قازاقستاندا كوللەكتورلىق كومپانييالارعا بورىشكەردٸڭ جاقىن تۋىستارىنان باسقا تانىستارىنا بايلانىسقا شىعۋىنا شەكتەۋ ەنگٸزٸلمەك, دەپ حابارلايدى قازاقپارات.
قازاقستان كوللەكتورلارى وداعىنىڭ تٶراعاسى يۋريي ليدٸڭ ايتۋىنشا, مۇنداي ۇسىنىستار قارجى قىزمەتتەرٸ تۇتىنۋشىلارىنىڭ قۇقىقتارىن قورعاۋعا باعىتتالعان نۇسقاۋلاردا قامتىلعان.
«اتاپ ايتقاندا, كوللەكتورلارعا بورىشكەردٸڭ جاقىن تۋىستارىنان ٶزگە تانىستارىنا, ياعني ٷشٸنشٸ ادامدارعا بايلانىسقا شىعۋىنا شەكتەۋ قاراستىرىلعان. بۇل تۇرعىدا بورىشكەردٸڭ تۇرعىلىقتى جەرٸن نەمەسە بايلانىس مەلٸمەتتەرٸن انىقتاۋ ماقساتىندا عانا تۋىستارىنا حابارلاسۋ مٷمكٸندٸگٸ بەرٸلەدٸ. وسى ارقىلى مەرزٸمٸ ٶتٸپ كەتكەن قارىزدى سوتقا دەيٸن قايتارۋ ماقساتىندا كوللەكتورلارعا ٷشٸنشٸ ادامداردىڭ مازاسىن الۋىنا جول بەرٸلمەيدٸ. بۇل ٶز كەزەگٸندە تۇرعىندار تاراپىنان شىعامداردى ايتارلىقتاي ازايتۋعا سەپتٸگٸن تيگٸزەدٸ», - دەدٸ يۋريي لي پارلامەنت سەناتىنداعى دٶڭگەلەك ٷستەل وتىرىسىندا.
ونىڭ سٶزٸنە قاراعاندا, كوللەكتورلىق اگەنتتٸكتەردٸڭ مٸندەتٸنە بورىشكەرمەن ٶزارا ٸس-قيمىلدىڭ بارلىق پروتسەسٸن تٸركەۋ ەسكەرٸلٸپ وتىر. وسى ورايدا دىبىس جەنە بەينە قۇرىلدارى ارقىلى, ونىڭ ٸشٸندە تەلەفون بايلانىستارىن جازىپ الۋ قاراستىرىلعان. بۇل قادام بورىشكەرلەرمەن بايلانىسقا شىعۋ كەزٸندە قۇقىق بۇزۋشىلىقتىڭ ورىن الۋ نەمەسە بولماۋى جاعدايىن جەڭٸل انىقتاۋ ٷشٸن ٸسكە اسىرىلماق.
