قازاقستاندا تۇرعىن ٷي باعاسى 2021 جىلدىڭ اقپانىندا ٶسۋٸن جالعاستىردى. بۇل تۋرالى ۇلتتىق ستاتيستيكا بيۋروسىنىڭ حابارلاماسىندا ايتىلعان, - دەپ حابارلايدى "ۇلت اقپارات".
«2021 جىلدىڭ قاڭتارىمەن سالىستىرعاندا اقپان ايىندا اباتتاندىرىلعان تۇرعىن ٷيلەردٸ الىپ ساتۋ باعالارى 3,1%-عا, جاڭا تۇرعىن ٷيلەردٸ ساتۋ باعالارى 1,2%-عا ٶستٸ. اباتتاندىرىلعان تۇرعىن ٷيدٸ جالعا الۋ تٶلەمٸ 1,6%-عا جوعارىلادى», - دەلٸنگەن حابارلامادا.
تۇرعىن ٷي نارىعىنداعى باعانىڭ ٶزگەرۋٸنە توقتالساق, 2021 جىلدىڭ اقپانىندا جاڭا تۇرعىن ٷيلەردٸ ساتۋ باعالارى ٶتكەن جىلدىڭ وسى ايىنا قاراعاندا 8%-عا ٶسكەن. اباتتاندىرىلعان تۇرعىن ٷيلەردٸ ساتىپ الۋ باعالارى 20,3%-عا كٶتەرٸلسە, اباتتاندىرىلعان تۇرعىن ٷيدٸ جالعا الۋ تٶلەمٸ 10,7%-عا ارتقان.
بيۋرو اقپاراتىنشا, 2020 جىلدىڭ جەلتوقسانىمەن سالىستىرعاندا جاڭا تۇرعىن ٷيلەردٸ ساتۋ باعاسى 2021 جىلدىڭ اقپانىندا 4,2%-عا ٶسكەن. اباتتاندىرىلعان تۇرعىن ٷيلەردٸ الىپ ساتۋ باعاسى 2020 جىلى 13,2%-عا ٶسسە, بيىلعى جىلدىڭ اقپانىندا 8,2%-عا كٶتەرٸلگەن. ال اباتتاندىرىلعان تۇرعىن ٷيدٸ جالعا الۋ تٶلەمٸ ٶتكەن جىلمەن سالىستىرعاندا 4,4%-عا ٶسكەن.
قازاقستان بويىنشا جاڭا ٷيلەردٸڭ بٸر شارشى مەترٸنٸڭ ورتاشا قۇنى - 322 968 تەڭگە.
