فوتو: Sports.kz
الماتىلىق "قايرات" UEFA چەمپيوندار ليگاسىنىڭ نەگٸزگٸ كەزەڭٸندەگٸ سوڭعى ماتچىندا انگلييانىڭ اتاقتى "ارسەنال" كلۋبىنا قارسى ويناپ, 2:3 ەسەبٸمەن جەڭٸلدٸ, دەپ جازادى Ult.kz.
كەزدەسۋ لوندوندىقتاردىڭ باسىمدىعىمەن باستالدى. ويىننىڭ 2-مينۋتىندا ۆيكتور ديوكەرەش ەسەپ اشىپ, قوناقتاردى العا شىعاردى. الايدا "قايرات" تەز ەس جيىپ, 7-مينۋتتا تاعايىندالعان پەنالتيدٸ جورجينو سەتتٸ ورىنداپ, تارازى باسىن تەڭەستٸردٸ.
بۇدان كەيٸن "ارسەنال" قايتا شابۋىلعا كٶشٸپ, ويىن تٸزگٸنٸن ٶز قولىنا الدى. 15-مينۋتتا كاي حاۆەرتس ايىپ الاڭى ٸشٸنەن دەل سوققى جاساپ, كومانداسىن العا شىعارسا, 38-مينۋتتا گابريەل مارتينەللي قارسى شابۋىل كەزٸندە قاقپانىڭ الىس بۇرىشىن دەل كٶزدەپ, ەسەپتٸ 3:1-گە جەتكٸزدٸ.
ەكٸنشٸ تايمدا الماتىلىقتار ويىن قارقىنىن ارتتىرىپ, قارسىلاس قاقپاسىنا قىسىم كٶرسەتتٸ. ماتچتىڭ قوسىمشا مينۋتتارىندا ريكاردينو بٸر گول سوعىپ, ەسەپ ايىرماسىن قىسقارتقانىمەن, كەزدەسۋ نەتيجەسٸن ٶزگەرتۋگە مٷمكٸندٸك بولمادى.
وسىلايشا, "قايرات" چەمپيوندار ليگاسىنداعى نەگٸزگٸ كەزەڭدٸ جەڭٸلٸسپەن اياقتاعانىمەن, مىقتى قارسىلاسقا قارسى تارتىستى ويىن كٶرسەتٸپ, جانكٷيەرلەرٸنٸڭ ىستىق ىقىلاسىنا بٶلەندٸ.
