فوتو: Tengrinews.kz/تۇرار قازانعاپوۆ
قازاقستانداعى حالىق سانى 20 ميلليونعا جاقىنداپ قالدى, - دەپ حابارلايدى Tengrinews.kz سايتى ستراتەگييالىق جوسپارلاۋ جەنە رەفورما اگەنتتٸگٸ ۇلتتىق ستاتيستيكا بيۋروسىنىڭ باسپاسٶز قىزمەتٸنە سٸلتەمە جاساپ.
2023 جىلعى 1 قازانداعى جاعداي بويىنشا حالىق سانى 19 967 964 ادام بولدى, ونىڭ ٸشٸندە قالا تۇرعىندارى – 12 387 957 ادام, اۋىل تۇرعىندارى – 7 580 007 ادام.
جىل باسىنان بەرٸ حالىق ٶسٸمٸ 1,02 پايىز نەمەسە 201,1 مىڭ ادام بولدى. حالىق سانىنىڭ ەڭ جوعارى ٶسۋ قارقىنى استانا – 4,06 پايىز مەن الماتى قالالارىندا – 2,28 پايىز جەنە ماڭعىستاۋ وبلىسىندا – 1,94 پايىز.
"رەسپۋبليكالىق ماڭىزى بار قالالاردان باسقا, تۇرعىندار سانى ميلليوننان اساتىن ايماقتار – تٷركٸستان (2 137 694), الماتى (1 524 539), جامبىل(1 221 976) جەنە قاراعاندى (1 135 601) وبلىستارى. حالىقتىڭ تابيعي ٶسٸمٸ ەسەبٸنەن, ياعني تۋۋ جەنە قايتىس بولۋ دەرەكتەرٸن ەسكەرگەندە, حالىق سانى 194 753 ادامعا ٶستٸ. كٶشٸ-قون ٶسٸمٸ ەسەبٸنەن حالىق سانى 6 404 ادامعا كٶبەيدٸ, بۇل سالدونىڭ وڭ ەكەنٸن كٶرسەتەدٸ", - دەلٸنگەن حابارلامادا.
حالىقتىڭ تابيعي قوزعالىسى ەسەبٸنەن ٶسۋدٸڭ ەڭ جوعارى قارقىنى تٷركٸستان وبلىسىندا بايقالدى, وندا حالىق سانى 34 097 ادامعا, شىمكەنت قالاسىندا 19 242 ادامعا, الماتى وبلىسىندا 18 251 ادامعا ٶستٸ. حالىق ٶسٸمٸنٸڭ اتالعان قارقىنىن ەسكەرسەك, 20 ميلليون ادام كٶرسەتكٸشٸ 2023 جىلعى قاراشادا بولادى دەپ كٷتٸلٸپ وتىر.
