سۋرەت: ©️ Tengrinews.kz / تۇرار قازانعاپوۆ
قوستاناي تۇرعىنى قاراعاندى وبلىسىنداعى شارۋا قوجالىعى قوجايىنىنىڭ قولىندا التى جىل ەڭبەك قۇلدىعىندا بولعانىن مەلٸمدەدٸ, - دەپ حابارلايدى Tengrinews.kz سايتى "پاتريوت" Telegram-ارناسىنا سٸلتەمە جاساپ.
الەكساندر ۆدوۆيچەنكو ەسٸمدٸ ەر ادام التى جىل بۇرىن قاراعاندى وبلىسىنداعى وساكاروۆ اۋدانىنىڭ مولودەجنوە اۋىلىنىڭ جانىنداعى قىستاۋدان قاشىپ كەتكەنٸ تۋرالى وقيعاسىن ايتىپ بەردٸ.
ونىڭ سٶزٸنشە, شارۋا قوجالىعىنىڭ قوجايىنى وعان بٸر ماۋسىم مال باعۋ جۇمىسىن ۇسىنعان. الەكساندردان قۇجاتتارىن الىپ, جالاقى تٶلەمەگەن. جۇمىسقا رەسمي ورنالاسپاعان. تٸپتٸ تەك تاماق ٷشٸن جۇمىس ٸستەگەن.
"مەن ۋچاسكەلٸك پوليتسييا قىزمەتكەرٸ سۇراپ قالعان جاعدايدا كەرەك بولادى دەپ قۇجاتتارىمدى قايتارۋىن ٶتٸندٸم. بٸراق قوجايىن قۇجاتتار ونىڭ قولىندا قالسا جاقسى بولاتىنىن ايتتى", - دەدٸ ەر ادام.
الەكساندر قاشىپ كەتە الماعان, سەبەبٸ شارۋا قوجالىعى يەسٸنٸڭ تۋىستارى ونى التى جىل باقىلاپ وتىرىپتى. التى جىل ٸشٸندە ەر ادامدى ٷيلەندٸرٸپ, جۇبايى قىز تۋعان. جاس جۇبايلارعا تۋىستارىن شاقىرۋعا رۇقسات ەتٸلمەگەندٸكتەن, توي بولماعان. جەبٸرلەنۋشٸنٸڭ ايتۋىنشا, فەرمادا ونى ەشكٸم ۇرماعان, كەيدە باستىقپەن سٶزگە كەلٸپ قالعان سەتتەر بولىپ تۇرعان.
ەر ادام جاياۋ قاشىپ ٷلگەرگەن. شامامەن 60 شاقىرىم جٷرٸپ ٶتٸپ, جول بويىنداعى كافەگە توقتاعان. تۇراق يەسٸ وعان شەلپەك پەن ىستىق شاي بەرٸپ, بٸرنەشە كٷن كافەدە قالۋدى ۇسىنعان. بٸراق كٶرشٸ اۋىل تۇرعىندارى ونى تانىپ, قوجالىق يەسٸنە ايتىپ بەرەدٸ دەپ قورىققان الەكساندر ۇسىنىستان باس تارتقان.
الەكساندردىڭ ەيەلٸ مەن قىزى فەرمادا قالعان.
"مەن كەتٸپ بارا جاتقاندا تەلەفوندى ەيەلٸمە قالدىردىم. تەلەفون ارقىلى قانداي دا بٸر جولمەن مەنٸ تاۋىپ الادى دەپ قورقامىن, سوندىقتان تەلەفوندى ٶزٸممەن بٸرگە ۇستاي المايمىن", - دەدٸ ەر ادام.
قوستاناي وبلىسىنىڭ پوليتسييا دەپارتامەنتٸ بازا بويىنشا ەر ادام ٸز-تٷزسٸز جوعالىپ كەتكەن ادام رەتٸندە ٸزدەستٸرٸلمەگەنٸن حابارلادى.
"ەگەر ٶتٸنٸش تٷسسە, شارالار قابىلدانادى", - دەدٸ پوليتسييا باسپاسٶز قىزمەتٸنٸڭ ٶكٸلٸ.
ماۋسىمدا باق-تا قاراعاندى وبلىسىندا بولعان ۇقساس جاعداي جارييالاندى. ەكٸ ەر ادام شەت اۋدانىندا ەڭبەك قۇلدىعىندا ۇستالىپ, مال باعۋ ٷشٸن ۇرىپ-سوعىلعان. پوليتسييا قىلمىستىق كودەكستٸڭ 126 بابى "زاڭسىز باس بوستاندىعىنان ايىرۋ" بويىنشا سوتالدى تەرگەۋ جٷرگٸزٸپ جاتىر. باپ ون جىلعا دەيٸن باس بوستاندىعىنان ايىرۋ جازاسىن قاراستىرادى.
