فوتو:پاۆلودار وبلىسىنىڭ تٶتەنشە جاعدايلار دەپارتامەنتٸ
«مايقايىڭالتىن» اق اۋماعىنداعى ويىقتا گيدراۆليكالىق بالعاسى بار ەكسكاۆاتور جۇمىس ٸستەپ جاتىر. ونىڭ كٶمەگٸمەن كٶلەمٸ اسا ٷلكەن ەمەس تاستار ۇساقتالۋدا, دەپ حابارلايدى Kazinform اگەنتتٸگٸ.
بۇعان قوسا شاعىن ەكسكاۆاتور مەزگٸل سايىن جولداردى ارشىپ, جٷرٸپ-تۇرۋعا ىڭعايلى ەتٸپ جاتىر. ال قۇتقارۋشىلاردىڭ كٶمەگٸمەن كەيبٸر اسا ٸرٸ ەمەس تاستار ورنىنان الىنۋدا.
«كەشە ويىق تٷبٸندەگٸ ەكسكاۆاتورلار جالپى كٶلەمٸ 45 تەكشە مەتر توپىراقتى قازىپ شىعاردى. گيدراۆليكالىق بالعاسى بار ەكسكۆاتور شاعىن كٶلەمدٸ تاستىڭ 60 پايىزىن ۇساقتادى. تاستى ۋاتۋ جۇمىستارى ەلٸ دە جالعاسىپ جاتىر. قۇتقارۋشىلار ەلەكترلٸ پنەۆمو قۇرالدارىن پايدالانىپ, كەي تاستاردى قولمەن ارشۋدا. ويىق شەتٸندەگٸ توپىراق ەلٸ دە قۇلاپ جاتىر» دەپ حابارلادى ٶڭٸرلٸك تٶتەنشە جاعدايلار دەپارتامەنتٸنٸڭ باسپاسٶز قىزمەتٸ.
