«قازاقستان حالقىنا» قوعامدىق قورىنا كەلٸپ تٷسكەن ٶتٸنٸمدەردٸڭ 70 پايىزى ۇيىمنىڭ قىزمەتٸنە سەيكەس كەلمەيدٸ. بۇل تۋرالى اتالعان قوردىڭ تٶراعاسى بولات جەمٸشەۆ مەلٸم ەتتٸ, دەپ حابارلايدى قازاقپارات.
وسى ورايدا ول قور تۇرعىن ٷي ساتىپ الۋمەن, ازاماتتاردىڭ نەسيەلەرٸن ٶتەۋمەن اينالىسپايتىنىن اتاپ ٶتتٸ.
«قايىرىمدىلىق كٶمەك تۋرالى بارلىق ٶتٸنٸم قوردىڭ ەلەكتروندى پورتالى ارقىلى كەلٸپ تٷسەدٸ. بٷگٸندە قور قۇرىلعان سەتتەن باستاپ قازاقستاننىڭ بارلىق ٶڭٸرٸنەن 30 مىڭنان استام ٶتٸنٸم كەلدٸ. ونىڭ 70 پايىزى قوردىڭ قىزمەتٸنە سەيكەس كەلمەيدٸ. ولاردىڭ كٶبٸسٸ باسپانا ساتىپ الۋ مەن نەسيەنٸ ٶتەۋگە قاتىستى», - دەدٸ جەمٸشەۆ ورتالىق كوممۋنيكاتسييالار قىزمەتٸندە.
ونىڭ ايتۋىنشا, قالعان ٶتٸنٸمدەر جارعىلىق مٸندەتتەرگە سەيكەس كەلەدٸ.
