فوتو: Wikicity.kz
الماتى قالاسىنىڭ ەكٸمٸ ەربولات دوساەۆ مەسليحاتتىڭ كەزەكتەن تىس سەسسيياسىندا "المالى" ساۋدا ورتالىعى مۇراجايعا اينالاتىنىن مەلٸمدەدٸ, دەپ حابارلايدى ult.kz.
"2025 جىلدان باستاپ الماتىدا بۇرىنعى "المالى" ساۋدا ورتالىعىنىڭ بازاسىندا بالالارعا ارنالعان عىلىم مۇراجايى قۇرىلا باستايدى. تمد ەلدەرٸندە العاش رەت اشىلعالى وتىرعان مۇراجايعا Science Museum Singapore كٶمەكتەسەدٸ. سول ٷشٸن قالا بيۋدجەتٸنەن 12,2 ملرد تەڭگە بٶلٸنەدٸ", - دەپ مەلٸمدەدٸ ەربولات دوساەۆ.
ايتا كەتەيٸك, "المالى" ساۋدا ورتالىعى الماتى قالاسىنداعى رەسپۋبليكا الاڭىندا جەر استىندا ورنالاسقان. ساۋدا ورتالىعىنىڭ جابىق تۇرعانىنا بٸرنەشە جىل بولدى. ونىڭ سالىنۋى دا قوعامدا داۋ تۋدىرعان ەدٸ. سەبەبٸ, جەلتوقسان كٶتەرٸلٸسٸ بولعان, مىڭداعان ادامنىڭ قانى تٶگٸلگەن قاسٸرەتكە تولى جەردٸ ويىن-ساۋىق ورتالىعىنا اينالدىرۋعا قارسى بولعاندار كٶپ بولدى.
ەسكە سالساق, "المالى" ساۋدا كەشەنٸ بۇرىنعى پرەزيدەنت نۇرسۇلتان نازارباەۆتىڭ قۇداسى قايرات بورانباەۆقا تيەسٸلٸ بولعان. ول بۇل نىساندى 2023 جىلى مەملەكەت مەنشٸگٸنە قايتارىپ بەرگەن. قاڭتار وقيعاسى كەزدٸندە ساۋدا كەشەنٸندە بٸراز مٷلٸك قيراعان.
