شىعىس قازاقستان وبلىسىندا بۇقتىرما جاعالاۋىن اباتتاندىرۋعا باسا كٶڭٸل بٶلٸنەدٸ. بۇل تۋرالى ايماق ەكٸمٸ دانيال احمەتوۆ ايتتى, دەپ حابارلايدى قازاقپارات.
«ٸشكٸ تۋريزمدٸ دامىتۋعا ەرەكشە كٶڭٸل بٶلٸنۋدە. جىل باسىنان بەرٸ بۇل سالاعا 5,4 ملرد تەڭگە ينۆەستيتسييا تارتىلدى, ونىڭ ٸشٸندە 1,5 ملرد تەڭگەگە قاتون-قاراعاي اۋدانىنىڭ ٶرەلٸ اۋىلىندا 250 ورىندىق تۋريستٸك كەشەن سالىندى. وسىلايشا كٸشكەنتاي اۋىلدا ٷلكەن تاماشا قوناقٷي سالىندى», - دەدٸ احمەتوۆ ورتالىق كوممۋنيكاتسييالار قىزمەتٸندە ٶتكەن باسپاسٶز مەسليحاتىندا.
سونىمەن بٸرگە, ەكٸمنٸڭ ايتۋىنشا, 12 ملرد تەڭگەگە 36 جوبانى جٷزەگە اسىرۋ, ونىڭ ٸشٸندە بۇقتىرما سۋ قويماسى جاعالاۋىندا 12 دەمالىس بازاسىن سالۋ جۇمىستارى باستالدى.
«بٸز الاكٶل كٶلٸن دامىتۋعا 17 ملرد تەڭگە جۇمسادىق, قازٸر باعىتىمىزدى ٶزگەرتٸپ, ٶزٸمٸزدٸڭ بۇقتىرما جاعالاۋىن دامىتۋعا اۋىسىپ جاتىرمىز. بٸزگە ٷش جىل ۋاقىت كەرەك, سوندا بۇل جاعالاۋ ەلدەگٸ كەز كەلگەن كۋرورتتىق ايماقپەن بەسەكەگە تٷسە الادى, تٸپتٸ اسىپ تا كەتەمٸز. بۇلاي سەنٸمدٸ ايتۋىمنىڭ سىرى نەدە? تەك قانا بٸزدٸڭ وبلىستا مارال مٷيٸزٸمەن ەمدەۋ ٷشٸن تابيعي رەسۋرس بار. بۇل بٸز دامىتاتىن باعىتتاردىڭ بٸرٸ بولادى, دامىتۋدى باستاپ تا كەتتٸك», - دەدٸ شقو ەكٸمٸ.
