الماتىلىق “قايرات” كومانداسى باس جاتتىقتىرۋشى كارلوس فەررەرمەن “قوش” ايتىستى. بۇل جايىندا “قايرات” فك-نىڭ قاداعالاۋ كەڭەسٸنٸڭ تٶراعاسى قايرات بورانباەۆ باسپاسٶز مەجٸلٸسٸندە ايتتى, دەپ جازدى Vesti.kz.
“بٷگٸن فەررەرمەن كەلٸسٸمشارت جويىلدى. ول العا قويعان مٸندەتتەردٸ اقتاي المادى. ٶتە جاقسى مامان, دەگەنمەن وعان تەجٸريبە جەتٸسپەگەن سەكٸلدٸ. سونداي-اق تٸلدٸك كەدەرگٸ دە ٶز سالدارىن تيگٸزدٸ. ٶز كەزەگٸندە ول رەنجٸدٸ, بٸراق جۇمىستان بوساتىلۋىن سابىرلى قابىلدادى. بٸز سوڭعى جىلدارى جاستاردى كٶتەرمەلەۋمەن اينالىستىق. “قايراتتىڭ” جاڭا دامۋ ۆەكتورىن ۇستانعانىنا ەش ٶكٸنبەيمٸز”, - دەدٸ بورانباەۆ.
