ەلەكتروندى دەنساۋلىق پاسپورتىنا دونورلىق تۋرالى ارنايى باعان ەنگٸزٸلەدٸ, دەپ حابارلايدى قازاقپارات.
بۇل تۋرالى قر دەنساۋلىق ساقتاۋ مينيسترٸ ەلجان بٸرتانوۆ مەلٸمدەدٸ.
«ەمحاناعا تٸركەلەردە سٸزدٸڭ قايتىس بولعاننان كەيٸنگٸ دونورلىققا كەلٸسٸمٸڭٸز سۇرالادى. ەگەر باس تارتساڭىز, جاۋابىڭىز ەلەكتروندى قۇجاتتا كٶرسەتٸلەدٸ. ٶتكەن اپتادا تانىستىرعان ەلەكتروندى دەنساۋلىق پاسپورتىندا بۇل تۋرالى ارنايى باعان بولادى. جىل سوڭىنا دەيٸن بۇل مەسەلە شەشٸلەدٸ», - دەدٸ ە. بٸرتانوۆ مينيسترلٸك القاسىنىڭ كەڭەيتٸلگەن وتىرىسى بارىسىندا جۋرناليستەرگە بەرگەن سۇحباتىندا.
ونىڭ ايتۋىنشا, دونورلىقتان باس تارتۋ ٷشٸن ادامدار ەمحاناعا ارنايى كەلۋٸ تيٸس.
«ادامدار ەمحاناعا ارنايى كەلٸپ, دونورلىقتان باس تارتۋىن تٸركەتۋٸ تيٸس. ۇزاق ۋاقىتقا ساقتاپ قويۋ ٷشٸن قاعاز قۇجات تا مٸندەتتٸ تٷردە بولادى. بٸراق مارقۇمنىڭ تۋىستارى داۋ شىعارادى. بۇل جەردە تٷسٸندٸرۋ جۇمىستارىن جٷرگٸزۋ قاجەت دەپ ويلايمىن. ەرينە, بٸزدٸڭ مەنتاليتەت, دەستٷر, پسيحولوگييا ٷشٸن بۇل وڭاي ەمەس. دەگەنمەن جۇمىس ٸستەۋ قاجەت», - دەدٸ مينيستر.
