30 قازان كٷنٸ قازاقستاندا 172 ادامنىڭ كوروناۆيرۋس پنەۆمونيياسىنا شالدىققانى انىقتالدى. تەۋلٸك ٸشٸندە اۋرۋدىڭ وسى تٷرٸنەن ەكٸ ادامنىڭ ٶلٸمٸ تٸركەلدٸ. بۇل تۋرالى قازاقستان دەنساۋلىق ساقتاۋ مينيسترلٸگٸ حابارلادى.
قازاقستان بيلٸگٸ پتر تەستٸمەن راستالماعان, بٸراق اۋرۋ بەلگٸلەرٸ بويىنشا كوروناۆيرۋسقا ۇقسايتىن پنەۆمونييا ەسەبٸن 1 تامىزدان بەرٸ جٷرگٸزٸپ كەلەدٸ. ٷكٸمەت دەرەگٸنشە, تامىزدىڭ باسىنان قازاننىڭ اياعىنا دەيٸن 37 746 ادامعا كوروناۆيرۋس پنەۆمونيياسى دياگنوزى قويىلعان. ونىڭ 401-ٸ قايتىس بولعان.
دەنساۋلىق ساقتاۋ مينيسترلٸگٸنٸڭ مەلٸمەتٸنشە, قازٸر كوروناۆيرۋس پنەۆمونيياسىنان 3795 ادام ەمدەلٸپ جاتىر. ونىڭ 2337-سٸ ستاتسيوناردا, 1458-ٸ امبۋلاتورييالىق جاعدايدا ەم قابىلداپ جاتىر. 128 ناۋقاستىڭ احۋالى ناشار, 20 ادام ٶكپەنٸ جاساندى جەلدەتۋ اپپاراتىنا قوسىلعان.
Covid جٶنٸندەگٸ ۇلتتىق ستاتيستيكاعا تەك پتر تەستٸمەن راستالعان ناۋقاستار دەرەگٸ كٸرەدٸ. 13 ناۋرىز بەن 31 قازان ارالىعىندا 111 953 ادامنىڭ كوروناۆيرۋس جۇقتىرعانى پتر تەستٸمەن راستالعان. ونىڭ 1848-ٸ قايتىس بولعان. Covid ٶلٸمٸ ستاتيستيكاسىنا كوروناۆيرۋس جۇقتىرعانى راستالعان, بٸراق "ٸلەسپە اۋرۋدان قايتىس بولدى" دەگەن جٷزدەگەن ادام كٸرمەيدٸ.
