كيەۆتە ۋكراينا پرەزيدەنتٸ ۆلاديمير زەلەنسكييدٸڭ كورتەجٸ اپاتقا ۇشىرادى. بۇل تۋرالى ونىڭ باسپاسٶز حاتشىسى سەرگەي نيكيفوروۆ مەلٸمدەدٸ, - دەپ حابارلايدى Massaget.kz پورتالى "ۋكراينسكايا پراۆدا" باسىلىمىنا سٸلتەمە جاساپ.
"كيەۆتە جەڭٸل كٶلٸك ۋكراينا پرەزيدەنتٸ وتىرعان كورتەجبەن سوقتىعىستى. مەملەكەت باسشىسىمەن بٸرگە جٷرگەن دەرٸگەرلەر كٶلٸك جٷرگٸزۋشٸسٸنە شۇعىل كٶمەك كٶرسەتٸپ, ونى جەدەل جەردەمگە تاپسىردى. اۋىر جاراقات العاندار جوق. پرەزيدەنت تە دەرٸگەرگە قارالدى, قورقاتىنداي جاراقاتتار جوق. تەرتٸپ ساقشىلارى جول اپاتىنىڭ بارلىق مەن-جايىن انىقتايدى", - دەپ جازدى نيكيفيروۆ Facebook پاراقشاسىندا.
ەسكە سالايىق, 14 قىركٷيەكتە ۋكراينالىق اقپارات قۇرالدارى ۆلاديمير زەلەنسكييدٸڭ ۋكراينانىڭ حاركوۆ وبلىسىنداعى يزيۋم قالاسىنا كەلگەنٸن حابارلاعان بولاتىن.
