قازاقستان مەن ٶزبەكستان ەكٸ ەل اراسىنداعى ەۋە قاتىناسىن كەڭەيتۋگە نيەتتٸ, دەپ حابارلايدى "ۇلت اقپارات" ازاماتتىق اۆياتسييا كوميتەتٸنٸڭ باسپاسٶز قىزمەتٸنە سٸلتەمە جاساپ.
تاشكەنت قالاسىندا «Uzbekistan Airports, Aviation & Logistics Forum 2020» حالىقارالىق اۆياتسييا-لوگيستيكا فورۋمى اياسىندا قر ييدم ازاماتتىق اۆياتسييا كوميتەتٸنٸڭ تٶراعاسى تالعات لاستاەۆتىڭ ٶزبەكستان رەسپۋبليكاسىنىڭ كٶلٸك مينيسترٸ ەليار گانيەۆپەن, ەۋە كٶلٸگٸن دامىتۋ دەپارتامەنتٸنٸڭ باستىعى ۇلىقبەك بەكتاشەۆپەن, سونداي-اق «Uzbekistan Airports» اق باسقارما تٶراعاسى روۆشان يسمايلوۆپەن كەزدەسۋٸ ٶتتٸ.
«كەزدەسۋ بارىسىندا تاراپتار قازاقستان مەن ٶزبەكستاننىڭ ازاماتتىق اۆياتسيياسىن دامىتۋ پەرسپەكتيۆالارىن, ونىڭ ٸشٸندە قازاقستاننىڭ ەۋەجايلارىندا ەنگٸزٸلگەن «اشىق اسپان» رەجيمٸ اياسىندا شەتەلدٸك ەۋە كومپانييالاردى تارتۋ بويىنشا قابىلدانعان شارالاردى تالقىلادى. سونىمەن قاتار, تاراپتار قازاقستان مەن ٶزبەكستان اراسىنداعى ەۋە قاتىناسىن ودان ەرٸ كەڭەيتۋ قاجەتتٸلٸگٸن راستادى» دەلٸنگەن حابارلامادا.
كەزدەسۋ قورىتىندىسى بويىنشا ەكٸ ەل اراسىندا رۇقسات ەتٸلگەن جيٸلٸكتەر سانىن ارتتىرۋ, سونداي-اق قازاقستان مەن ٶزبەكستاننىڭ ەۋە تاسىمالداۋشىلارى ٷشٸن ەكٸ ەل اۋماعىندا جاڭا تاعايىنداۋ پۋنكتٸلەرٸن قوسۋ بويىنشا جۇمىستى جالعاستىرۋعا قول جەتكٸزٸلدٸ.
