پاۆلوداردا اسحانا كاسسيرٸ ٷش جىل ٸشٸندە كليەنتتەردەن تٷسكەن 7,3 ملن تەڭگەنٸ زاڭسىز يەمدەنگەن. ول تاپسىرىس اقىسىن اسحانا شوتىنىڭ ورنىنا ٶزٸنٸڭ بانك كارتاسىنا قابىلداپ وتىرعان, دەپ حابارلايدى ult.kz.
سوت ماتەريالدارىنا سەيكەس, ەيەل اسحانادا 2014 جىلدان بەرٸ جۇمىس ٸستەگەن. العاشىندا ناۋبايشى بولعان ول 2020 جىلى كاسسير قىزمەتٸنە اۋىسقان.
بۇعان دەيٸن اسحاناداعى قولما-قول اقشاسىز تٶلەمدەر مەكەمە يەسٸنٸڭ شوتىنا تٷسەتٸن. كەيٸن قوجايىن كليەنتتەردٸڭ تٶلەمٸن جەكە شوتىنا قابىلداۋعا تىيىم سالعان. وسىدان كەيٸن كاسسير تاپسىرىس بەرۋشٸلەرگە ٶزٸنٸڭ تەلەفون نٶمٸرٸن بەرٸپ, تٶلەمدەردٸ جەكە شوتىنا قابىلداي باستاعان.
2020-2023 جىلدارى ول تٷسكەن قاراجاتتىڭ بٸر بٶلٸگٸن اسحانا يەسٸنە ٶتكٸزبەي, ٶزٸنە الىپ وتىرعان.
كاسسيردٸڭ ەرەكەتٸ 2024 جىلعى قاڭتاردا ەشكەرەلەنگەن. ول جۇمىسقا شىعا الماعان كٷنٸ ورنىنا بۋحگالتەر كاسساعا وتىرعان. سول كەزدە بۋحگالتەر كليەنتتەردٸڭ تاپسىرىس اقىسىن كاسسيردٸڭ نٶمٸرٸنە اۋدارىپ جاتقانىن بايقاپ, بۇل تۋرالى باسشىلىققا حابارلاعان.
وسىدان كەيٸن كاسسيردەن بانك شوتىنىڭ كٶشٸرمەسٸ سۇراتىلىپ, كليەنتتەردەن تٷسكەن اۋدارىمدار تەكسەرٸلگەن. نەتيجەسٸندە اسحاناعا كەلتٸرٸلگەن زالال 7,3 ملن تەڭگە ەكەنٸ انىقتالعان.
پوليتسييا اتالعان دەرەك بويىنشا قىلمىستىق ٸس قوزعادى. سوتتا بۇرىنعى كاسسير كٸنەسٸن مويىنداپ, سوت ٷكٸمٸ شىققانعا دەيٸن كەلتٸرٸلگەن شىعىندى تولىق ٶتەگەن.
پاۆلودار سوتى ەيەلدٸ كٸنەلٸ دەپ تانىپ, وعان 3 جىل 4 اي شارتتى جازا تاعايىندادى. جازا قر جاڭا كونستيتۋتسيياسىنىڭ قابىلدانۋىنا وراي جارييالانعان راقىمشىلىق تۋرالى زاڭ ەسكەرٸلٸپ بەلگٸلەنگەن.
