇستاپ ەكەتكەن ەدٸ. بيلٸك ونى ەلدەن شىعارۋعا تىرىستى, بٸراق بۇل ويى جٷزەگە اسپادى. كولەسنيكوۆا شەكارا ماڭىندا پاسپورتىن جىرتىپ تاستاپ, ۋكراينا اۋماعىنا ٶتۋدەن باس تارتتى. كەيٸنٸرەك ونى تەرگەۋ يزولياتورىنا قاماعان. ول بيلٸكتٸ باسىپ الۋعا ۇمتىلدى دەگەن كٷدٸككە ٸلٸنٸپ وتىر.
