فوتو: aikyn.kz
الماتىدا قايىرىمدىلىق سالاسىنداعى تەرتٸپ تاعى بٸر رەت قوعام نازارىن اۋداردى. قايىرىمدىلىق قورىنىڭ ديرەكتورى كەمەلەتكە تولماعان بالانى بازاردا اقشا جيناۋعا جٸبەرٸپ, زاڭدى اينالىپ ٶتپەك بولعان, دەپ حابارلايدى Ult.kz.
بۇل ەرەكەت قوعامدىق تەرتٸپتٸ بۇزىپ قانا قويماي, قايىرىمدىلىق جۇمىسىنداعى اشىقتىق پەن ادالدىق مەسەلەسٸن تاعى دا كٷن تەرتٸبٸنە شىعاردى.
15 جاستاعى جاسٶسپٸرٸمنٸڭ بازاردا قاراجات جيناپ جٷرگەنٸن انىقتاعاننان كەيٸن, قور باسشىسىنا قر ەقبتك-نٸڭ 128-بابىنىڭ 1-بٶلٸگٸ بويىنشا ەكٸمشٸلٸك ٸس قوزعالدى. سوتتا ديرەكتور كٸنەسٸن تولىق مويىندادى. جينالعان دەلەلدەر مەن كەمەلەتكە تولماعان بالانىڭ سٶزٸ قۇقىق بۇزۋشىلىقتىڭ بولعانىن راستادى. نەتيجەسٸندە سوت ايىپتى دەپ تانىپ, وعان 50 اەك, ياعني 196 مىڭ تەڭگەدەن استام ايىپپۇل سالدى.
بۇل وقيعا حالىقتىڭ قايىرىمدىلىق ۇيىمدارىنا دەگەن سەنٸمٸنە سىزات تٷسٸرگەن بٸرنەشە جاعدايدىڭ بٸرٸ عانا. سوڭعى جىلدارى قايىرىمدىلىق قورلارىنىڭ قىزمەتٸ, ولاردىڭ قارجىلىق تەرتٸبٸ, ەسەپتٸلٸگٸ جيٸ تالقىعا تٷسٸپ جٷر.
قايىرىمدىلىق قورلارى قارجىنى قالاي جۇمساۋى كەرەك?
«قايىرىمدىلىق تۋرالى» زاڭ ۇيىمدارعا تٷسەتٸن قارجىنىڭ قايدا باعىتتالۋى تيٸس ەكەنٸن ناقتى كٶرسەتەدٸ. زاڭنىڭ 12-بابى بويىنشا كٸرٸستەر:
بٸر رەتتٸك نەمەسە بٸرنەشە قايىرىمدىلىق كٶمەككە;
ۇزاق مەرزٸمدٸ باعدارلامالارعا;
ەلەۋمەتتٸك جارنامالارعا;
ۇيىم قىزمەتٸن جٷزەگە اسىرۋعا جۇمسالۋى مٷمكٸن.
الايدا ەڭ ماڭىزدى تۇسى ەكٸمشٸلٸك-باسقارۋشىلىق شىعىنداردىڭ ناقتى ليميتٸ زاڭدا كٶرسەتٸلمەگەن. بۇل ەربٸر قوردىڭ ٶز ٸشكٸ ەرەجەسٸنە قالدىرىلعان. تەك نىسانالى كاپيتالدىڭ (ەنداۋمەنت) باسقارۋ شىعىندارى جىلدىق كٸرٸستٸڭ 20%-ىنان اسپاۋى كەرەگٸ جازىلعان.
سونىمەن قاتار, ەربٸر قايىرىمدىلىق ۇيىمى جىلىنا كەم دەگەندە بٸر رەت اتقارىلعان جۇمىستار تۋرالى ەسەپتٸ باق-تا نەمەسە رەسمي سايتىندا جارييالاۋعا مٸندەتتٸ. بۇعان قوسا, ٷەۇ دەرەكقورىنا ەسەپ تاپسىرۋى تيٸس.
