فوتو: انتيكور
انتيكور باسشىسىنىڭ بۇرىنعى ورىنباسارى ماقسات قوجاباەۆتىڭ ٸنٸسٸ, حالىقارالىق ٸزدەۋدە جٷرگەن دەۋرەنبەك قوجاباەۆ ۇستالدى.
— شىمكەنت قالالىق سىبايلاس جەمقورلىققا قارسى ٸس-قيمىل دەپارتامەنتٸ باستىعىنىڭ بۇرىنعى ورىنباسارى ۇلتتىق قاۋٸپسٸزدٸك كوميتەتٸ مەن جەمقورلىقپەن كٷرەس قىزمەتكەرلەرٸنٸڭ ٷيلەسٸمدٸ ٸس-قيمىلىنىڭ ارقاسىندا ۇستالىپ, تەرگەۋ يزولياتورىنا قامالدى, — دەپ اتاپ ٶتتٸ سىبايلاس جەمقورلىققا قارسى ٸس-قيمىل اگەنتتٸگٸنەن.
46 جاستاعى كٷدٸكتٸ ٸرٸ كٶلەمدە پارا الدى دەگەن كٷدٸككە ٸلٸنٸپ, ٸزدەۋ جارييالانعان ەدٸ. ول شىمكەنت قالاسىنداعى مەكتەپتەردٸڭ بٸرٸنٸڭ ديرەكتورىن قىلمىستىق جاۋاپكەرشٸلٸكتەن بوساتقانى ٷشٸن پارا العان بولۋى مٷمكٸن. تەرگەۋ بارىسىندا قوجاباەۆتىڭ قايدا ەكەنٸن ايتقان ادامعا سىياقى جارييالانىپ, ەسٸمٸ قۇپييا بولاتىنان كەپٸلدٸك بەرٸلدٸ.
ەستەرٸڭٸزگە سالا كەتسەك, بىلتىر اعاسى ماقسات قوجاباەۆ پارا العانى ٷشٸن 5,5 جىلعا باس بوستاندىعىنان ايرىلدى.