قورلاردى كٸم باقىلايدى? جٷيە نەگە ەلسٸز?
الماتى – قايىرىمدىلىق ۇيىمدارىنىڭ ەڭ كٶپ شوعىرلانعان قالاسى. بٸراق اشىقتىق پەن ەسەپتٸلٸك مەسەلەسٸ كٶپ جىلدار بويى شەشٸمٸن تاپپاي كەلەدٸ. بيىل جٷرگٸزٸلگەن تەكسەرٸستەر نەتيجەسٸندە قالاداعى 26 قوردىڭ تەك 11-ٸ عانا ناقتى جۇمىس ٸستەيتٸنٸ انىقتالدى, قالعان 15-ٸ كٶرسەتٸلگەن مەكەنجايدا جوق.
قوعام سەنٸم ارتىپ تاپسىرعان اقشانى ماقساتسىز جۇمساۋ, قارجىلىق ەسەپتٸڭ بولماۋى, كٷمەن تۋدىراتىن اكتسييالار, مۇنىڭ بەرٸ باقىلاۋدىڭ جەتكٸلٸكسٸزدٸگٸنەن تۋىندايدى. مەسەلەن, Biz Birgemiz Qazaqstan قايىرىمدىلىق قورىنا قاتىستى داۋ قوعامدى دٷر سٸلكٸندٸردٸ. قوردىڭ قارجىسى تۋرالى ساۋالدارعا ناقتى جاۋاپ بەرٸلمەگەن سوڭ حالىق اشىق ەسەپ تالاپ ەتتٸ. بۇدان كەيٸن قوردىڭ قۇرىلتايشىسى پەريزات قايرات 1,5 ملرد تەڭگەنٸ جىمقىردى دەگەن كٷدٸكپەن ۇستالدى.
بۇل – جٷيەدەگٸ ولقىلىقتاردىڭ كٶرٸنٸسٸ. رەسمي دەرەكتەر تولىق بولماسا دا, ەلٸمٸزدە شامامەن 1300-دەن استام قايىرىمدىلىق ۇيىمى تٸركەلگەن. بٸراق ولاردىڭ كٶپشٸلٸگٸنە مەملەكەتتٸك باقىلاۋ جوق. قورلاردىڭ قىزمەتٸ نەگٸزٸنەن قوعامدىق باقىلاۋعا عانا سٷيەنەدٸ.
زاڭ ەسكٸردٸ, جٷيە ٶزگەرٸستٸ تالاپ ەتەدٸ
قايىرىمدىلىق سالاسىنىڭ ماماندارى 2015 جىلى قابىلدانعان «قايىرىمدىلىق تۋرالى» زاڭ قازٸرگٸ جاعدايعا ساي ەمەس ەكەنٸن ايتادى. قوعامداعى ٶزگەرٸستەر, قورلاردىڭ كٶبەيۋٸ, جاڭا تەحنولوگييالار مەن قارجىلىق اعىنداردىڭ كٷردەلەنۋٸ زاڭدى جاڭارتۋدى قاجەت ەتەدٸ.
قايىرىمدىلىق – قازاقتىڭ ەجەلدەن كەلە جاتقان اسىل قاسيەتٸ. بٸراق زاماناۋي قايىرىمدىلىق اشىقتىق پەن ەسەپتٸلٸكتٸ تالاپ ەتەدٸ. جاسٶسپٸرٸمدٸ بازاردا اقشا جيناتتىرعان وقيعا سالاداعى تەرتٸپسٸزدٸكتٸڭ بٸر عانا مىسالى. قايىرىمدىلىقتى قولدايتىن حالىقتىڭ سەنٸمٸ سىنعا تٷسپەۋٸ ٷشٸن باقىلاۋ مەن زاڭنامانى جەتٸلدٸرۋ – بٷگٸنگٸ كٷننٸڭ تالابى.
